തൃശൂർ : സനാതന ധർമ്മം ഉന്മൂലനം ചെയ്യണമെന്ന് തമിഴ്നാട് കായിക മന്ത്രി ഉദയനിധി സ്റ്റാലിൻ (Udayanidhi Stalin) അടുത്തിടെ നടത്തിയ പരാമർശങ്ങളെ രൂക്ഷമായി വിമർശിച്ച് നടനും മുൻ പാർലമെന്റ് അംഗവുമായ സുരേഷ് ഗോപി (Suresh Gopi). തൃശൂർ മോതിരക്കണ്ണി മണ്ണുപുറം ക്ഷേത്രത്തിൽ നടന്ന പഞ്ചവർണ ചുവർ ചിത്രങ്ങളുടെ ചടങ്ങിൽ സംസാരിക്കുകയായിരുന്നു അദ്ദേഹം. ദേശീയ തലത്തിൽ നടക്കുന്ന ഭിന്നിപ്പിനെക്കുറിച്ചുള്ള തന്റെ ആശങ്ക അദ്ദേഹം സദസ്യരുമായി പങ്കു വെച്ചു.
ഇന്ത്യയുടെ പേര് കളങ്കപ്പെടുത്താൻ ശ്രമിക്കുന്നവരെ ‘വിഷപ്പാമ്പുകളോട്’ ഉപമിച്ച സുരേഷ് ഗോപി, അവരുടെ പ്രവർത്തനങ്ങളെ ഒരു പ്രത്യേക മാനസിക സ്വഭാവവുമായി ബന്ധപ്പെടുത്തി. തമിഴ്‌നാട്ടിൽ നിന്ന് അടുത്തിടെ ഉയർന്നുവരുന്ന പ്രസ്താവനകളിൽ അദ്ദേഹം തന്റെ വിഷമം പ്രകടിപ്പിച്ചു. അത്തരം വാചാടോപങ്ങൾ ഭിന്നത വളർത്തുകയാണെന്നും സൂചിപ്പിച്ചു.
സനാതന ധർമ്മം ഉയർത്തിപ്പിടിക്കുന്നതിലും സംരക്ഷിക്കുന്നതിലും ക്ഷേത്രങ്ങൾ വഹിക്കുന്ന പ്രധാന പങ്കിനെക്കുറിച്ച് ഊന്നിപ്പറഞ്ഞ അദ്ദേഹം, വിശ്വാസത്തിനെതിരായ വെല്ലുവിളികൾക്കെതിരെ സംരക്ഷണ കവചങ്ങളായി പ്രവർത്തിക്കണമെന്നും, ഭാവി തലമുറകൾക്ക് വഴികാട്ടിയായി പ്രവർത്തിക്കണമെന്നും നിര്‍ദ്ദേശിച്ചു. ഹൈന്ദവ പുരാണങ്ങളെ ചുറ്റിപ്പറ്റിയുള്ള വിവാദങ്ങൾ ഹിന്ദു സമൂഹത്തെ ഉണർത്താൻ സഹായിക്കുമെന്നും വിശ്വാസത്തിന് നേരെയുള്ള ആക്രമണങ്ങളെ പ്രാർത്ഥനയിലൂടെയും ആത്മീയ ശക്തിയോടെയും നേരിടണമെന്നും അദ്ദേഹം അഭിപ്രായപ്പെട്ടു.
മണ്ണുപുറം ക്ഷേത്രത്തിലെ കിരാതാർജ്ജുനിയം, കണ്ണപ്പചരിതം എന്നിവയുടെ ചിത്രങ്ങളടങ്ങിയ പഞ്ചവർണ ചുമർചിത്രങ്ങളുടെ സമാപനവും സമർപ്പണ ചടങ്ങിൽ നടന്നു. ആറ് മാസത്തിനുള്ളിൽ പൂർത്തിയാക്കിയ ഈ ചുവർചിത്രങ്ങൾ ക്ഷേത്രത്തിന്റെ സാംസ്കാരികവും ആത്മീയവുമായ പൈതൃകത്തിലേക്ക് കൂട്ടിച്ചേർക്കുന്നു. ക്ഷേത്ര മേൽശാന്തി കേശവ പ്രതിഷ്ഠാ ചടങ്ങുകൾക്ക് മുഖ്യ കാർമികത്വം വഹിച്ചു.
