ചെന്നൈ: അടുത്തിടെ തമിഴ്നാട് നിയമസഭ പാസാക്കിയ ബില്ലുകൾ അംഗീകരിക്കാത്തതിൽ ഗവർണർ ആർഎൻ രവിക്കെതിരെ സുപ്രീം കോടതി രൂക്ഷ വിമര്‍ശനം ഉന്നയിച്ചിരുന്നു. ഗവര്‍ണ്ണറുടെ നടപടിയില്‍ അതൃപ്തി പ്രകടിപ്പിച്ച ചീഫ് ജസ്റ്റിസ് ഡി.വൈ. ചന്ദ്രചൂഡ് അദ്ധ്യക്ഷനായ ബെഞ്ച് വിഷയം ആശങ്കാജനകമാണെന്ന് വിശേഷിപ്പിച്ചു.
പത്ത് ബില്ലുകളാണ് ഗവർണർ തിരിച്ചയച്ചത്. ബില്ലുകൾ തിരിച്ചയച്ച് മണിക്കൂറുകൾക്ക് ശേഷം നിയമസഭാ സ്പീക്കർ എം അപ്പാവു ശനിയാഴ്ച പ്രത്യേക സമ്മേളനം വിളിച്ചുകൂട്ടി. ബി.ജെ.പി നിയമിച്ച ഗവർണർ ബില്ലുകളുടെ അംഗീകാരം മനഃപൂർവം വൈകിപ്പിക്കുകയും തിരഞ്ഞെടുക്കപ്പെട്ട സർക്കാരിനെ ദുർബലപ്പെടുത്തി സംസ്ഥാനത്തിന്റെ വികസനം തടസ്സപ്പെടുത്തുകയും ചെയ്‌തെന്ന് തമിഴ്നാട് സർക്കാർ ആരോപിച്ചു. പ്രത്യേക യോഗത്തില്‍, അനുമതിക്കായി അയച്ച ബില്ലുകളിൽ പലതും ഗവർണർ രവി സർക്കാരിന് തിരിച്ചയച്ചതായി അപ്പാവു പറഞ്ഞു.
ഇത്തരം ബില്ലുകൾ ഉടൻ വീണ്ടും പാസാക്കാനാണ് സംസ്ഥാന സർക്കാർ ഉദ്ദേശിക്കുന്നതെന്നും അതിനാൽ നവംബർ 18ന് നിയമസഭ ചേരുമെന്നും അദ്ദേഹം പറഞ്ഞു. നാല് ഔദ്യോഗിക ഉത്തരവുകളും 54 തടവുകാരെ അകാലത്തിൽ മോചിപ്പിക്കുന്നതുമായി ബന്ധപ്പെട്ട ഫയലും കൂടാതെ കുറഞ്ഞത് 12 ബില്ലുകളെങ്കിലും തീർപ്പാക്കാനുണ്ട്. ഒക്ടോബറിൽ നിയമസഭാ സമ്മേളനം പിരിഞ്ഞു. നവംബർ 10ന് നിയമസഭ പാസാക്കിയ ബില്ലുകൾക്ക് ഗവർണർ അനുമതി നൽകുന്നതിൽ കാലതാമസം വരുത്തിയത് ഗൗരവമേറിയ വിഷയമാണെന്ന് സുപ്രീം കോടതി വിശേഷിപ്പിച്ചിരുന്നു.
കെട്ടിക്കിടക്കുന്ന ബില്ലുകളിൽ ഒന്ന്, സർക്കാർ നിയന്ത്രണത്തിലുള്ള സർവകലാശാലകളുടെ വൈസ് ചാൻസലർമാരെ നിയമിക്കാനുള്ള ഗവർണറുടെ അധികാരം തടയാൻ ശ്രമിക്കുന്നു, മറ്റൊന്ന് മുൻ എഐഎഡിഎംകെ മന്ത്രിമാരെ പ്രോസിക്യൂട്ട് ചെയ്യണമെന്ന് ആവശ്യപ്പെടുന്നു. മാത്രമല്ല, ഗവര്‍ണ്ണര്‍ രവി നേരത്തെയും നീറ്റ് ഒഴിവാക്കൽ ബിൽ വളരെ കാലതാമസത്തിന് ശേഷം തിരികെ നൽകുകയും ബിൽ വീണ്ടും നിയമസഭ പാസാക്കിയതിന് ശേഷം രാഷ്ട്രപതിക്ക് അയയ്ക്കുകയും ചെയ്തു.
ഓൺലൈൻ ഗെയിമിംഗ് നിരോധിക്കണമെന്ന ബില്ലിലും അദ്ദേഹം സമാനമായ നിലപാട് സ്വീകരിച്ചിരുന്നു. കഴിഞ്ഞ വെള്ളിയാഴ്ചയും തമിഴ്നാട് സർക്കാരിന്റെ ഹർജിയിൽ സുപ്രീം കോടതി കേന്ദ്രത്തോട് മറുപടി തേടിയിരുന്നു. ചീഫ് ജസ്റ്റിസ് ഡി വൈ ചന്ദ്രചൂഡ്, ജസ്റ്റിസ് ജെ ബി പർദിവാല, ജസ്റ്റിസ് മനോജ് മിശ്ര എന്നിവരടങ്ങിയ ബെഞ്ച് കേന്ദ്രത്തിന് നോട്ടീസ് അയയ്ക്കുകയും വിഷയത്തിൽ അറ്റോർണി ജനറലിന്റെയോ സോളിസിറ്റർ ജനറലിന്റെയോ സഹായം തേടുകയും ചെയ്തു.
കേസിന്റെ അടുത്ത വാദം കേൾക്കാൻ ബെഞ്ച് നവംബർ 20ന് മാറ്റി. സംസ്ഥാന നിയമസഭ പാസാക്കിയ 12 ബില്ലുകൾ ഗവർണർ ആർഎൻ രവിയുടെ ഓഫീസിൽ കെട്ടിക്കിടക്കുന്നുണ്ടെന്ന് തമിഴ്നാട് സർക്കാരിന് വേണ്ടി ഹാജരായ മുതിർന്ന അഭിഭാഷകൻ അഭിഷേക് അഭിഷേക് സിംഗ്വി പറഞ്ഞു.
