ആലപ്പുഴ: തകഴിയിലെ ബിജെപി കർഷക സംഘടനാ നേതാവും ആലപ്പുഴയിൽ ഭാരതീയ കിസാൻ സംഘ് ജില്ലാ പ്രസിഡന്റുമായ പ്രസാദിന്റെ ദാരുണമായ ആത്മഹത്യയുടെ പശ്ചാത്തലത്തിൽ സർക്കാരിനെ നിശിതമായി വിമര്‍ശിച്ച് ഗവർണർ ആരിഫ് മുഹമ്മദ് ഖാൻ. കുട്ടനാട്ടിലെ കർഷക ആത്മഹത്യകളെ ഒറ്റപ്പെട്ട സംഭവങ്ങളായി കാണരുതെന്നും, പകരം ഗുരുതരമായതും വ്യാപകവുമായ ആശങ്കയായി കാണണമെന്നും ഗവർണർ ഊന്നിപ്പറഞ്ഞു.
പെൻഷൻ പോലും ലഭിക്കാതെ ജനങ്ങൾ ബുദ്ധിമുട്ടുകയാണ്. മന്ത്രിമാരുടെ പേഴ്സണൽ സ്റ്റാഫിനുവേണ്ടി സർക്കാർ വൻതുകയാണ് ചിലവഴിക്കുന്നത്. എന്നാൽ, പാവപെട്ട കർഷകരെയും സ്ത്രീകളെയും സർക്കാർ കണ്ടില്ലെന്ന് നടിക്കുകയാണെന്ന് ഗവർണർ പറഞ്ഞു.
സാമ്പത്തിക പരാധീനതകൾക്കിടയിലും ആഘോഷങ്ങൾക്ക് ഒരു കുറവും ഇല്ലെന്ന് ഗവർണർ ആശങ്ക പ്രകടിപ്പിച്ചു. കർഷകരും പെൻഷൻകാരും ഒരുപോലെ നേരിടുന്ന കടുത്ത പ്രതിസന്ധി സർക്കാർ അവഗണിക്കുകയാണെന്ന് അദ്ദേഹം കുറ്റപ്പെടുത്തി. ഡൽഹിയിലെ മെഡിക്കൽ മിഷൻ ഹോസ്പിറ്റലിൽ പ്രസാദിന് അന്തിമോപചാരം അർപ്പിച്ച ഗവർണർ ആരിഫ് മുഹമ്മദ് ഖാൻ
മാധ്യമങ്ങളെ അഭിസംബോധന ചെയ്തു, സ്ഥിതിഗതികളുടെ ഗൗരവം ഊന്നിപ്പറയുകയും അടിസ്ഥാന പ്രശ്നങ്ങൾ പരിഹരിക്കാൻ അടിയന്തര നടപടികൾ ആവശ്യപ്പെടുകയും ചെയ്തു.
ഡല്‍ഹിയില്‍ നിന്ന് തിരിച്ചെത്തുന്ന ഗവര്‍ണ്ണര്‍, പ്രസാദിന്റെ മുതദേഹം സൂക്ഷിച്ചിരിക്കുന്ന തിരുവല്ലയിലെ ആശുപത്രിയിൽ എത്തും. തുടർന്ന് തകഴിയിലുള്ള പ്രസാദിന്റെ കുടുംബത്തെ സന്ദർശിക്കും. തന്റെ മരണത്തിന് ഉത്തരവാദി കേരള സർക്കാരാണെന്ന് സൂചിപ്പിച്ചുകൊണ്ടുള്ള ഒരു പേജുള്ള കുറിപ്പ് പ്രസാദിന്റെ വീട്ടിൽ നിന്നും കണ്ടെത്തിയിരുന്നു. കൃഷി ആവശ്യങ്ങൾക്കായി വായ്പയ്ക്കായി പ്രസാദ് ബാങ്കിനെ സമീപിച്ചിരുന്നു. എന്നാൽ പിആര്‍എസ് വായ്പ കുടിശ്ശിക ചൂണ്ടിക്കാട്ടി ബാങ്ക് വായ്പ അനുവദിച്ചില്ല. അതിൽ മനംനൊന്താണ് പ്രസാദ് ജീവനൊടുക്കിയത്.
