ഇസ്രായെല്‍ പ്രധാനമന്ത്രി ബെഞ്ചമിൻ നെതന്യാഹുവിനെതിരെ നടപടിയെടുക്കണമെന്ന് ആവശ്യപ്പെട്ട് ഫലസ്തീൻ അനുകൂലികൾ ഹേഗിലെ അന്താരാഷ്ട്ര ക്രിമിനൽ കോടതി പരിസരത്ത് പ്രകടനം നടത്തി
“നെതന്യാഹു ഒരു യുദ്ധക്കുറ്റവാളിയാണ്” എന്നെഴുതിയ ബാനർ വഹിച്ചുകൊണ്ട് തിങ്കളാഴ്ച ഉച്ചതിരിഞ്ഞ്, എക്‌സ്‌റ്റിൻക്ഷൻ റിബലിയൻ സ്‌പിൻ-ഓഫ് ജസ്റ്റിസ് നൗവിൽ നിന്നുള്ള പ്രവർത്തകർ ഹേഗ് ആസ്ഥാനമായുള്ള കോടതിക്ക് മുന്നില്‍ ഒത്തുകൂടി.
“എല്ലായിടത്തും അടിച്ചമർത്തപ്പെട്ട ആളുകൾക്കൊപ്പം സംഘടന നിലകൊള്ളുന്നു, കാലാവസ്ഥാ പ്രതിസന്ധി സൃഷ്ടിക്കുന്ന അതേ അടിച്ചമർത്തൽ സംവിധാനമാണ് ഈ പ്രതിസന്ധിക്ക് കാരണമാകുന്നത്,” എന്ന് ഗ്രൂപ്പിന്റെ വക്താവ് ഓട്ടിസ് പറഞ്ഞു.
കാലാവസ്ഥാ വ്യതിയാനത്തിനെതിരായ പ്രചാരണത്തിനായി ആദ്യം രൂപീകരിച്ച ആക്ടിവിസ്റ്റ് ഗ്രൂപ്പിന്റെ ഡച്ച് ബ്രാഞ്ച് ഒക്ടോബർ 7 മുതൽ മറ്റ് പലസ്തീൻ അനുകൂല പ്രവർത്തനങ്ങൾ നടത്തുന്നു. ഐസിസി കെട്ടിടത്തിലേക്കുള്ള പ്രവേശനം തടഞ്ഞ 19 പ്രവർത്തകരെ അൽപ്പസമയത്തേക്ക് അറസ്റ്റ് ചെയ്തു.
“പ്രകടനം ഐസിസിയുടെ സാധാരണ പ്രവർത്തനങ്ങൾക്ക് ഒരു തടസ്സവും ഉണ്ടാക്കിയില്ല. ഐസിസി സുരക്ഷ പോലീസുമായി ചേർന്ന് സ്ഥിതിഗതികൾ പരിഹരിച്ചു,” ഐസിസി വക്താവ് സോണിയ റോബ്ല പറഞ്ഞു.
നെതന്യാഹുവുമായി കൂടിക്കാഴ്ച നടത്താൻ ഇസ്രായേലിലെത്തിയ ഡച്ച് പ്രധാനമന്ത്രി മാർക്ക് റുട്ടെയെയും പ്രതിഷേധക്കാർ അപലപിച്ചു. ഗാസയിൽ ഇസ്രായേൽ നടത്തുന്ന ആക്രമണത്തിന് അമേരിക്കയും പാശ്ചാത്യ സഖ്യകക്ഷികളും നിരുപാധിക പിന്തുണ അറിയിച്ചതായും പ്രതിഷേധക്കാര്‍ പറഞ്ഞു.
2014 മുതൽ ഗാസ മുനമ്പിൽ ഇസ്രായേൽ അധികാരികൾ നടത്തിയ അതിക്രമങ്ങളെക്കുറിച്ച് ഐസിസി അന്വേഷിക്കുന്നുണ്ട്. നിലവിലെ യുദ്ധവും അന്വേഷണത്തിൽ ഉൾപ്പെടുന്നു.
ഫലസ്തീനിലെ ഇസ്രായേൽ അധിനിവേശ പ്രദേശങ്ങളിലേക്ക് ഹമാസ് ബഹുമുഖ ഓപ്പറേഷൻ ആരംഭിച്ച ഒക്ടോബർ 7 മുതൽ ഗാസയിൽ ഇസ്രായേൽ നടത്തിയ വ്യോമാക്രമണത്തിൽ 5,000-ത്തിലധികം ആളുകൾ കൊല്ലപ്പെടുകയും 15,000-ത്തിലധികം പേർക്ക് പരിക്കേൽക്കുകയും ചെയ്തു.
2.3 ദശലക്ഷത്തിലധികം ആളുകൾ വസിക്കുന്ന, ജനസാന്ദ്രത കൂടുതലുള്ള മേഖലയിൽ 1.4 ദശലക്ഷത്തോളം ആളുകളെ മാറ്റിപ്പാർപ്പിച്ച്, ആശുപത്രികൾ, സ്കൂളുകൾ, പള്ളികൾ, ആരാധനാലയങ്ങള്‍ എന്നിവയുൾപ്പെടെയുള്ള ഒത്തുചേരൽ സ്ഥലങ്ങൾ ലക്ഷ്യമിട്ടാണ് ഗാസയിലെ ഇസ്രായേൽ ആക്രമണം.
