എറണാകുളം: മറുനാടൻ മലയാളി ഉടമയും ചീഫ് എഡിറ്ററുമായ ഷാജൻ സ്കറിയയെ തൃക്കാക്കര പോലീസ് അറസ്റ്റു ചെയ്തു. വ്യാജ ബിഎസ്എൻഎൽ ബില്‍ ഉണ്ടാക്കിയെന്ന പരാതിയെ തുടർന്നാണ് ഷാജനെ അറസ്റ്റു ചെയ്തത്. നിലമ്പൂരിൽ വെച്ച് ചോദ്യം ചെയ്തതിന് പിന്നാലെയാണ് നടപടി.
മതസ്പർദ്ധ വളർത്തിയെന്ന ആരോപണവുമായി ബന്ധപ്പെട്ട അന്വേഷണത്തിൽ ഇന്ന് രാവിലെ നിലമ്പൂർ സ്റ്റേഷൻ ഹൗസ് ഓഫീസർ (എസ്എച്ച്ഒ) മുമ്പാകെ ഹാജരാകാൻ കോടതി പ്രത്യേകം നിർദേശിച്ചിരുന്നു. ഇത് പാലിക്കുന്നതിൽ പരാജയപ്പെട്ടാൽ മുൻകൂർ ജാമ്യം റദ്ദാക്കുമെന്ന് ഹൈക്കോടതി മുന്നറിയിപ്പ് നൽകിയിരുന്നു. ഈ മാസം 17-ാം തീയതി ഹാജരാകാനാണ് ഷാജന് ആദ്യം സമൻസ് അയച്ചിരുന്നത്.
നിലമ്പൂർ നഗരസഭ സ്ഥിരം സമിതി അദ്ധ്യക്ഷൻ സ്കറിയയുടെ പരാതിയുടെ അടിസ്ഥാനത്തിൽ ഷാജൻ സ്കറിയക്കെതിരെ പൊലീസ് നേരത്തെ കേസെടുത്തിരുന്നു. കേസിലെ ചോദ്യം ചെയ്യൽ നടപടികളിൽ നിന്ന് ഒഴിഞ്ഞു മാറിയതിന് ഷാജൻ സ്കറിയയെ കോടതി നേരത്തെ ശാസിച്ചിരുന്നു. അദ്ദേഹത്തിന്റെ കോടതിയോടുള്ള അവഗണനയെ ജസ്റ്റിസ് കെ ബാബു നിശിതമായി വിമര്‍ശിക്കുകയും, അദ്ദേഹത്തിന്റെ പെരുമാറ്റം നിരുത്തരവാദപരവും അനാദരവുമാണെന്ന് അപലപിക്കുകയും ചെയ്തിരുന്നു.
ഷാജൻ സ്കറിയയും അദ്ദേഹത്തിന്റെ ഓൺലൈൻ വാർത്താ ചാനലായ ‘മറുനാടൻ മലയാളി’യും ഇപ്പോൾ സർക്കാർ ഉന്നയിക്കുന്ന ആരോപണങ്ങളുടെയും നിയമപരമായ വെല്ലുവിളികളുടെയും ഒരു പരമ്പരയുമായി പൊരുതുകയാണ്.
കേരള സമൂഹത്തിൽ ആഴത്തിൽ വേരൂന്നിയിട്ടുള്ള കോർപ്പറേറ്റ് നേതാക്കൾ, വ്യവസായികൾ, ഭൂമാഫിയകൾ, മയക്കുമരുന്ന് മാഫിയകൾ, ഉദ്യോഗസ്ഥർ, രാഷ്ട്രീയ നേതാക്കൾ, തീവ്രവാദ ഗ്രൂപ്പുകൾ എന്നിവരുടെ നിയമവിരുദ്ധ പ്രവർത്തനങ്ങൾ പുറത്തുകൊണ്ടുവരാനുള്ള നിർഭയമായ സമീപനവും ഭരണപക്ഷത്തിനെതിരായ സ്കറിയയുടെ ധീരമായ സമീപനവുമാണ് ഷാജന് സ്കറിയ നേരിടുന്ന വെല്ലുവിളികള്‍.
