ഗാസയിൽ “മനുഷ്യരാശിക്കെതിരായ കുറ്റകൃത്യങ്ങൾ” നടത്തുന്നുവെന്ന് ആരോപിച്ച് ബൊളീവിയ സർക്കാർ ഇസ്രായേലുമായുള്ള നയതന്ത്രബന്ധം വിച്ഛേദിച്ചു, ഹമാസ് പോരാളികൾക്കെതിരായ ഇസ്രായേൽ സൈനിക ആക്രമണത്തെ വിമർശിച്ച ചിലിയും കൊളംബിയയും ഇസ്രായേലിലെ തങ്ങളുടെ സ്ഥാനപതികളെ തിരിച്ചുവിളിച്ചു.
ഗാസ മുനമ്പിൽ നടക്കുന്ന ആക്രമണാത്മകവും ആനുപാതികമല്ലാത്തതുമായ ഇസ്രായേൽ സൈനിക ആക്രമണത്തെ നിരസിച്ചും അപലപിച്ചുമാണ് ബൊളീവിയ ഇസ്രായേൽ രാഷ്ട്രവുമായുള്ള നയതന്ത്ര ബന്ധം വിച്ഛേദിക്കാൻ തീരുമാനിച്ചതെന്ന് ബൊളീവിയയുടെ ഡെപ്യൂട്ടി വിദേശകാര്യ മന്ത്രി ഫ്രെഡി മമാനി വാർത്താ സമ്മേളനത്തിൽ പറഞ്ഞു.
ഗാസ മുനമ്പിൽ ഇസ്രായേൽ നടത്തിയ അന്താരാഷ്ട്ര മാനുഷിക നിയമങ്ങളുടെ അസ്വീകാര്യമായ ലംഘനങ്ങളുടെ പശ്ചാത്തലത്തിലാണ് ചിലി തങ്ങളുടെ അംബാസഡറെ തിരിച്ചുവിളിക്കാൻ തീരുമാനിച്ചതെന്ന് ദക്ഷിണ അമേരിക്കൻ രാജ്യത്തിന്റെ വിദേശകാര്യ മന്ത്രാലയം പ്രസ്താവനയിൽ പറഞ്ഞു.
കൊളംബിയൻ പ്രസിഡന്റ് ഗുസ്താവോ പെട്രോയും ഇസ്രയേലിലെ രാജ്യത്തിന്റെ അംബാസഡറെ തിരിച്ചുവിളിക്കുന്നതായി പ്രഖ്യാപിച്ചു. “ഇസ്രായേൽ പലസ്തീൻ ജനതയെ കൂട്ടക്കൊല ചെയ്യുന്നത് തടഞ്ഞില്ലെങ്കിൽ, ഞങ്ങൾക്ക് അവിടെ തുടരാനാവില്ല,” പെട്രോ എക്‌സിൽ എഴുതി.
ബൊളീവിയ, ചിലി, കൊളംബിയ എന്നിവിടങ്ങളിൽ ഇടതുപക്ഷ സർക്കാരുകളാണുള്ളത്.
ഫലസ്തീൻ ജനതയ്‌ക്കെതിരെ ഗാസ മുനമ്പിൽ ഇസ്രായേൽ മനുഷ്യത്വത്തിനെതിരായ കുറ്റകൃത്യങ്ങൾ ചെയ്യുകയാണെന്ന് ബൊളീവിയൻ പ്രസിഡൻസിയുടെ ചുമതലയുള്ള വിദേശകാര്യ മന്ത്രി മരിയ നെല പ്രദ ആരോപിച്ചു.
“ഗാസ മുനമ്പിലെ ആക്രമണങ്ങൾ അവസാനിപ്പിക്കാൻ അവർ ഇസ്രായേലിനോട് ആഹ്വാനം ചെയ്തു. ഇസ്രായേലിന്റെ മനുഷ്യത്വരഹിതമായ നടപടി ഇതിനോടകം ആയിരക്കണക്കിന് സിവിലിയൻ മരണങ്ങൾക്കും ഫലസ്തീനികളുടെ നിർബന്ധിത നാടുകടത്തലിനും കാരണമായി,” പ്രസ്താവനയില്‍ പറഞ്ഞു.
