കൊച്ചി: കോടികളുടെ കരുവന്നൂർ സഹകരണ ബാങ്ക് തട്ടിപ്പുമായി ബന്ധപ്പെട്ട് ചോദ്യം ചെയ്യലിനായി വ്യാഴാഴ്ച (ഓഗസ്റ്റ് 31) എൻഫോഴ്‌സ്‌മെന്റ് ഡയറക്ടറേറ്റിന് മുന്നിൽ ഹാജരാകാൻ കഴിയില്ലെന്ന് മുൻ കേരള തദ്ദേശ സ്വയംഭരണ മന്ത്രി എ സി മൊയ്തീന് അറിയിച്ചതിനെത്തുടര്‍ന്ന് കേന്ദ്ര അന്വേഷണ ഏജൻസി വീണ്ടും സമൻസ് അയച്ചു. അദ്ദേഹത്തോട്, തിങ്കളാഴ്ച (സെപ്റ്റംബർ 4 ന്) കൊച്ചി ഓഫീസിൽ ചോദ്യം ചെയ്യലിന് ഹാജരാകാനാണ് ആവശ്യപ്പെട്ടിരിക്കുന്നത്.
ഏറെ കോളിളക്കം സൃഷ്ടിച്ച കരുവന്നൂർ സഹകരണ ബാങ്ക് തട്ടിപ്പ് കേസിന്റെ അന്വേഷണത്തിനായി പത്തു വർഷത്തിലേറെ പഴക്കമുള്ള ആദായനികുതി റിട്ടേൺ രേഖകൾ ഹാജരാക്കാനും മൊയ്തീനോട് ഇ ഡി നിർദേശിച്ചു.
കള്ളപ്പണം വെളുപ്പിക്കൽ കേസിൽ ഇന്ന് (ആഗസ്റ്റ് 31) രാവിലെ 11 മണിക്ക് കൊച്ചിയിലെ ഓഫീസിൽ ചോദ്യം ചെയ്യലിന് ഹാജരാകണമെന്ന് ആവശ്യപ്പെട്ട് ഇഡി മൊയ്തീന് കഴിഞ്ഞ വെള്ളിയാഴ്ച സമൻസ് അയച്ചിരുന്നുവെങ്കിലും തനിക്ക് കഴിയില്ലെന്ന് കാണിച്ച് ഏജൻസിക്ക് മുമ്പാകെ ഹാജരാകാൻ അദ്ദേഹം രണ്ടാഴ്ചത്തെ സമയം ആവശ്യപ്പെട്ടു. ചോദ്യം ചെയ്യൽ സമയത്ത് ഏജൻസിക്ക് മുന്നിൽ ഹാജരാക്കാൻ ആവശ്യമായ ആദായ നികുതി റിട്ടേൺ രേഖകൾ ശേഖരിക്കാനാണെന്നാണ് കാരണം പറഞ്ഞത്.
അതിനിടെ, കരുവന്നൂർ ബാങ്ക് മുൻ മാനേജർ ബിജു കരീം, മറ്റ് പ്രതികളായ പി പി കിരൺ, അനിൽ സേട്ട് എന്നിവരെ ബുധനാഴ്ച കൊച്ചിയിലെ ഇഡി ഓഫീസിൽ ചോദ്യം ചെയ്തു. ഇവരുടെ ചോദ്യം ചെയ്യൽ വ്യാഴാഴ്ചയും തുടർന്നു.
കരുവന്നൂർ ബാങ്കിലെ കോടികളുടെ ബിനാമി വായ്പയ്ക്ക് പിന്നിൽ എസി മൊയ്തീൻ എംഎൽഎയാണെന്ന് ഇഡി കണ്ടെത്തിയിരുന്നു. പാവപ്പെട്ടവരുടെ ഭൂമി അവരറിയാതെ പണയപ്പെടുത്തിയാണ് ബിനാമി വായ്പയെടുത്തതെന്നും ഇഡി വ്യക്തമാക്കി.
ശരിയായ മോർട്ട്ഗേജ് രേഖകളില്ലാത്ത ബാങ്കിലെ അംഗങ്ങളല്ലാത്തവർക്ക് വായ്പ അനുവദിക്കാൻ മൊയ്തീൻ ബാങ്ക് മാനേജർക്ക് നിർദ്ദേശം നൽകിയതായി ഇഡി വൃത്തങ്ങൾ അറിയിച്ചു. ഈ വായ്പകൾ ഇയാളുടെ ബിനാമികൾക്ക് അനധികൃതമായി നൽകിയതാണോയെന്ന് ഇഡി പരിശോധിക്കുന്നുണ്ട്.
മൊയ്തീന്റെയും നാല് സഹായികളായ കിരൺ പി.പി., റഹീം സി.എം., ഷിജു എം.കെ., സതീഷ് എന്നിവര്‍ തട്ടിപ്പിലൂടെ 25 കോടി കൈവശപ്പെടുത്തിയത്.
കുറച്ച് വർഷങ്ങൾക്ക് മുമ്പ് നിരവധി വായ്പക്കാർക്ക് അവർ കടം വാങ്ങിയതിനേക്കാൾ വലിയ തുകയുടെ റിക്കവറി നോട്ടീസ് ലഭിച്ചതോടെയാണ് ബാങ്ക് തട്ടിപ്പ് പുറത്തായത്.
സെപ്തംബർ അഞ്ചിന് നടക്കാനിരിക്കുന്ന പുതുപ്പള്ളി നിയമസഭാ ഉപതെരഞ്ഞെടുപ്പിന് മുമ്പ് ഇഡിയുടെ ചോദ്യം ചെയ്യലിൽ നിന്ന് ഒളിച്ചോടുകയാണ് സിപിഐഎം തന്ത്രമെന്ന് അറിയുന്നു. പുതുപ്പള്ളി നിയമസഭാ ഉപതെരഞ്ഞെടുപ്പിന് മുമ്പ് മൊയ്തീന്റെ ചോദ്യം വോട്ടർമാരിൽ പാർട്ടിയെ പ്രതികൂലമായി ബാധിക്കുമെന്ന് സിപിഐഎം നേതാക്കൾ ഭയക്കുന്നു.
