കോട്ടയം: ബാങ്ക് വായ്പാ തിരിച്ചടവ് മുടങ്ങിയതിന്റെ പേരില്‍ ബാങ്കിന്റെ ഭീഷണി നേരിട്ട 50-കാരന്‍ കഴിഞ്ഞ ദിവസം ആത്മഹത്യ ചെയ്തതോടെ ബന്ധുക്കൾ മൃതദേഹവുമായി കോട്ടയം നഗരത്തിലെ സ്വകാര്യ ബാങ്കിന് മുന്നിൽ പ്രതിഷേധ പ്രകടനം നടത്തി.
അയ്മനം കുടയംപടിയിൽ ഫുട്‌വെയർ ഷോപ്പ് നടത്തുന്ന കെ സി ബിനുവിന്റെ മൃതദേഹം ഉച്ചയ്ക്ക് 12 മണിയോടെ നാഗമ്പടം കർണാടക ബാങ്ക് ശാഖയ്ക്ക് മുന്നിൽ വച്ചതോടെയാണ് സംഭവത്തിന്റെ ചുരുളഴിയുന്നത്. വായ്പാ തിരിച്ചടവ് മുടങ്ങിയതിന്റെ പേരിൽ ബാങ്ക് നിരന്തരം ഭീഷണിപ്പെടുത്തിയതാണ് ബിനുവിനെ ആത്മഹത്യക്ക് പ്രേരിപ്പിച്ചതെന്ന് ബന്ധുക്കൾ ആരോപിച്ചു.
ബിനു ബാങ്കിൽ നിന്ന് 5 ലക്ഷം രൂപ കടമെടുത്തിരുന്നു എന്നും, കഴിഞ്ഞ രണ്ട് മാസമായി തിരിച്ചടവ് മുടങ്ങിയെന്നും ഇവർ പറയുന്നു. ഇതേത്തുടർന്ന് ബാങ്കിലെ ഒരു ഉദ്യോഗസ്ഥൻ സ്ഥിരമായി ബിനുവിന്റെ കട സന്ദർശിക്കുകയും കുടിശ്ശിക എത്രയും വേഗം തീർക്കാൻ സമ്മർദം ചെലുത്തുകയും ചെയ്തിരുന്നു. കുടിശ്ശികയുടെ വലിയൊരു ഭാഗം ബിനു തിരിച്ചടച്ച ശേഷവും ഭീഷണി തുടർന്നു. “കുടിശ്ശിക ഉടൻ തിരിച്ചടയ്ക്കുമെന്ന് ബാങ്കിനെ ബോധ്യപ്പെടുത്താൻ പലതവണ ശ്രമിച്ചിട്ടും, ഞങ്ങളുടെ കടയിലെ മുഴുവൻ സ്റ്റോക്കും പിടിച്ചെടുക്കുമെന്ന് അവര്‍ ഭീഷണിപ്പെടുത്തി. ഇത് എന്റെ അച്ഛനെ കടുത്ത മാനസിക സമ്മർദ്ദത്തിലാക്കി,” ബിനുവിന്റെ മകള്‍ നന്ദന പറഞ്ഞു.
ബാങ്ക് മാനേജർ തന്റെ ജീവനക്കാരിൽ ഒരാളെ ഭീഷണിപ്പെടുത്താൻ അയച്ച് മണിക്കൂറുകൾക്ക് ശേഷമാണ് ബിനുവിനെ മരിച്ച നിലയിൽ കണ്ടെത്തിയത്. ഡെമോക്രാറ്റിക് യൂത്ത് ഫെഡറേഷൻ ഓഫ് ഇന്ത്യയുടെ സെൻട്രൽ കമ്മിറ്റി അംഗം ജെയ്ക് സി തോമസിന്റെ നേതൃത്വത്തിൽ ബാങ്കിലേക്ക് നടത്തിയ പ്രതിഷേധ മാർച്ച് അക്രമാസക്തമായി മാറിയതോടെ പ്രതിഷേധം ക്രമസമാധാന പ്രശ്നമായി. ജനക്കൂട്ടത്തെ പിരിച്ചുവിടാൻ പോലീസ് ബലം പ്രയോഗിച്ചതോടെ പ്രതിഷേധക്കാർ ചെറുക്കുകയും കല്ലേറ് നടത്തുകയും ചെയ്തു. വ്യാപാരി സംഘടനാ പ്രവർത്തകരും സ്ഥലത്തെത്തിയതോടെ സംഘർഷാവസ്ഥ ഉടലെടുത്തു.
കോട്ടയം നിയമസഭാംഗം തിരുവഞ്ചൂർ രാധാകൃഷ്ണനും സ്ഥലത്തെത്തി പോലീസുമായി ചർച്ച നടത്തി. ഒടുവിൽ പൊലീസ് സ്ഥിതിഗതികൾ നിയന്ത്രിച്ചുവെങ്കിലും ജനക്കൂട്ടം മുദ്രാവാക്യം വിളികളുമായി തുടർന്നു, ജില്ലാ കളക്ടറോ ജില്ലാ പോലീസ് മേധാവിയോ സ്ഥലത്തെത്തി ബാങ്ക് ജീവനക്കാർക്കെതിരെ നടപടിയെടുക്കണമെന്ന് ആവശ്യപ്പെട്ടു.
പ്രതിഷേധം ശക്തമായതോടെ മേഖലയിലുടനീളം ഗതാഗതം തടസ്സപ്പെട്ടു. ഉച്ചയ്ക്ക് ഒരു മണിക്ക് ശേഷം ജില്ലാ പോലീസ് മേധാവി കെ.കാർത്തിക് സ്ഥലത്തെത്തി ബാങ്കിനെതിരായ ആരോപണങ്ങൾ അന്വേഷിക്കുമെന്ന് ഉറപ്പ് നൽകിയതോടെയാണ് സംഘർഷത്തിന് അയവ് വന്നത്. ഇതനുസരിച്ച്, ചോദ്യം ചെയ്യലിന് ഹാജരാകാൻ ആവശ്യപ്പെട്ട് ബാങ്ക് മാനേജർക്ക് സമൻസ് അയച്ചു.
ആത്മഹത്യാ പ്രതിരോധ നമ്പർ: 0471-2552056
