ഗാസ: ഫലസ്തീനിയൻ പ്രതിശ്രുത വധു സുവാർ സാഫി, വിവാഹശേഷം വെള്ളവസ്ത്രം ധരിച്ച് അഹമ്മദുമായി ജീവിതം പങ്കിടാൻ കാത്തിരിക്കുകയായിരുന്നു. എന്നാല്‍, ഹമാസ് ഭരിക്കുന്ന ഗാസ മുനമ്പിൽ ഇസ്രായേൽ വ്യോമാക്രമണം നടത്തിയതിനെത്തുടർന്ന് അഭയാർത്ഥി ക്യാമ്പിലാണ് അവൾ ഇപ്പോള്‍ താമസിക്കുന്നത്.
“എല്ലാവരും എന്നോട് പറയുകയായിരുന്നു, ഇത് ശരിയാണ്, വിശ്വാസമുണ്ടാകണം, ഇതാണ് ഞങ്ങളുടെ വിധി, ഞങ്ങൾ ഇത് അംഗീകരിക്കണം,” സുവാര്‍ പറഞ്ഞു. ആ സന്തോഷം അനുഭവിക്കാൻ ഞങ്ങൾക്ക് ഭാഗ്യം ലഭിച്ചില്ല എന്നും അവര്‍ പറഞ്ഞു.
വടക്കൻ ഗാസ മുനമ്പിൽ നിന്നുള്ള സാഫിയും (30) കുടുംബവും ഇപ്പോൾ പലായനം ചെയ്ത് തെക്കൻ ഗാസയിലെ ഖാൻ യൂനിസിലെ യുഎൻ സൈറ്റിലെ ടെന്റിലാണ് താമസിക്കുന്നത്. ഖാൻ യൂനിസിൽ നിന്നുള്ള പ്രതിശ്രുത വരന്‍ അഹമ്മദ് സഫി ഇപ്പോഴും കുടുംബത്തോടൊപ്പമാണ് താമസിക്കുന്നത്, സംഘർഷം കാരണം ഇരുവരും പരസ്പരം കാണുന്നത് അപൂർവമാണ്.
ഒക്ടോബർ 19-നായിരുന്നു ഇവരുടെ വിവാഹം നിശ്ചയിച്ചിരുന്നത്.
സംഘർഷം പൊട്ടിപ്പുറപ്പെട്ടപ്പോൾ, തന്റെ പ്രതിശ്രുത വധുവിനെയും അവളുടെ കുടുംബത്തെയും വടക്ക് നിന്ന് തെക്കോട്ട് മാറ്റാൻ താൻ ശ്രമിച്ചുവെന്ന് അഹമ്മദ് പറഞ്ഞു. ഗാസ സിറ്റിയിലെ ഫലസ്തീനികളെ തെക്കോട്ട് നീങ്ങാൻ ഇസ്രായേൽ പ്രേരിപ്പിച്ചിരുന്നു, കാരണം അത് സുരക്ഷിതമാണ്, പക്ഷേ എൻക്ലേവിലുടനീളം വ്യോമാക്രമണം ഉണ്ടായി. “അവസാനം അവരെ ഇവിടെ എത്തിക്കാൻ ഞങ്ങൾക്ക് ഒരു കാർ ലഭിച്ചപ്പോഴും, അവർ ഓടിപ്പോകുന്നതിനിടയിൽ വ്യോമാക്രമണം ഉണ്ടായി,” അദ്ദേഹം പറഞ്ഞു.
“എല്ലാ യുവാക്കളേയും പോലെ തന്നെ ഞാന്‍ ഈ വിവാഹത്തിനും ഈ ദിവസത്തിനും വേണ്ടി അക്ഷമയോടെ കാത്തിരിക്കുകയായിരുന്നു. ഒക്ടോബർ 19 ആഹ്ലാദകരമായ ഒരു ദിവസത്തിൽ നിന്ന് ദുഃഖവും നാശവും മരണവും നിറഞ്ഞ ഒരു ദുരന്തമായി മാറി,” അദ്ദേഹം പറഞ്ഞു.
2.3 മില്യൺ ആളുകളുള്ള ലോകത്തിലെ ഏറ്റവും ജനസാന്ദ്രതയുള്ള സ്ഥലങ്ങളിലൊന്നായ ദരിദ്ര ഗാസയിൽ വിവാഹങ്ങൾ സാധാരണയായി ഒരു ഭാഗ്യമായി കരുതുന്ന സ്ഥലമാണ്. കാരണം, നിരവധി ആളുകൾ തൊഴിലില്ലാത്തവരും വിവാഹം കഴിക്കാൻ കഴിയാത്തവരുമാണ്.
2,704 കുട്ടികൾ ഉൾപ്പെടെ ഒക്ടോബർ 7 മുതൽ ഇസ്രായേൽ ബോംബാക്രമണത്തിൽ 6,546 ഫലസ്തീനികൾ കൊല്ലപ്പെട്ടതായി ഗാസയിലെ ആരോഗ്യ മന്ത്രാലയം ബുധനാഴ്ച പ്രസ്താവനയിൽ പറഞ്ഞു.
