വാഷിംഗ്ടൺ: അമേരിക്കയുടെ ആണവ മിസൈൽ ബേസിൽ ക്യാൻസറിന് കാരണമാകുന്ന മൂലകങ്ങൾ കണ്ടെത്തി. മൊണ്ടാന ന്യൂക്ലിയർ ബേസിലെ വലിയൊരു വിഭാഗം ജീവനക്കാർക്ക് ക്യാൻസർ ബാധിച്ചതായി കണ്ടെത്തി. യുഎസ് വ്യോമസേനയാണ് ഇക്കാര്യം സ്ഥിരീകരിച്ചത്. മിസൈൽ ബേസിൽ ക്യാൻസർ പടരുന്നതായി പരാതിയുണ്ടെന്ന് മാധ്യമങ്ങള്‍ റിപ്പോര്‍ട്ട് ചെയ്തിരുന്നു. ഇതിനുശേഷം, ഇന്റർകോണ്ടിനെന്റൽ ബാലിസ്റ്റിക് മിസൈൽ ബേസിൽ നിന്ന് സാമ്പിളുകൾ എടുത്തു പരിശോധിച്ചതില്‍ അർബുദ പദാർത്ഥങ്ങൾ കണ്ടെത്തി.
ടോർച്ച്ലൈറ്റ് ഇനിഷ്യേറ്റീവ് അനുസരിച്ച്, ന്യൂക്ലിയർ മിസൈൽ സൈറ്റിൽ ജോലി ചെയ്യുന്ന ഏകദേശം 268 ജീവനക്കാരും അവരുടെ കുടുംബാംഗങ്ങളും കഴിഞ്ഞ കുറച്ച് വർഷങ്ങളായി കാൻസർ, രക്ത സംബന്ധമായ അസുഖങ്ങൾ അല്ലെങ്കിൽ മറ്റ് ഗുരുതരമായ രോഗങ്ങളാൽ ബുദ്ധിമുട്ടുന്നുണ്ടെന്ന് റിപ്പോർട്ട് ചെയ്തിട്ടുണ്ട്. മൊണ്ടാന ബേസിന്റെ 2 മിസൈൽ വിക്ഷേപണ കേന്ദ്രത്തിൽ നിന്ന് എടുത്ത സാമ്പിളുകളിൽ കാർസിനോജെന്റെ അളവ് പരിസ്ഥിതി സംരക്ഷണ ഏജൻസിയുടെ അംഗീകൃത നിലവാരത്തേക്കാൾ കൂടുതലാണ്.
റിപ്പോർട്ട് വന്നതിന് ശേഷം, യുഎസ് എയർഫോഴ്സ് ഉടൻ തന്നെ ബേസ് ഒഴിയുകയും അത് വൃത്തിയാക്കാനും ക്യാൻസറിന് കാരണമാകുന്ന ഘടകങ്ങൾ നീക്കം ചെയ്യാനും നിർദ്ദേശം നൽകി. അതോടൊപ്പം ബേസിൽ ജോലി ചെയ്യുന്ന ജീവനക്കാർക്കും എയർഫോഴ്സ് ജീവനക്കാർക്കും അവരുടെ കുടുംബങ്ങൾക്കും മെച്ചപ്പെട്ട സൗകര്യങ്ങൾ ഏർപ്പെടുത്താനും ഉത്തരവായി. രക്താർബുദത്തിന്റെ മിക്ക കേസുകളും ആരംഭഘട്ടത്തില്‍ തന്നെ കണ്ടെത്തിയിട്ടുണ്ട്. ന്യൂക്ലിയർ സൈറ്റിൽ ക്യാൻസർ ബാധിച്ചവരിൽ ഭൂരിഭാഗവും ഭൂഗർഭ നിയന്ത്രണ കേന്ദ്രത്തിൽ പ്രവർത്തിക്കുന്ന മിസൈലർമാരാണ്. അവർ മിസൈലുകളെ നിരീക്ഷിക്കുകയും ആവശ്യമെങ്കിൽ സൈലോ അടിസ്ഥാനമാക്കിയുള്ള ആണവായുധങ്ങൾ വിക്ഷേപിക്കുകയും ചെയ്യുന്നു.
