ന്യൂഡൽഹി: ഇന്ന് മൂന്ന് പുതിയ ജഡ്ജിമാരെ ലഭിച്ചതോടെ സുപ്രീം കോടതിയിലെ പരമാവധി ജഡ്ജിമാരുടെ എണ്ണം പൂർത്തിയായി. സുപ്രീം കോടതി കൊളീജിയത്തിന്റെ ശുപാർശ കേന്ദ്ര സർക്കാർ അംഗീകരിച്ചു. ജസ്റ്റിസ് സതീഷ് ചന്ദ്ര ശർമ്മ, ജസ്റ്റിസ് അഗസ്റ്റിൻ ജോർജ് മസിഹ്, ജസ്റ്റിസ് സന്ദീപ് മേത്ത എന്നിവരെ സുപ്രീം കോടതി ജഡ്ജിമാരായി നിയമിച്ചു. ഈ ജഡ്ജിമാരെല്ലാം ഇന്ന് (വ്യാഴാഴ്ച) വൈകീട്ട് 4.15ന് സത്യപ്രതിജ്ഞ ചെയ്യും. ഈ നിയമനത്തോടെ സുപ്രീം കോടതിയിലെ ജഡ്ജിമാരുടെ എണ്ണം 34 ആയി.
നിലവിൽ ഡൽഹി ഹൈക്കോടതി ചീഫ് ജസ്റ്റിസാണ് ജസ്റ്റിസ് സതീഷ് ചന്ദ്ര ശർമ്മ. തെലങ്കാന ഹൈക്കോടതി ചീഫ് ജസ്റ്റിസായും പ്രവർത്തിച്ചിട്ടുണ്ട്. കർണാടക ഹൈക്കോടതിയിലെ ആക്ടിംഗ് ചീഫ് ജസ്റ്റിസായും കർണാടക ഹൈക്കോടതിയിലെയും മധ്യപ്രദേശ് ഹൈക്കോടതിയിലെയും ജഡ്ജിയായും സേവനമനുഷ്ഠിച്ചിട്ടുണ്ട്.
1961 നവംബർ 30 നാണ് ജസ്റ്റിസ് സതീഷ് ചന്ദ്ര ശർമ്മ ജനിച്ചത്. 1984-ൽ അഭിഭാഷകവൃത്തി ആരംഭിച്ച അദ്ദേഹം ചുരുങ്ങിയ കാലത്തിനുള്ളിൽ മധ്യപ്രദേശിലെ പ്രശസ്ത അഭിഭാഷകനായി. 2008 ജനുവരി 18 ന് ജസ്റ്റിസ് സതീഷ് ചന്ദ്ര ശർമ്മ മധ്യപ്രദേശ് ഹൈക്കോടതി ജഡ്ജിയായി നിയമിതനായി. 2021 ഒക്ടോബർ 11-ന് തെലങ്കാന ഹൈക്കോടതി ചീഫ് ജസ്റ്റിസായി ഉയർത്തപ്പെട്ട അദ്ദേഹം പിന്നീട് 2022 ജൂൺ 28-ന് ഡൽഹി ഹൈക്കോടതി ചീഫ് ജസ്റ്റിസായി.
നിലവിൽ രാജസ്ഥാൻ ഹൈക്കോടതി ചീഫ് ജസ്റ്റിസാണ് ജസ്റ്റിസ് അഗസ്റ്റിൻ ജോർജ്ജ് മസിഹ്. ഇതിന് മുമ്പ് പഞ്ചാബ്, ഹരിയാന ഹൈക്കോടതികളിൽ ജഡ്ജിയായിരുന്നു. 2008 ജൂലൈ 10-ന് പഞ്ചാബ്-ഹരിയാന ഹൈക്കോടതി ജഡ്ജിയായി ജസ്റ്റിസ് എ ജി മസിഹ് നിയമിതനായി. 2023 മെയ് 30-ന് രാജസ്ഥാൻ ഹൈക്കോടതി ചീഫ് ജസ്റ്റിസായി ഉയർത്തപ്പെട്ടു. അഖിലേന്ത്യാ ഹൈക്കോടതിയിലെ ജഡ്ജിമാരുടെ സീനിയോറിറ്റി പട്ടികയിൽ ഏഴാം സ്ഥാനവും സ്വദേശമായ രാജസ്ഥാന്‍ ഹൈക്കോടതിയിലെ ജഡ്ജിമാരിൽ ഒന്നാമനുമാണ്.
നിലവിൽ ഗുവാഹത്തി ഹൈക്കോടതി ചീഫ് ജസ്റ്റിസാണ് ജസ്റ്റിസ് സന്ദീപ് മേത്ത. ഇതിന് മുമ്പ് രാജസ്ഥാൻ ഹൈക്കോടതി ജഡ്ജിയായിരുന്നു. 2011 മെയ് 30 ന് ജസ്റ്റിസ് മേത്ത രാജസ്ഥാൻ ഹൈക്കോടതി ജഡ്ജിയായി. ഈ വർഷം ഫെബ്രുവരി 15 മുതൽ അദ്ദേഹം ഗുവാഹത്തി ഹൈക്കോടതി ചീഫ് ജസ്റ്റിസാണ്. അഖിലേന്ത്യാ ഹൈക്കോടതി ജഡ്ജിമാരുടെ സീനിയോറിറ്റി ലിസ്റ്റിൽ 23-ാം റാങ്കുള്ള അദ്ദേഹം നിലവിലെ ഹൈക്കോടതിയിലെ ജഡ്ജിമാരിൽ ഒന്നാമനാണ്.