ഗാസ മുനമ്പിൽ മാനുഷിക സഹായം നൽകുന്ന അന്താരാഷ്ട്ര സന്നദ്ധ സംഘടനകളോട് ഇസ്രായേൽ ശത്രുതാപരമായാണ് പെരുമാറുന്നതെന്ന് ബൊളീവിയ പറഞ്ഞു, ബൊളീവിയ ഗാസ മുനമ്പിലേക്ക് സഹായം അയയ്‌ക്കുമെന്ന് പ്രദ പറഞ്ഞു, എന്നാൽ അത് എന്തായിരിക്കുമെന്ന് വിശദീകരിച്ചിട്ടില്ല.
ഒക്‌ടോബർ 7-ന് ബൊളീവിയയുടെ വിദേശകാര്യ മന്ത്രാലയം പറഞ്ഞു, “ഇസ്രായേലിനും പാലസ്തീനിനുമിടയിലുള്ള ഗാസ മുനമ്പിൽ നടന്ന അക്രമ സംഭവങ്ങളിൽ ആഴത്തിലുള്ള ആശങ്കയുണ്ട്”. ഒക്‌ടോബർ 18-ന്, വിദേശകാര്യ മന്ത്രാലയം ഇസ്രായേൽ ആക്രമണങ്ങളെ അപലപിക്കുകയും “പലസ്തീൻ ജനതയ്ക്കുള്ള ഞങ്ങളുടെ ഐക്യദാർഢ്യവും അചഞ്ചലമായ പിന്തുണയും” ഊന്നിപ്പറയുകയും ചെയ്തു.
8500ലധികം ഫലസ്തീനികൾ യുദ്ധത്തിൽ കൊല്ലപ്പെട്ടതായി ഗാസ ആരോഗ്യ മന്ത്രാലയം അറിയിച്ചു.
ഇപ്പോൾ ഇടതുപക്ഷ പ്രസിഡന്റ് ലൂയിസ് ആർസിന്റെ നേതൃത്വത്തിലുള്ള 12 ദശലക്ഷത്തോളം വരുന്ന ഈ ആൻഡിയൻ രാഷ്ട്രത്തിന്റെ ഗവൺമെന്റ് ഇസ്രായേലിനെ വളരെക്കാലമായി വിമർശിച്ചുവരുന്നു, ഗാസ ഉൾപ്പെട്ട പോരാട്ടത്തിന്റെ പേരിൽ മുമ്പ് 2009-ൽ നയതന്ത്രബന്ധം വിച്ഛേദിച്ചിരുന്നു. എന്നാല്‍, 2020ൽ നയതന്ത്രബന്ധം പുനഃസ്ഥാപിക്കുകയും ചെയ്തു.
ബൊളീവിയയിലെ പലസ്തീൻ അംബാസഡർ മഹ്മൂദ് എലൽവാനിയുമായി തിങ്കളാഴ്ച നടത്തിയ കൂടിക്കാഴ്ചയ്ക്ക് ശേഷം ആർസെ പലസ്തീൻ ജനതയോട് ഐക്യദാർഢ്യം പ്രകടിപ്പിച്ചു.
“പലസ്തീൻ ജനതയുടെ, പ്രത്യേകിച്ച് സമാധാനത്തോടെ ജീവിക്കാൻ അവകാശമുള്ള കുട്ടികളുടെ, കഷ്ടപ്പാടുകൾ തുടരാനും നിശബ്ദത പാലിക്കാനും കഴിയില്ല. ഗാസയിൽ നടക്കുന്ന യുദ്ധക്കുറ്റങ്ങളെ ഞങ്ങൾ അപലപിക്കുന്നു,” യോഗത്തിന് ശേഷം ആർസ് സോഷ്യൽ മീഡിയയിൽ കുറിച്ചു.
ബൊളീവിയ ഇസ്രായേലിനെ തീവ്രവാദ രാഷ്ട്രമായി പ്രഖ്യാപിക്കുകയും അന്താരാഷ്ട്ര ക്രിമിനൽ കോടതിയിൽ പരാതി നൽകുകയും വേണമെന്ന് ആവശ്യപ്പെട്ടു.
