മാഞ്ചസ്റ്റര്‍: ഉമ്മൻ ചാണ്ടിയുടെ നിര്യാണത്തെ തുടർന്ന് നടന്ന പുതുപ്പള്ളി നിയമസഭ ഉപതിരഞ്ഞെടുപ്പിൽ (Puthupally bi-election) അദ്ദേഹത്തിന്റെ മകനും യുഡിഫ് സ്ഥാനാർഥിയുമായ ചാണ്ടി ഉമ്മൻ (Chandy Oommen) നേടിയ ഉജ്ജ്വല വിജയത്തിൽ യുകെയിൽ മാഞ്ചസ്റ്ററിലെ കോൺഗ്രസ് പ്രവർത്തകർ ഇന്ത്യൻ ഓവർസീസ് കോൺഗ്രസിന്റെ കേരള ചാപ്റ്ററിന്റെ നേതൃത്വത്തിൽ നടത്തിയ വിജയാഘോഷം ആവേശോജ്ജ്വലമായി.
ഇന്ത്യൻ ഓവർസീസ് കോൺഗ്രസ് മാഞ്ചസ്റ്ററിലെ കത്തീഡ്രൽ യാർഡിൽ കേക്ക് മുറിച്ചും മധുര പലഹാരങ്ങൾ വിതരണം ചെയ്തും മുദ്രാവാക്യങ്ങൾ മുഴക്കിയും ആഹ്ളാദം അലതല്ലിയ ആഘോഷങ്ങളാണ് നടത്തിയത്.
IOC UK കേരള ചാപ്റ്റർ മീഡിയ കോ-ഓർഡിനേറ്റർ റോമി കുര്യാക്കോസ് മാഞ്ചസ്റ്ററിലെ വിജയാഘോഷങ്ങൾക്ക് നേതൃത്വം നൽകി.
കേരളത്തിൽ വോട്ടെണ്ണൽ ആരംഭിച്ച ആദ്യ മണിക്കൂറുകൾക്കുള്ളിൽ തന്നെ IOC പ്രവർത്തകർ കൊടിതോരണങ്ങളും മധുര പലഹാരങ്ങളുമായി മാഞ്ചസ്റ്ററിൽ ഒത്തുകൂടുകയും വിജയഘോഷങ്ങൾ ആരംഭിക്കുകയും ചെയ്തിരുന്നു. സാധാരണ യുകെയിൽ ഇതുപോലുള്ള തിരഞ്ഞെടുപ്പ് വിജയങ്ങൾ സംഘടനകൾ വലിയ ആഘോഷങ്ങളാക്കാറില്ലങ്കിലും, ക്ഷണനേരം കൊണ്ട് IOC യുടെ നേതൃത്വത്തിൽ യുകെയിലെ മാഞ്ചസ്റ്ററിൽ നടത്തിയ ഈ വിജയാഘോഷം യുകെയിൽ മാത്രമല്ല കേരളത്തിലും വൻ തരംഗമായി മാറി.
IOC യുകെ കേരള ചാപ്റ്റർ മീഡിയ കോ-ഓർഡിനേറ്റർ റോമി കുര്യാക്കോസ്, സച്ചിൻ സണ്ണി, ഷിനാസ് ഷാജു, ഷൈജു സാം വർഗീസ്, ലാൽസ് സെബാസ്റ്റ്യൻ എന്നിവർ പ്രസംഗിച്ചു. IOC പ്രവർത്തകരായ നിസാർ അലിയാർ, ഫെബിൻ സാബു, റോണി മോൻ ജോസഫ്, ആധിൽ കറുമുക്കിൽ, സെബിൻ സെബാസ്റ്റ്യൻ, സെബാൻ ബേബി, മുഹമ്മദ്‌ റസാഖ്, ബിജോ ജോസഫ്, ജെസ്റ്റിൻ ജോസ്, സുധീഷ് കെ ജോസഫ് എന്നിവർ ആഘോഷങ്ങൾക്ക് നേതൃത്വം നൽകി.
നേരത്തെ, പുതുപ്പള്ളി ഉപതിരഞ്ഞെടുപ്പ് പ്രചാരണ രംഗത്ത്, IOC UK കേരള ചാപ്റ്റർ പ്രതിനിനിധികളായി കേരള ചാപ്റ്റർ പ്രസിഡന്റ്‌ സുജു ഡാനിയേൽ, ബോബിൻ ഫിലിപ്പ് എന്നിവർ പങ്കെടുത്തിരുന്നു.
ജീവിച്ചിരുന്നപ്പോഴും അതിനു ശേഷവും ഉമ്മൻ ചാണ്ടിയേയും അദ്ദേഹത്തിന്റെ കുടുംബത്തെയും രാഷ്ട്രീയ എതിരാളികൾ വേട്ടയാടിയതും ഉപതിരഞ്ഞെടുപ്പിൽ ചാണ്ടി ഉമ്മന്റെ സ്ഥാനാർഥിത്വം പ്രഖ്യാപിച്ചത് മുതൽ ഒളിഞ്ഞും തെളിഞ്ഞും അപവാദ പ്രചാരണങ്ങൾ തുടരുന്നതിലും യുകെയിലെ മലയാളികൾക്കിടയിൽ ശക്തമായ അമർഷം നിലനിന്നിരുന്നു.
53 വർഷം പുതുപ്പള്ളിയെ കൈവെള്ളയിൽ എന്ന പോലെ പരിപാലിച്ചുപോന്ന കുഞ്ഞുകുഞ്ഞിനോടുള്ള അകമഴിഞ്ഞ സ്‌നേഹവും, അദ്ദേഹം എംഎൽഎ എന്ന നിലയിൽ പുതുപ്പള്ളിയിൽ നടത്തിയ ജനകീയ വികസന പ്രവർത്തനങ്ങളും, മുഖ്യമന്ത്രി എന്ന നിലയിൽ അദ്ദേഹം നടത്തിയ ജനപ്രീയ വികസന പദ്ധതികളും മണ്ഡലമാകെ നിറഞ്ഞുനിന്ന ചാണ്ടി ഉമ്മന്റെ സ്ഥാനാർഥിത്വവും, പ്രതിപക്ഷ നേതാവ് വി ഡി സതീശന്റെയും കെപിസിസി പ്രസിഡന്റ്‌ കെ സുധാകരന്റെയും നേതൃത്വത്തിൽ എണ്ണയിട്ട യന്ത്രം പോലെ പ്രവർത്തിച്ച കോൺഗ്രസ്സിന്റെയും യുഡിഫിന്റെയും സംഘടന സംവിധാനവുമാണ് ചാണ്ടി ഉമ്മന്റെ വൻ വിജയത്തിൽ കലാശിച്ചത്.
