തിരുവനന്തപുരം: വയനാട് ജില്ലയിലെ ബത്തേരി, മാനന്തവാടി മേഖലകളിൽ നിന്ന് ശേഖരിച്ച വവ്വാലുകളുടെ സാമ്പിളുകളിൽ നിപ വൈറസിന്റെ സാന്നിധ്യം ഇന്ത്യൻ കൗൺസിൽ ഓഫ് മെഡിക്കൽ റിസർച്ച് (ഐസിഎംആർ) ഔദ്യോഗികമായി സ്ഥിരീകരിച്ചു. മുൻ വർഷങ്ങളിൽ കണ്ടെത്തിയ അതേ തരം വൈറസ് ഈ വർഷവും കണ്ടെത്തിയെന്ന് ആരോഗ്യമന്ത്രി വീണാ ജോർജ്ജ് അറിയിച്ചു.
വൈറസ് ജനിതകമാറ്റങ്ങളൊന്നും പ്രകടിപ്പിച്ചിട്ടില്ലെന്ന് ആരോഗ്യമന്ത്രി പറഞ്ഞു. വയനാട്ടിലെ വവ്വാലുകളിൽ നിപ വൈറസ് ബാധ സ്ഥിരീകരിച്ചത് മേഖലയിൽ നടത്തിയ വ്യാപകമായ അന്വേഷണത്തിനൊടുവിലാണ് ഈ നിർണായക കണ്ടെത്തലിൽ കലാശിച്ചത്. ആരോഗ്യ വകുപ്പ് ജാഗ്രത സ്വീകരിക്കുന്നുവെന്ന് മാത്രമേ ഉള്ളൂ. നിലവിൽ ആശങ്കപ്പെടേണ്ട സാഹചര്യമില്ല. പൊതുബോധ സൃഷ്‌ടിയുടെ ഭാഗമായ ജാഗ്രത മുന്നറിയിപ്പ് മാത്രമാണിതെന്നും മന്ത്രി വ്യക്തമാക്കി.
പ്രദേശത്ത് അടിയന്തിരമായി ഒരു കാരണവുമില്ലെന്ന് ഉദ്യോഗസ്ഥർ ഊന്നിപ്പറയുന്നു. കഠിനമായ ശ്വാസകോശ സംബന്ധമായ രോഗങ്ങളുള്ള വ്യക്തികളുമായി ഇടപെടുമ്പോൾ ഉചിതമായ മുൻകരുതലുകൾ എടുക്കുന്നുണ്ടെന്ന് ഉറപ്പാക്കാൻ എല്ലാ ആരോഗ്യ പ്രവർത്തകർക്കും അവശ്യ പരിശീലനം നൽകാനുള്ള പദ്ധതിയും ആരോഗ്യമന്ത്രി വെളിപ്പെടുത്തി.
അതേസമയം, കോഴിക്കോട് മെഡിക്കൽ കോളജിൽ കേരള വൺ ഹെൽത്ത് സെൻ്റർ ഫോർ നിപ റിസർച്ച് നാളെ (ഒക്‌ടോബര്‍ 26) മുതൽ പ്രവർത്തനമാരംഭിക്കും. ജില്ലാ കലക്‌ടറുടെ നേതൃത്വത്തിലായിരിക്കും ഇതിന്‍റെ പ്രവർത്തനം. ഭാവിയിൽ ഇത് റിസർച്ച് സെന്‍റർ ആയി ഉയർത്താനാണ് ആലോചിക്കുന്നത്. ഇൻകുബേഷൻ പിരീഡിന്‍റെ 42-ാം ദിവസം നാളെ പൂർത്തിയാകും. ആഗോള തലത്തിൽ തന്നെ 70- 90% വരെ മരണ നിരക്ക് ഉള്ള നിപയെ 33% മരണ നിരക്കിൽ നിർത്താൻ സാധിച്ചു. രോഗം ആദ്യം തന്നെ കണ്ടുപിടിക്കാൻ കഴിഞ്ഞതിനാലാണ് വ്യാപനം കൃത്യമായി നിയന്ത്രിക്കാനായത്. 2019, 2020, 2023ലെയും വൈറസ് സമാനമാണ്. വൈറസിന് ജനിതക വ്യതിയാനം വന്നിട്ടില്ലെന്നും മന്ത്രി പറഞ്ഞു.
പ്രതിപക്ഷ നേതാവ് വി ഡി സതീശൻ ഉത്തരവാദിത്തത്തോടെ കാര്യങ്ങൾ കാണുന്നില്ലെന്ന് മന്ത്രി പറഞ്ഞു. സർക്കാർ ആശുപത്രിയിൽ കാലാവധി കഴിഞ്ഞ മരുന്ന് മെഡിക്കൽ സർവീസ് കോർപ്പറേഷൻ വിതരണം ചെയ്‌തുവെന്ന സിഎജി റിപ്പോർട്ടുമായി ബന്ധപ്പെട്ട് സതീശൻ നടത്തിയ പ്രസ്‌താവനയിൽ പ്രതികരിക്കുകയായിരുന്നു മന്ത്രി. ഒരു സംവിധാനത്തെ മുഴുവൻ ആക്ഷേപിച്ചു കൊണ്ടുള്ള പ്രസ്‌താവന പ്രതിപക്ഷ നേതാവ് നടത്തരുതായിരുന്നുവെന്ന് വീണ ജോർജ് വാർത്താ സമ്മേളനത്തിൽ പറഞ്ഞു. സിഎജി റിപ്പോർട്ട് ഡ്രാഫ്റ്റ് മാത്രമാണ്. സാധ്യത എന്നാണ് റിപ്പോർട്ടിലെ പരാമർശം.
2016-17 മുതൽ 21-22 സാമ്പത്തിക വർഷം വരെയുള്ള റിപ്പോർട്ടാണിത്. സിഎജി വിശദാംശങ്ങൾ ചോദിച്ചിരുന്നു. ആരോഗ്യ വകുപ്പ് മറുപടി നൽകിയ ശേഷം മാത്രമേ അന്തിമ റിപ്പോർട്ട് വരൂ. ജനങ്ങളുടെ മനസിൽ ആശങ്കയുണ്ടാക്കുന്ന നടപടിയാണ് പ്രതിപക്ഷ നേതാവിന്‍റെ ഭാഗത്ത്‌ നിന്നുണ്ടായതെന്നും മന്ത്രി പറഞ്ഞു.