അതേസമയം, ഷാജന് സ്കറിയയെ അറസ്റ്റ് ചെയ്തത് നീതീകരിക്കാനാകില്ലെന്നും പോലീസിന്റെയും സര്‍ക്കാരിന്റെയും നടപടി പ്രതിഷേധാര്‍ഹമാണെന്നും കോണ്‍ഫെഡറേഷന്‍ ഓഫ് ഓണ്‍ലൈന്‍ മീഡിയ (കോം ഇന്ത്യ) പ്രസ്താവനയില്‍ വ്യക്തമാക്കി.
നിലമ്പൂര്‍ പോലീസ് രജിസ്റ്റര്‍ ചെയ്ത കേസില്‍ കോടതി നിര്‍ദേശപ്രകാരം പോലീസ് സ്റ്റേഷനില്‍ ഹാജരാകാന്‍ എത്തിയപ്പോള്‍ തൃക്കാക്കര പോലീസ് രജിസ്റ്റര്‍ ചെയ്ത കേസില്‍ കൊച്ചിയില്‍ നിന്നും പോലീസ് നിലമ്പൂരിലെത്തി ഷാജനെ കൃത്യമായ ആസൂത്രണത്തോടെയാണ് അറസ്റ്റ് ചെയ്തതെന്ന് കോം ഇന്ത്യ പറഞ്ഞു.
സര്‍ക്കാരിനെതിരെ വാര്‍ത്തകള്‍ നല്‍കുന്നതിന്റെ പേരില്‍ മാധ്യമ പ്രവര്‍ത്തകരെ വേട്ടയാടുന്ന സമീപനം നേരത്തെ തന്നെ പ്രതിഷേധത്തിന് കാരണമായിരുന്നു. എന്നിട്ടും സര്‍ക്കാര്‍ പഴയ സമീപനം തന്നെയാണ് വീണ്ടും മാധ്യമ പ്രവര്‍ത്തകര്‍ക്കെതിരെ തുടരുന്നത്.
നീതിന്യായ വ്യവസ്ഥ നിലനില്‍ക്കുന്ന രാജ്യത്ത് മറ്റൊരു കേസില്‍ കോടതി ആവശ്യപ്പെട്ടതിന്റെ അടിസ്ഥാനതത്തില്‍ ഹാജരാകാന്‍ പോകുമ്പോള്‍ വഴിയില്‍ വെച്ച് ഷാജനനെ അറസ്റ്റ് ചെയ്തത് പ്രതികാര നടപടിയുടെ ഭാഗമാണെന്നും, അത്തരം നടപടികളില്‍ നിന്ന് സര്‍ക്കാരും പോലീസും പിന്തിരിയണമെന്നും കോം ഇന്ത്യ പ്രസിഡന്റ് വിന്‍സന്റ് നെല്ലിക്കുന്നേല്‍, സെക്രട്ടറി അബ്ദുല്‍ മുജീബ് എന്നിവര്‍ ആവശ്യപ്പെട്ടു.
മാധ്യമ പ്രവര്‍ത്തകരോടുള്ള ഭരണകൂട സമീപനങ്ങള്‍ ജനാധിപത്യ സംവിധാനത്തിന് യോജിക്കാന്‍ കഴിയാത്ത നിലയിലേക്ക് തരം താഴുന്നത് ശരിയല്ല. സത്യാവസ്ഥ മനസ്സിലാക്കി പോലീസ് നടപടി തിരുത്താന്‍ ആഭ്യന്തര വകുപ്പ് ഇടപെടണമെന്ന് കോം ഇന്ത്യ ആവശ്യപ്പെട്ടു.
