ഗാസ: വടക്കൻ ഗാസയിലെ ജബാലിയ അഭയാർത്ഥി ക്യാമ്പിൽ കുടിയിറക്കപ്പെട്ടവർക്ക് അഭയം നൽകുന്ന യുഎൻ സ്‌കൂളിന് നേരെ ഇസ്രായേൽ നടത്തിയ വ്യോമാക്രമണത്തിൽ 15 പേർ കൊല്ലപ്പെടുകയും ഡസൻ പേർക്ക് പരിക്കേൽക്കുകയും ചെയ്തതായി അൽ-ഷിഫ ആശുപത്രി മേധാവി മുഹമ്മദ് അബു സെൽമിയ പറഞ്ഞു.
15 പേര്‍ കൊല്ലപ്പെട്ടെന്നും എണ്ണം ഇനിയും വർദ്ധിക്കാന്‍ സാധ്യതയുണ്ടെന്നും ഹമാസ് നടത്തുന്ന എൻക്ലേവിലെ ആരോഗ്യ മന്ത്രാലയത്തിലെ ഉദ്യോഗസ്ഥൻ കൂടിയായ അബു സെൽമിയ പറഞ്ഞു.
വെള്ളിയാഴ്ച ഉപരോധിച്ച വടക്കൻ ഗാസയിൽ നിന്ന് പരിക്കേറ്റവരെ ഒഴിപ്പിക്കാൻ ഉപയോഗിച്ച ആംബുലൻസിനെ ലക്ഷ്യമിട്ട് ഇസ്രായേൽ വ്യോമാക്രമണം നടത്തിയതിനെത്തുടര്‍ന്ന് 15 പേർ കൊല്ലപ്പെടുകയും 60 പേർക്ക് പരിക്കേൽക്കുകയും ചെയ്തതായി ഹമാസ് നിയന്ത്രണത്തിലുള്ള എൻക്ലേവിന്റെ ആരോഗ്യ മന്ത്രാലയം അറിയിച്ചിരുന്നു.
ഹമാസ് തീവ്രവാദി സംഘം ഉപയോഗിക്കുന്നതായിരുന്നു ആംബുലന്‍സ് എന്ന് തിരിച്ചറിഞ്ഞതിനാലാണ് ബോംബിട്ടതെന്ന് ഇസ്രായേൽ സൈന്യം പറഞ്ഞു. ഹമാസ് തീവ്രവാദികളാണ് കൊല്ലപ്പെട്ടതെന്നും, ആംബുലൻസുകളിൽ തീവ്രവാദികളെയും ആയുധങ്ങളും കടത്തുകയായിരുന്നു എന്ന് ഇസ്രായേല്‍ സൈന്യം ആരോപിച്ചു.
തങ്ങളുടെ പോരാളികൾ അവിടെയുണ്ടായിരുന്നെന്ന ആരോപണം അടിസ്ഥാനരഹിതമാണെന്ന് ഹമാസ് ഉദ്യോഗസ്ഥൻ ഇസത്ത് എൽ റെഷിഖ് പറഞ്ഞു. ഗാസ സിറ്റിയിലെ അൽ-ഷിഫ ഹോസ്പിറ്റലിനു സമീപം ഇസ്രായേൽ ലക്ഷ്യമിട്ട ഒരു വാഹനവ്യൂഹത്തിന്റെ ഭാഗമാണ് ആംബുലൻസ് എന്ന് ഗാസ ആരോഗ്യ മന്ത്രാലയ വക്താവ് അഷ്‌റഫ് അൽ-ഖിദ്ര പറഞ്ഞു.
അൽ-ഷിഫ ഹോസ്പിറ്റൽ ഗേറ്റിലും ഒരു കിലോമീറ്റർ (0.6 മൈൽ) അകലെയുള്ള അൻസാർ സ്‌ക്വയറിലും ഉൾപ്പെടെ ഒന്നിലധികം സ്ഥലങ്ങളിൽ ആംബുലൻസുകളുടെ വാഹനവ്യൂഹത്തെ ഇസ്രായേൽ ലക്ഷ്യമിട്ടതായി ഖിദ്ര പറഞ്ഞു.സംഭവത്തെക്കുറിച്ചുള്ള പ്രസ്താവനയിൽ, ആംബുലൻസിന് ഹമാസുമായി ബന്ധമുണ്ടെന്ന വാദത്തെ പിന്തുണയ്ക്കുന്ന തെളിവുകളൊന്നും ഇസ്രായേൽ സൈന്യം നൽകിയിട്ടില്ലെങ്കിലും കൂടുതൽ വിവരങ്ങൾ പുറത്തുവിടാൻ ഉദ്ദേശിക്കുന്നതായി പറഞ്ഞു.
