വാഷിംഗ്ടണ്‍: വിദേശകാര്യ മന്ത്രി എസ്. ജയശങ്കറും യുഎസ് സ്റ്റേറ്റ് സെക്രട്ടറി ആന്റണി ജെ ബ്ലിങ്കെനും തമ്മിലുള്ള ഉഭയകക്ഷി കൂടിക്കാഴ്ചയ്ക്ക് മുന്നോടിയായി, കാനഡ വിഷയത്തിൽ വാഷിംഗ്ടൺ ഇതിനകം തന്നെ ഇന്ത്യയോട് ന്യൂഡൽഹിയിൽ നിലപാട് വ്യക്തമാക്കിയതായി യുഎസ് സ്റ്റേറ്റ് ഡിപ്പാർട്ട്മെന്റ് വക്താവ് മാത്യു മില്ലർ പറഞ്ഞു.
വൈറ്റ് ഹൗസിൽ നടത്തിയ വാർത്താ സമ്മേളനത്തിലാണ് അദ്ദേഹം ഇക്കാര്യം പറഞ്ഞത്. എന്നാല്‍, ജയശങ്കറും ബ്ലിങ്കനും തമ്മിലുള്ള കൂടിക്കാഴ്ചയിൽ എടുക്കുന്ന നിർദ്ദിഷ്ട വിഷയങ്ങളെക്കുറിച്ച് പ്രതികരിക്കാൻ മില്ലർ വിസമ്മതിച്ചു.
“ആ മീറ്റിംഗിൽ അദ്ദേഹം (ബ്ലിങ്കൻ) നടത്തുന്ന സംഭാഷണങ്ങൾ പ്രിവ്യൂ ചെയ്യാൻ ഞാൻ ആഗ്രഹിക്കുന്നില്ല. പക്ഷേ, ഞങ്ങൾ വ്യക്തമാക്കിയതുപോലെ, ഞങ്ങളുടെ ഇന്ത്യൻ പങ്കാളിയുമായി ആശയവിനിമയം നടത്തുകയും കനേഡിയൻ അന്വേഷണവുമായി സഹകരിക്കാൻ അവരെ പ്രോത്സാഹിപ്പിക്കുകയും ചെയ്തു, അത് ഇപ്പോഴും തുടരുന്നു,” മില്ലർ പറഞ്ഞു.
ഈ വർഷം ജൂണിൽ ഖാലിസ്ഥാൻ ഭീകരൻ ഹർദീപ് സിംഗ് നിജ്ജാറിനെ കൊലപ്പെടുത്തിയതിൽ ന്യൂഡൽഹിയുടെ പങ്കിനെക്കുറിച്ച് കനേഡിയൻ പ്രധാനമന്ത്രി ജസ്റ്റിൻ ട്രൂഡോ ആരോപിച്ചതിന് പിന്നാലെ ഇന്ത്യയും കാനഡയും തമ്മിലുള്ള ഗുരുതരമായ നയതന്ത്ര തർക്കത്തിന്റെ പശ്ചാത്തലത്തിലാണ് കൂടിക്കാഴ്ച.
ജൂൺ 18-ന് ബ്രിട്ടീഷ് കൊളംബിയയിലെ സറേയിലെ ഗുരുദ്വാരയുടെ പാർക്കിംഗ് ഗ്രൗണ്ടിൽ വെച്ച് മുഖംമൂടി ധരിച്ച രണ്ട് തോക്കുധാരികളാണ് കനേഡിയൻ പൗരനായ നിജ്ജാറിനെ വെടിവെച്ചത്. കൊലപാതകത്തിൽ ഇന്ത്യയുടെ പങ്കിനെക്കുറിച്ച് ഏജൻസികൾ “വിശ്വസനീയമായ ആരോപണങ്ങൾ” അന്വേഷിക്കുകയാണെന്ന് കഴിഞ്ഞ ആഴ്ച ട്രൂഡോ കനേഡിയൻ പാർലമെന്റിൽ പറഞ്ഞു.
ട്രൂഡോയുടെ അവകാശവാദങ്ങളെ “അസംബന്ധവും രാഷ്ട്രീയപ്രേരിതമാണെന്നും” വിശേഷിപ്പിച്ച ഇന്ത്യ, ഒട്ടാവയോട് ട്രൂഡോയുടെ അകാശവാദങ്ങളെ പിന്തുണയ്ക്കാൻ തെളിവുകൾ നൽകാൻ ആവശ്യപ്പെട്ടു. ആരോപണങ്ങൾ വലിയ നയതന്ത്ര തർക്കത്തിന് കാരണമായി, ഇരു രാജ്യങ്ങളും പരസ്പരം നടപടികൾ പ്രഖ്യാപിച്ചു. കനേഡിയൻ നയതന്ത്രജ്ഞനെ ഇന്ത്യ പുറത്താക്കുകയും കനേഡിയൻ പൗരന്മാർക്കുള്ള വിസ സേവനങ്ങൾ താൽക്കാലികമായി നിർത്തിവയ്ക്കുകയും ചെയ്തു.
മറ്റൊരു രാജ്യത്ത് കൊലപാതകങ്ങൾ നടത്തുന്നത് ഇന്ത്യാ ഗവൺമെന്റിന്റെ നയമല്ലെന്നും ട്രൂഡോയുടെ അവകാശവാദങ്ങളെ പിന്തുണയ്ക്കാൻ എന്തെങ്കിലും വിവരങ്ങൾ ഉണ്ടെങ്കിൽ അത് നൽകണമെന്നും ജയശങ്കർ ബുധനാഴ്ച പറഞ്ഞിരുന്നു.
അമേരിക്ക ഇതുവരെ നിഷ്പക്ഷമായ നിലപാട് സ്വീകരിക്കുകയും ഇന്ത്യയെ കുറ്റപ്പെടുത്തുന്നതിൽ നിന്ന് വിട്ടുനിൽക്കുകയും ചെയ്തു. എന്നാല്‍, കാനഡയുടെ ആരോപണങ്ങളിൽ യുഎസിന് അഗാധമായ ഉത്കണ്ഠയുണ്ടെന്നും സംഭവത്തിന്റെ നിജസ്ഥിതി അറിയാന്‍ വാഷിംഗ്ടൺ ആഗ്രഹിക്കുന്നുവെന്നും ബ്ലിങ്കെൻ പറഞ്ഞു.
