ഒട്ടാവ: ഇന്ത്യയിലെ ഹൈക്കമ്മീഷനിൽ നിന്ന് 41 നയതന്ത്ര ഉദ്യോഗസ്ഥരെ പുറത്താക്കിയതായി കനേഡിയൻ സർക്കാർ വെള്ളിയാഴ്ച അറിയിച്ചതിനു പിന്നാലെ, ബെംഗളൂരു, ചണ്ഡീഗഡ്, മുംബൈ എന്നിവിടങ്ങളിലെ കനേഡിയന്‍ ഹൈക്കമ്മീഷന്‍ വിസ സേവനവും മറ്റു പ്രവര്‍ത്തനങ്ങളും താൽക്കാലികമായി നിർത്തി വെച്ചു. ഇന്ത്യയിൽ കനേഡിയന്‍ വിസ അനുവദിക്കുന്ന ജോലി ഇനി ന്യൂഡൽഹിയിലെ ഹൈക്കമ്മീഷനിലായിരിക്കും നടക്കുക.
ഖാലിസ്ഥാൻ അനുകൂല ഭീകരൻ ഹർദീപ് സിംഗ് നിജ്ജാറിന്റെ കൊലപാതകവുമായി ബന്ധപ്പെട്ട് ഇന്ത്യയും കാനഡയും തമ്മിൽ നിലനിൽക്കുന്ന നയതന്ത്ര തർക്കം അവസാനിക്കുന്നതായി തോന്നുന്നില്ല. ഇന്ത്യയുടെ സമ്മർദത്തെത്തുടർന്ന് കാനഡ ഒടുവിൽ നയതന്ത്രജ്ഞരെ ഹൈക്കമ്മീഷനിൽ നിന്ന് മാറ്റാനുള്ള നടപടികൾ ആരംഭിച്ചു. ഇന്ത്യയിലെ ഹൈക്കമ്മീഷനിൽ നിന്ന് 41 നയതന്ത്ര ഉദ്യോഗസ്ഥരെ നീക്കം ചെയ്തതായി കനേഡിയൻ സർക്കാർ വെള്ളിയാഴ്ച അറിയിച്ചു. ബംഗളൂരു, ചണ്ഡീഗഡ്, മുംബൈ എന്നിവിടങ്ങളിലെ ഹൈക്കമ്മീഷൻ കേന്ദ്രങ്ങളിൽ വിസ സേവനം താൽക്കാലികമായി നിർത്തിവച്ചതായും അറിയിച്ചിട്ടുണ്ട്.
ഇന്ത്യയിൽ വിസ അനുവദിക്കുന്ന ജോലി ഇനിമുതല്‍ ന്യൂഡൽഹിയിലെ കനേഡിയന്‍ ഹൈക്കമ്മീഷനിലായിരിക്കും നടക്കുക. ഇതുമൂലം, കനേഡിയൻ വിസ തേടുന്നവര്‍ക്ക് വളരെയധികം ബുദ്ധിമുട്ടുകൾ നേരിടേണ്ടിവരും. നയതന്ത്ര ഉദ്യോഗസ്ഥരെ തിരിച്ചു വിളിക്കണമെന്ന ഇന്ത്യയുടെ ആവശ്യം അന്താരാഷ്ട്ര നിയമങ്ങളുടെ ലംഘനമാണെന്ന് കാനഡ ആരോപിച്ചു. എന്നാല്‍, ഇന്ത്യൻ വിദേശകാര്യ മന്ത്രാലയം ഈ കനേഡിയൻ ആരോപണങ്ങൾ പൂർണ്ണമായും തള്ളിക്കളയുക മാത്രമല്ല, കനേഡിയൻ നയതന്ത്രജ്ഞർ ഇന്ത്യയുടെ ആഭ്യന്തര കാര്യങ്ങളിൽ ഇടപെടുന്നുവെന്നും ആവർത്തിച്ചു.