“ഈ പ്രദേശം ഒരു യുദ്ധമേഖലയാണെന്ന് ഞങ്ങൾ ഊന്നിപ്പറയുന്നു. പ്രദേശത്തെ സാധാരണക്കാരോട് സ്വന്തം സുരക്ഷയ്ക്കായി തെക്കോട്ട് പലായനം ചെയ്യാൻ ആവർത്തിച്ച് ആവശ്യപ്പെടുന്നു,” സൈന്യം പറഞ്ഞു.
അതേസമയം, രോഗികളെ ഒഴിപ്പിക്കുന്ന ആംബുലൻസുകൾക്ക് നേരെയുള്ള ആക്രമണങ്ങളുടെ റിപ്പോർട്ടുകൾ തന്നെ ഞെട്ടിച്ചെന്നും, രോഗികളും ആരോഗ്യ പ്രവർത്തകരും മെഡിക്കൽ സൗകര്യങ്ങളും സംരക്ഷിക്കപ്പെടേണ്ടതുണ്ടെന്നും
ലോകാരോഗ്യ സംഘടനയുടെ ഡയറക്ടർ ജനറൽ ടെഡ്രോസ് അദാനോം ഗെബ്രിയേസസ് ഒരു സോഷ്യൽ മീഡിയ പോസ്റ്റിൽ പറഞ്ഞു.
“അൽ ഷിഫ ആശുപത്രിക്ക് പുറത്ത് ആംബുലൻസ് വാഹനവ്യൂഹത്തിന് നേരെ ഗാസയിൽ റിപ്പോർട്ട് ചെയ്യപ്പെട്ട ആക്രമണം എന്നെ ഭയപ്പെടുത്തുന്നു. ആശുപത്രിക്ക് പുറത്ത് തെരുവിൽ കിടക്കുന്ന മൃതദേഹങ്ങളുടെ ചിത്രങ്ങൾ വേദനിപ്പിക്കുന്നതാണ്, ”അദ്ദേഹം പറഞ്ഞു.
ഗുരുതരമായി പരിക്കേറ്റ ഫലസ്തീനികളെ ഈജിപ്തിലേക്ക് അടിയന്തരമായി കൊണ്ടുപോയി ചികിത്സിക്കുന്നതിനായി ഉപരോധിച്ച ഗാസ സിറ്റിയിൽ നിന്ന് എൻക്ലേവിന്റെ തെക്ക് ഭാഗത്തേക്ക് ആംബുലൻസുകൾ അയക്കുമെന്ന് വെള്ളിയാഴ്ച ഗാസ ആരോഗ്യ മന്ത്രാലയ വക്താവ് അഷ്‌റഫ് അൽ-ഖിദ്ര പറഞ്ഞു.
അൽ-ഷിഫ ആശുപത്രിയിലെ കമാൻഡ് സെന്ററുകളും ടണൽ പ്രവേശന കവാടങ്ങളും ഹമാസ് മറച്ചുവെക്കുന്നുവെന്ന് ആരോപിച്ച ഇസ്രായേൽ, കഴിഞ്ഞ മാസം എല്ലാ സിവിലിയന്മാരോടും ഗാസയുടെ വടക്ക് ഭാഗത്തുനിന്ന് തെക്കോട്ട് പോകാൻ ഉത്തരവിടുകയും സൈന്യം വ്യാഴാഴ്ച പ്രദേശം വളയുകയും ചെയ്തു.
ഗാസയുടെ വടക്കൻ പ്രദേശങ്ങൾ വിട്ടുപോകാൻ സിവിലിയന്മാരോട് ഉത്തരവിട്ടിട്ടും, ഇസ്രായേൽ സൈന്യം സ്ട്രിപ്പിന്റെ തെക്ക് ബോംബാക്രമണം തുടരുകയാണ്. ഹമാസും അൽ-ഷിഫ ആശുപത്രി അധികൃതരും ഈ സൗകര്യം തീവ്രവാദ പോരാളികളുടെ താവളമായി ഉപയോഗിക്കുന്നില്ല എന്ന് അല്‍-ഖിദ്ര പറഞ്ഞു.
