ഗാസയ്‌ക്കെതിരായ ഇസ്രായേലിന്റെ ക്രൂരമായ യുദ്ധത്തിൽ 11,000-ത്തിലധികം ഫലസ്തീനികൾ കൊല്ലപ്പെട്ടിട്ടും, ഉപരോധിക്കപ്പെട്ട എൻക്ലേവിൽ ഒരു മാനുഷിക ദുരന്തം സൃഷ്ടിച്ച ശത്രുതയ്ക്ക് ഇപ്പോഴും അവസാനമില്ല. അടിയന്തര വെടിനിർത്തലിനായുള്ള ആഗോള ആഹ്വാനങ്ങൾക്കിടയിലും ഇസ്രായേലിനെ അതിന്റെ വംശഹത്യാ നടപടികളിൽ നിന്ന് തടയുന്നതിൽ അന്താരാഷ്ട്ര സമൂഹം അമ്പേ പരാജയപ്പെട്ടു.
ഗാസയിൽ നിരന്തരമായ ബോംബാക്രമണത്തിൽ നിന്ന് ഇസ്രായേലിനെ തടയാൻ കാര്യമായൊന്നും ചെയ്തിട്ടില്ലാത്ത അമേരിക്കയാണ് ശത്രുത അവസാനിപ്പിക്കുന്നതിനുള്ള പ്രധാന തടസ്സം. ഇസ്രയേലിന്റെ സൈനിക നടപടികൾ നിർത്താനുള്ള വിസമ്മതത്തെ പിന്തുണച്ച് വാഷിംഗ്ടൺ വെടിനിർത്തൽ ആവർത്തിച്ച് നിരാകരിച്ചിട്ടുണ്ട്. ബൈഡൻ ഭരണകൂടം അവകാശപ്പെടുന്ന ‘മാനുഷിക വിരാമം’ ഇസ്രായേല്‍ ഒരു പരിധിവരെ അംഗീകരിച്ചെങ്കിലും, ബോംബിംഗ് ദിവസേന നാല് മണിക്കൂർ ‘താൽക്കാലികമായി’ നിർത്താന്‍ പറയുന്നത് അർത്ഥശൂന്യമാണ്. ആശുപത്രികളും, സ്കൂളുകളും, അഭയാർത്ഥി ക്യാമ്പുകളും ലക്ഷ്യമാക്കിയുള്ള കനത്ത ബോംബാക്രമണം ഇസ്രായേല്‍ തുടര്‍ന്നുകൊണ്ടേയിരിക്കുകയാണ്. കൂട്ടക്കൊലകള്‍ നടത്തുന്നതിനിടയില്‍ ‘ഇടവേളകള്‍’ നല്‍കുന്നത് തങ്ങളുടെ ലക്ഷ്യം നിറവേറ്റുന്നതിന് തടസ്സമാകുമെന്നാണ് ഇസ്രായേലിന്റെ വാദം.
യുഎൻ സുരക്ഷാ കൗൺസിലിൽ വെടിനിർത്തൽ ഉറപ്പാക്കാന്‍ നടത്തിയ മൂന്ന് ശ്രമങ്ങളും പരാജയപ്പെട്ടു. ലോകത്തിലെ ഏറ്റവും പ്രധാനപ്പെട്ട നയതന്ത്ര ഫോറം എന്ന് വിശേഷിപ്പിക്കുന്ന യു എന്‍ വെറും പ്രഹസനമാണെന്ന പരമാര്‍ത്ഥത്തിന് അടിവരയിട്ട പോലെയായി ഗാസ വിഷയത്തില്‍ സംഭവിച്ചത്. സുരക്ഷാ കൗണ്‍സില്‍ വിഭജിക്കപ്പെട്ട് തളർന്ന അവസ്ഥയിലാണ്. വെടിനിർത്തലിന് ആഹ്വാനം ചെയ്യുന്ന പ്രമേയം പാസാക്കാനുള്ള അവസാന ശ്രമത്തെ യുഎസ് വീറ്റോ ചെയ്തു. യുഎൻ ഉദ്യോഗസ്ഥർ ഉൾപ്പെടെയുള്ള അന്താരാഷ്ട്ര സമൂഹത്തിന്റെ സമ്മർദ്ദം വർദ്ധിച്ചുകൊണ്ടിരിക്കേ, ഗാസയിലെ സിവിലിയൻ അപകടങ്ങളിൽ ഉത്കണ്ഠ പ്രകടിപ്പിക്കാൻ യുഎസ് ഉദ്യോഗസ്ഥരോട് ആവശ്യപ്പെട്ടെങ്കിലും അതും പരാജയപ്പെട്ടു. കാരണം, വാഷിംഗ്ടൺ ഇപ്പോഴും അങ്ങനെയൊരു ഉടമ്പടിയെ പിന്തുണയ്ക്കാൻ തയ്യാറല്ലെന്നതു തന്നെ. എന്തുകൊണ്ടാണ് യുഎസ് വെടിനിർത്തലിനെ പിന്തുണയ്ക്കാത്തതെന്ന ചോദ്യത്തിന് വൈറ്റ് ഹൗസ് വക്താവ് ജോൺ കിർബിയുടെ മറുപടി തന്നെ ശ്രദ്ധേയമാണ്. “ഇപ്പോൾ അങ്ങനെ ചെയ്താല്‍ അത് ഹമാസിന് ഏറെ ഗുണം ചെയ്യും” എന്ന വിശദീകരണമാണ് അദ്ദേഹം നല്‍കിയത്. അതിനർത്ഥം, ഗാസയില്‍ സൃഷ്ടിച്ച മാനുഷിക വിപത്തുകൾക്കിടയിലും, ഗാസയില്‍ നടത്തുന്ന സൈനിക പ്രചാരണവും ഉപരോധവും തുടരാൻ ഇസ്രായേലിന് യുഎസ് സൗജന്യ പാസ് നൽകുന്നു എന്നാണ്.
