ഇസ്രായേൽ സൈന്യം ഗാസയിൽ ഒരു സമ്പൂർണ്ണ, ഏകോപിപ്പിച്ച കര, വ്യോമ, കടൽ ആക്രമണത്തിനുള്ള ഒരുക്കങ്ങളുടെ അവസാന ഘട്ടത്തിലാണ്. പതിനായിരക്കണക്കിന് സൈനികർ ഇതിനകം തന്നെ ഹമാസ് നിയന്ത്രിത മേഖലയുടെ അതിർത്തിക്ക് സമീപം തടിച്ചുകൂടിയിട്ടുണ്ട്. ഇസ്രായേൽ ഡിഫൻസ് ഫോഴ്‌സിന് (ഐഡിഎഫ്) ഗാസ നഗരം പിടിച്ചെടുക്കാനും ഫലസ്തീൻ ഇസ്ലാമിക് തീവ്രവാദ സംഘടനയായ ഹമാസിന്റെ നിലവിലെ നേതൃത്വത്തെ നശിപ്പിക്കാനും വ്യക്തമായ ഉത്തരവുകൾ നൽകിയിട്ടുണ്ട്.
മൂന്ന് മുതിർന്ന ഇസ്രായേൽ സൈനിക ഉദ്യോഗസ്ഥർ വിവരിച്ച ഇസ്രായേലിന്റെ കര ആക്രമണ പദ്ധതിയുടെ വർഗ്ഗീകരിക്കാത്ത വിശദാംശങ്ങൾ അനുസരിച്ച്, ഗാസയെ നിയന്ത്രിക്കുന്ന ഫലസ്തീൻ തീവ്രവാദ ഗ്രൂപ്പായ ഹമാസിന്റെ ഉന്നത രാഷ്ട്രീയ, സൈനിക നേതൃത്വത്തെ തുടച്ചുനീക്കുക എന്നതാണ് ദൗത്യത്തിന്റെ പ്രധാന ലക്ഷ്യം.
എന്നാല്‍, ഗാസ നഗരം പിടിച്ചെടുത്താൽ ഇസ്രായേൽ എന്ത് ചെയ്യുമെന്ന് സൈനിക ഉദ്യോഗസ്ഥർ അനിശ്ചിതത്വത്തിലാണെന്ന് റിപ്പോർട്ടുകളില്‍ പറയുന്നു. ഹമാസിന്റെ സൈനിക, രാഷ്ട്രീയ നേതൃത്വത്തെ തകർക്കുക എന്നതുകൊണ്ട് എന്താണ് ഉദ്ദേശിക്കുന്നതെന്ന് ഉദ്യോഗസ്ഥർ വിശദീകരിച്ചിട്ടില്ല.
ഗാസയിൽ കര, വ്യോമ, കടൽ ആക്രമണത്തിന് തയ്യാറെടുക്കുകയാണെന്ന് ഇസ്രായേൽ സൈന്യം ഔദ്യോഗികമായി സ്ഥിരീകരിച്ചിട്ടുണ്ടെങ്കിലും, ഇസ്രായേൽ ഗാസ നഗരം പിടിച്ചടക്കിയാൽ, ഹമാസിന്റെ വിശാലമായ ഭൂഗർഭ തുരങ്ക ശൃംഖല പൂർണ്ണമായും നശിപ്പിക്കപ്പെടുകയും ചെയ്യുമെന്ന് ഉറപ്പാക്കാൻ അവര്‍ കുറച്ചുകാലം അവിടെ തുടരുമെന്ന് ചില വിദഗ്ധർ വിശ്വസിക്കുന്നു.
പലസ്തീൻ ലിബറേഷൻ ഓർഗനൈസേഷനിൽ (പിഎൽഒ) ആധിപത്യം പുലർത്തുകയും വെസ്റ്റ് ബാങ്കിൽ ഭരിക്കുകയും ചെയ്തിരുന്ന ഫതഹിന് ഗാസയുടെ നിയന്ത്രണം നൽകുന്നത് ഇസ്രായേൽ പരിഗണിച്ചേക്കുമെന്ന് ചില ഊഹാപോഹങ്ങളുണ്ട്. എന്നാല്‍, ഇതുവരെ അതിന്റെ ഒരു സൂചനയും ദൃശ്യമാകുന്നില്ല.
