ലണ്ടൻ: ലണ്ടനിൽ നടന്ന ഫലസ്തീൻ അനുകൂല പ്രകടനത്തെത്തുടർന്ന് തീവ്രവാദ നിയമം ലംഘിച്ചതിനും വംശീയ വിദ്വേഷം വളർത്തിയതിനും ഉത്തരവുകൾ അനുസരിക്കാത്തതിനും 29 പേരെ സ്‌കോട്ട്‌ലൻഡ് യാർഡ് പോലീസ് അറസ്റ്റ് ചെയ്തു. 30,000 ത്തോളം ആളുകൾ ട്രാഫൽഗർ സ്ക്വയറിൽ പ്രതിഷേധ പ്രകടനം നടത്തി. എഡിൻബർഗ്, ഗ്ലാസ്‌ഗോ എന്നിവയുൾപ്പെടെ യുകെയുടെ വിവിധ ഭാഗങ്ങളിൽ നടന്ന പ്രസ്ഥാനത്തിൽ ചേർന്ന് ഫ്രീ പാലസ്‌തീൻ സഖ്യത്തിൽ നിന്നുള്ള 350 പ്രതിഷേധക്കാർ ഓക്‌സ്‌ഫോർഡ് സ്ട്രീറ്റിനെ സ്തംഭിപ്പിച്ചു.
പ്രകടനത്തിനിടെ, വെടിനിർത്തലിന് ആഹ്വാനം ചെയ്യുകയും ഫലസ്തീന് പിന്തുണ പ്രകടിപ്പിക്കുകയും ചെയ്യുന്ന ഫലസ്തീൻ അനുകൂല ഗ്രൂപ്പുകളാൽ തെരുവുകൾ നിറഞ്ഞു. പ്രകടനക്കാർ ഫലസ്തീൻ പതാകകൾ വീശി, നിലവിലുള്ള സംഘർഷത്തെക്കുറിച്ചുള്ള തങ്ങളുടെ ആശങ്കകൾ പ്രകടിപ്പിച്ചു. “ഗാസയിൽ യുദ്ധക്കുറ്റങ്ങൾ നടക്കുന്നുണ്ട്, അത് അവസാനിക്കണമെന്ന് എല്ലാവരും ആഗ്രഹിക്കുന്നു,” തന്റെ സഹോദരൻ ഇമ്രാനൊപ്പം പങ്കെടുത്ത ഒരു പ്രതിഷേധക്കാരൻ ആദം പറഞ്ഞു.
മിഡിൽ ഈസ്റ്റിൽ നടന്നുകൊണ്ടിരിക്കുന്ന സംഘർഷം ഇരുവശത്തും നാശനഷ്ടങ്ങൾക്ക് കാരണമായി, ഇസ്രായേലിൽ 1,400-ലധികം ആളുകൾ കൊല്ലപ്പെടുകയും ഗാസ മുനമ്പിൽ പതിനായിരത്തോളം ജീവനുകൾ നഷ്ടപ്പെടുകയും ചെയ്തു. ലണ്ടനിലെ പലസ്തീൻ അനുകൂല പ്രതിഷേധം പൊതുജനങ്ങൾക്കിടയിൽ മാത്രമല്ല, രാഷ്ട്രീയരംഗത്തും ഭിന്നത വർധിപ്പിച്ചിട്ടുണ്ട്. ലണ്ടൻ മേയറും ലേബർ പാർട്ടി അംഗവുമായ സാദിഖ് ഖാൻ ഇസ്രയേലിനെതിരായ ഹമാസിന്റെ ആക്രമണത്തിന്റെ തീവ്രത അംഗീകരിച്ച് വെടിനിർത്തലിന് ആഹ്വാനം ചെയ്തു. എന്നാല്‍, ലേബർ നേതാവ് കിയർ സ്റ്റാർമർ അത്തരമൊരു ആഹ്വാനത്തെ എതിർക്കുകയും ചെയ്തു.
മറുവശത്ത്, പ്രധാനമന്ത്രിയും കൺസർവേറ്റീവ് പാർട്ടി നേതാവുമായ ഋഷി സുനക്ക് സമാധാനത്തിനും ഐക്യദാർഢ്യത്തിനും വേണ്ടി വാദിക്കുമ്പോൾ തന്നെ ഇസ്രായേലിന് ശക്തമായ പിന്തുണ നൽകുകയും ചെയ്തു.
നവംബർ 11 ന് യുദ്ധവിരാമ ദിനത്തിനായി മറ്റൊരു ഫലസ്തീൻ അനുകൂല പ്രതിഷേധം ആസൂത്രണം ചെയ്തിട്ടുണ്ട്, ഈ നീക്കം “പ്രകോപനപരവും അനാദരവുള്ളതും” എന്ന് സുനക് വിമർശിച്ചു. ഒന്നാം ലോക മഹായുദ്ധത്തിന്റെ അന്ത്യം കുറിക്കുന്ന ഒരു യുദ്ധവിരാമ ഉടമ്പടി ഒപ്പുവെച്ചതിന്റെ സ്മരണാർത്ഥമാണ് യുദ്ധവിരാമ ദിനം. നവംബർ 11 ന് നടക്കുന്ന റാലിയിൽ പങ്കെടുക്കാൻ
നിരവധി യുവതീയുവാക്കള്‍ തയ്യാറെടുക്കുകയാണ്. അത്തരം പരിപാടികളുടെ സുരക്ഷയും ക്രമീകരണവും ഉറപ്പാക്കാൻ, പോലീസ് സോഷ്യൽ മീഡിയ സൂക്ഷ്മമായി നിരീക്ഷിക്കുകയും ചെയ്യുന്നുണ്ട്.
