ന്യൂഡല്‍ഹി: യു.കെ പ്രധാനമന്ത്രി ഋഷി സുനക്കും (Rishi Sunak) പ്രഥമ വനിത അക്ഷതാ മൂർത്തിയും (Akshatha Murthy) ഞായറാഴ്ച ഡൽഹിയിലെ അക്ഷർധാം (Akshardham temple) ക്ഷേത്രം സന്ദർശിക്കാൻ പദ്ധതിയിടുന്നു. അവരുടെ സന്ദർശനം കണക്കിലെടുത്ത് ദേവാലയത്തിന് പുറത്ത് സുരക്ഷാ സംവിധാനങ്ങൾ വർധിപ്പിച്ചിട്ടുണ്ട്.
“ബ്രിട്ടീഷ് പ്രധാനമന്ത്രി നാളെ എപ്പോൾ വരുമെന്ന് ഞങ്ങൾക്ക് അറിയില്ല, പക്ഷേ അദ്ദേഹം സന്ദർശിക്കുമെന്ന് ബ്രിട്ടീഷ് ഹൈക്കമ്മീഷനിൽ നിന്ന് ഞങ്ങൾക്ക് അറിയിപ്പുണ്ട്. അദ്ദേഹത്തിന്റെ വരവിനായി, ഞങ്ങൾ എല്ലാ തയ്യാറെടുപ്പുകളും സാധ്യമാക്കിയിട്ടുണ്ട്,” ക്ഷേത്രത്തിലെ ഒരു അഡ്മിനിസ്ട്രേറ്റർ ജ്യോതിന്ദ്ര ദവെ പറഞ്ഞു. ഞങ്ങൾ അദ്ദേഹത്തിന് ഒരു നോട്ട്ബുക്കും അക്ഷർധാം ക്ഷേത്രത്തിന്റെ മാതൃകയും സമ്മാനിക്കുമെന്നും ദവെ കൂട്ടിച്ചേര്‍ത്തു.
മുമ്പത്തെ ഒരു പരാമർശത്തിൽ, ഋഷി സുനക് സ്വയം “അഭിമാനിയായ ഹിന്ദു” ആണെന്നും, ഉടൻ ഒരു ക്ഷേത്രം സന്ദർശിക്കുമെന്ന് പറയുകയും ചെയ്തിരുന്നു.
ഞാൻ അഭിമാനിയായ ഒരു ഹിന്ദുവാണ്, അങ്ങനെയാണ് ഞാൻ വളർന്നത്. അടുത്ത കുറച്ച് ദിവസങ്ങളിൽ ഞാൻ ഇവിടെയായിരിക്കുമ്പോൾ, ഒരു ക്ഷേത്രം സന്ദർശിക്കുമെന്ന് ഞാൻ പ്രതീക്ഷിക്കുന്നു. താന്‍ രക്ഷാബന്ധൻ ആഘോഷിച്ചിട്ടുണ്ടെങ്കിലും, കൃഷ്‌ണ ജന്മാഷ്‌ഠമി കൃത്യമായി ആചരിക്കാൻ തനിക്ക് സമയമുണ്ടായിരുന്നില്ലെന്നും, ക്ഷേത്രത്തിൽ പോയി അത് പരിഹരിക്കാൻ താൻ പദ്ധതിയിട്ടിട്ടുണ്ടെന്നും സുനക് അവകാശപ്പെട്ടു.
ഇന്ന് (സെപ്തംബർ 9 ന്) ആരംഭിച്ച രണ്ട് ദിവസത്തെ ജി 20 ഉച്ചകോടിക്കായി ഋഷി സുനക്കും ഭാര്യ അക്ഷത മൂർത്തിയും വെള്ളിയാഴ്ച തലസ്ഥാന നഗരിയിൽ എത്തി. കേന്ദ്രമന്ത്രി അശ്വിനി കുമാർ ചൗബെ വിമാനത്താവളത്തിൽ അദ്ദേഹത്തെ സ്വീകരിച്ചു. ഒരു രുദ്രാക്ഷം, ഭഗവദ്ഗീതയുടെ ഒരു പകർപ്പ്, ഹനുമാൻ ചാലിസ എന്നിവ ചൗബെ സുനക്ക് സമ്മാനമായി നൽകിയിരുന്നു.
ഇന്ന് (ശനിയാഴ്ച) അദ്ദേഹവും പ്രധാനമന്ത്രി നരേന്ദ്ര മോദിയും സ്വകാര്യ കൂടിക്കാഴ്ച നടത്തിയിരുന്നു. കൂടിക്കാഴ്ചയ്ക്ക് ശേഷം പ്രധാനമന്ത്രി സോഷ്യൽ മീഡിയയിൽ പോസ്റ്റ് ചെയ്ത ഫോട്ടോകളിൽ സുനക് പ്രധാനമന്ത്രി മോദിയുമായി സംസാരിക്കുന്നതും ആലിംഗനം ചെയ്യുന്നതും കണ്ടു.