ഫലസ്തീൻ രാഷ്ട്രീയ രംഗത്ത് ഹമാസും ഫതഹും പരസ്പരം രാഷ്ട്രീയ എതിരാളികളാണ്. ഇസ്രയേലിനെതിരെ ഹമാസ് സായുധ ചെറുത്തുനിൽപ്പ് പിന്തുടരുമ്പോൾ, അക്രമം അവസാനിപ്പിക്കാനുള്ള ചർച്ചകൾ ഫതഹ തിരഞ്ഞെടുത്തു.
ഹമാസിനെതിരായ ഇസ്രയേലിന്റെ യുദ്ധം മാസങ്ങളോളം രക്തരൂക്ഷിതമായ നഗര പോരാട്ടത്തിലേക്ക് നയിക്കുമെന്ന് ഉദ്യോഗസ്ഥർ സമ്മതിച്ചു. 2006-ൽ ലെബനൻ അധിനിവേശത്തിന് ശേഷം ഇസ്രായേൽ നടത്തുന്ന ഏറ്റവും വലിയ കര ഓപ്പറേഷനും 2008-ലെ ഗാസ സംഘർഷത്തിന് ശേഷമുള്ള ആദ്യ ആക്രമണവുമാണിത്.
സ്ത്രീകളും കുട്ടികളും വൃദ്ധരും പട്ടാളക്കാരും ഉൾപ്പെടെ 1,300-ലധികം ആളുകളെ കൊന്നൊടുക്കിയ ഹമാസ് തീവ്രവാദികൾ കഴിഞ്ഞയാഴ്ച ഇസ്രായേലിൽ വൻതോതിൽ ഭീകരാക്രമണം നടത്തിയതിന് ശേഷം ഹമാസിനെതിരെ ഇസ്രായേൽ യുദ്ധം പ്രഖ്യാപിക്കുകയും ഭൂമിയുടെ മുഖത്ത് നിന്ന് തുടച്ചുനീക്കുമെന്ന് പ്രതിജ്ഞയെടുക്കുകയും ചെയ്തു.
ഏകദേശം 1.1 മില്യൺ ഗാസ നിവാസികള്‍ വടക്ക് ഭാഗത്തുള്ള വീടുകൾ ഉപേക്ഷിച്ച് വാദി ഗാസയുടെ തെക്ക് ഭാഗത്തുള്ള സുരക്ഷിത പ്രദേശങ്ങളിലേക്ക് പലായനം ചെയ്യണമെന്ന് ഐഡിഎഫ് മുന്നറിയിപ്പ് നൽകിയിട്ടുണ്ട്. “വിനാശകരമായ മാനുഷിക പ്രത്യാഘാതങ്ങളെക്കുറിച്ച്” യുഎൻ മുന്നറിയിപ്പ് നൽകിയിട്ടും ഇസ്രായേലി സൈന്യം ശനിയാഴ്ച അവർക്ക് 24 മണിക്കൂർ പുറപ്പെടാനുള്ള സമയപരിധി നൽകി, ഞായറാഴ്ച അത് മൂന്ന് മണിക്കൂർ കൂടി നീട്ടി.
തങ്ങളുടെ യുദ്ധം ഹമാസിനെതിരെയാണെന്നും ഗാസൻ സിവിലിയന്മാർക്കെതിരെയല്ലെന്നും, തങ്ങളേയും കുടുംബാംഗങ്ങളേയും രക്ഷിക്കാൻ ഇത് അവർക്ക് അവസരം നൽകുന്നുവെന്നും ഇസ്രായേൽ സൈന്യം കൂട്ട ഒഴിപ്പിക്കൽ ഉത്തരവുകളെ ന്യായീകരിച്ചു.