കഴിഞ്ഞ മാസം മുതൽ ഇന്ത്യയും കാനഡയും തമ്മിൽ നയതന്ത്ര തർക്കം നിലനിൽക്കുന്നുണ്ട്. കനേഡിയൻ പൗരനായ (ഖാലിസ്ഥാൻ അനുകൂല ഭീകരൻ) ഹർദീപ് സിംഗ് നിജ്ജാറിനെ കൊലപ്പെടുത്തിയത് ഇന്ത്യൻ ഏജന്റുമാരാണെന്ന് ആരോപിച്ച് പ്രധാനമന്ത്രി ജസ്റ്റിൻ ട്രൂഡോ പാർലമെന്റിൽ നടത്തിയ സെൻസേഷണൽ പ്രസ്താവനയാണ് ഈ വിവാദത്തിന് കാരണമായത്. മറ്റ് ആഗോള നേതാക്കളുമായുള്ള ഉഭയകക്ഷി ചർച്ചകളിലും അദ്ദേഹം ഈ വിഷയം ഉന്നയിക്കുന്നുണ്ട്.
കനേഡിയൻ പൗരന്മാർക്ക് വിസ നൽകാൻ ഇന്ത്യ വിസമ്മതിച്ചു
അതേസമയം, കനേഡിയൻ പൗരന്മാർക്ക് വിസ നൽകാൻ ഇന്ത്യ വിസമ്മതിക്കുക മാത്രമല്ല, വിയന്ന കരാർ പ്രകാരം ഇന്ത്യയിലെ ഹൈക്കമ്മീഷനിൽ നിന്നുള്ള നയതന്ത്ര ഉദ്യോഗസ്ഥരുടെ എണ്ണം കുറയ്ക്കാൻ കാനഡയോട് ആവശ്യപ്പെടുകയും ചെയ്തു. ഒട്ടാവയിൽ ഇന്ത്യൻ ഉദ്യോഗസ്ഥരെ നിയമിക്കുന്നത് പോലെ കനേഡിയൻ ഓഫീസർമാരെ ന്യൂഡൽഹിയിലും നിയമിക്കണമെന്നാണ് ഇന്ത്യ പറയുന്നത്.
2023 ഒക്ടോബർ 20 മുതൽ 21 കനേഡിയൻ നയതന്ത്രജ്ഞർക്കും അവരുടെ ബന്ധുക്കൾ ഒഴികെയുള്ള മറ്റെല്ലാ നയതന്ത്രജ്ഞർക്കും നയതന്ത്ര പ്രതിരോധം നൽകുമെന്ന് ഇന്ത്യ ഔദ്യോഗികമായി അറിയിച്ചതായി കനേഡിയൻ വിദേശകാര്യ മന്ത്രി മെലാനി ജോളി വ്യാഴാഴ്ച രാത്രി പറഞ്ഞു. അതിനർത്ഥം 41 കനേഡിയൻ നയതന്ത്രജ്ഞർക്കും അവരുടെ ആശ്രിതർക്കും നൽകിയിട്ടുള്ള നയതന്ത്രപ്രതിരോധം ഇപ്പോൾ നീക്കം ചെയ്യുമെന്നാണ്. ഈ നയതന്ത്രജ്ഞരെയും അവരുടെ ബന്ധുക്കളെയും ഇന്ത്യയുടെ തീരുമാനത്തിന്റെ പ്രത്യാഘാതം കണക്കിലെടുത്ത്, ഇന്ത്യയിൽ നിന്ന് സുരക്ഷിതമായി നീക്കം ചെയ്തു എന്നും മന്ത്രി പറഞ്ഞു.
ഒരു രാജ്യവും നയതന്ത്ര പ്രതിരോധത്തെ അനാദരിക്കരുതെന്നും, ഏകപക്ഷീയമായി നീക്കം ചെയ്യാൻ തീരുമാനിക്കരുതെന്നും പറഞ്ഞു. ഈ തീരുമാനം ഇന്ത്യയിലെ കനേഡിയൻ ഹൈക്കമ്മീഷൻ ഇന്ത്യൻ പൗരന്മാർക്ക് നൽകുന്ന സേവനത്തെ ബാധിക്കും. ഇന്ത്യയുടെ ഈ തീരുമാനം അന്യായമാണെന്നും തർക്കം വഷളാക്കാനേ ഉപകരിക്കൂ എന്നും കനേഡിയന്‍ വിദേശകാര്യ മന്ത്രി പറഞ്ഞു.
കനേഡിയൻ പൗരന്മാര്‍ക്ക് ഹൈക്കമ്മീഷന്റെ ഉപദേശം
മറുവശത്ത്, ചണ്ഡീഗഡ്, ബെംഗളൂരു, മുംബൈ എന്നിവിടങ്ങളിലേക്ക് യാത്ര ചെയ്യുമ്പോൾ കൂടുതൽ മുൻകരുതലുകൾ എടുക്കണമെന്ന് കനേഡിയൻ ഹൈക്കമ്മീഷൻ കനേഡിയന്‍ പൗരന്മാര്‍ക്ക് നിര്‍ദ്ദേശം നല്‍കിയിട്ടുണ്ട്. ഈ നഗരങ്ങളിൽ അവരെ സഹായിക്കാൻ കനേഡിയൻ നയതന്ത്രജ്ഞർ ലഭ്യമല്ല. കൂടാതെ, ഈ നഗരങ്ങളിൽ വ്യക്തിഗത കോൺസുലാർ സേവനവും ലഭ്യമാകില്ല. ഏത് തരത്തിലുള്ള സേവനത്തിനും അവർ ന്യൂഡൽഹിയിലെ ഹൈക്കമ്മീഷനെ ബന്ധപ്പെടണം.
കാനഡയിൽ നിന്ന് ഇത്തരം പ്രസ്താവനകൾ വന്നതിന് പിന്നാലെ ഇന്ത്യൻ വിദേശകാര്യ മന്ത്രാലയം പുറത്തിറക്കിയ പ്രസ്താവനയിൽ നയതന്ത്രബന്ധം സംബന്ധിച്ച വിയന്ന ഉടമ്പടി പ്രകാരമാണ് മേൽപ്പറഞ്ഞ തീരുമാനമെടുത്തതെന്നു പറയുന്നു. നയതന്ത്ര ഉദ്യോഗസ്ഥരുടെ എണ്ണവുമായി ബന്ധപ്പെട്ട് കഴിഞ്ഞ മാസം മുതൽ ഇന്ത്യ കനേഡിയൻ സർക്കാരുമായി സംസാരിച്ചിരുന്നുവെന്നും പറഞ്ഞു.
നയതന്ത്രജ്ഞരെ ഏകപക്ഷീയമായി നീക്കം ചെയ്യാൻ സമ്മർദം സൃഷ്ടിച്ചിട്ടില്ല
കനേഡിയൻ നയതന്ത്രജ്ഞരെ പുറത്താക്കാൻ ഇന്ത്യ ഏകപക്ഷീയമായി സമ്മർദ്ദം ചെലുത്തിയെന്ന കാനഡയുടെ ആരോപണം വിദേശകാര്യ മന്ത്രാലയ ഉദ്യോഗസ്ഥർ തള്ളി. ഒക്ടോബർ 10-നകം നയതന്ത്ര ഉദ്യോഗസ്ഥരുടെ എണ്ണം കുറയ്ക്കണമെന്ന് കാനഡയോട് ഒരു മാസം മുമ്പ് പറഞ്ഞിരുന്നതായി അധികൃതർ പറഞ്ഞു. കാനഡയുടെ ആവശ്യപ്രകാരം അത് ഒക്ടോബർ 20ലേക്ക് മാറ്റി. ഏതൊക്കെ നയതന്ത്ര ഉദ്യോഗസ്ഥരെയാണ് മാറ്റേണ്ടതെന്ന കാര്യത്തിലും കാനഡയുമായി കൂടിയാലോചിച്ചാണ് തീരുമാനമെടുത്തത്. കൂടാതെ, ന്യൂഡൽഹിയിലെയും ഒട്ടാവ ഹൈക്കമ്മീഷനിലെയും നയതന്ത്ര ഉദ്യോഗസ്ഥരുടെ എണ്ണം കുറയ്ക്കുന്നതിനെക്കുറിച്ച് മാത്രമാണ് ഇന്ത്യ സംസാരിച്ചത്. അതിനാൽ, ഇന്ത്യയിലെ മറ്റ് നഗരങ്ങളിൽ നിയമിച്ചിരിക്കുന്ന നയതന്ത്രജ്ഞരെ നീക്കം ചെയ്യാൻ കാനഡയോട് ആവശ്യപ്പെട്ടതായി പറയുന്നത് തെറ്റാണെന്നും വിദേശകാര്യ മന്ത്രാലയം പറഞ്ഞു