ഗാസയ്‌ക്കെതിരായ ഇസ്രയേലിന്റെ യുദ്ധം എത്രത്തോളം നീണ്ടുനിൽക്കുന്നുവോ അത്രത്തോളം സംഘർഷം മിഡിൽ ഈസ്റ്റിലുടനീളം ഒരു ബഹുമുഖമായി വികസിക്കാനുള്ള സാധ്യത കൂടുതലാണെന്നതാണ്.
ലോകമെമ്പാടുമുള്ള പൊതുജനങ്ങൾക്കിടയിൽ, ഇസ്രായേലും യുഎസും ഇപ്പോള്‍ കൂടുതലായി ഒറ്റപ്പെട്ടുകൊണ്ടിരിക്കുകയാണ്. ഫലസ്തീനികള്‍ക്കുള്ള ഐക്യദാർഢ്യത്തിലും ഇസ്രയേലിനോടുള്ള വിയോജിപ്പും ആഗോള പൊതുജനാഭിപ്രായത്തില്‍ വേലിയേറ്റമായി മാറിയിരിക്കുകയാണ്. ലോകമെമ്പാടുമുള്ള ജനങ്ങള്‍ വെടിനിർത്തൽ ആവശ്യപ്പെട്ട് അഭൂതപൂർവമായ രീതിയിലാണ് രംഗത്തെത്തിയിരിക്കുന്നത്. പാശ്ചാത്യ സര്‍ക്കാരുകള്‍ സ്വീകരിക്കുന്ന നിലപാടുകള്‍ക്കെതിരെ, പാശ്ചാത്യ നഗരങ്ങളിൽ ഉൾപ്പെടെ, പ്രതിഷേധ റാലികളിൽ ഇസ്രായേലി നടപടികളിലുള്ള പൊതു രോഷം പ്രകടമാണ്. ലണ്ടനിലും വാഷിംഗ്ടണിലും വമ്പിച്ച ഫലസ്തീൻ അനുകൂല റാലികൾ നടന്നു. കൂടാതെ, വെടിനിർത്തലിനെ പിന്തുണയ്ക്കണമെന്ന് ആവശ്യപ്പെട്ട് വാഷിംഗ്ടണില്‍ നൂറിലധികം കോൺഗ്രസ് നേതാക്കള്‍ വാക്കൗട്ടും നടത്തി.
അന്താരാഷ്ട്ര മാനുഷിക നിയമങ്ങളുടെ ലംഘനമായ ‘മാനുഷിക ദുരന്തത്തെ’ എങ്ങനെ വിശദീകരിക്കണമെന്ന് യു എന്‍ ഉദ്യോഗസ്ഥര്‍ക്ക് വാക്കുകളില്ല. ഗാസ “കുട്ടികളുടെ ശ്മശാനമായി” മാറിയെന്നും “ഗാസയിലെ പേടിസ്വപ്നം ഒരു മാനുഷിക പ്രതിസന്ധിയേക്കാൾ കൂടുതലാണ്, ഇത് മാനവികതയുടെ പ്രതിസന്ധിയാണെന്നും” യുഎൻ സെക്രട്ടറി ജനറൽ അന്റോണിയോ ഗുട്ടെറസ് പറഞ്ഞു. ഓരോ 10 മിനിറ്റിലും ഒരു ഫലസ്തീൻ കുട്ടിയാണ് ഗാസയിൽ ഇപ്പോൾ കൊല്ലപ്പെടുന്നത്.
അടിയന്തര വെടിനിർത്തലിന് വേണ്ടിയുള്ള യുഎൻ ഉദ്യോഗസ്ഥരുടെ അഭ്യർത്ഥനകളും ഭൂരിഭാഗ അന്താരാഷ്ട്ര സമൂഹത്തിന്റെ വെടിനിർത്തലിനുള്ള ആഹ്വാനവും ടെൽ അവീവിലും വാഷിംഗ്ടണിലുമുള്ള ബധിരരുടെ ചെവികളിലാണ് ചെന്നു പതിക്കുന്നത്. അതുമല്ലെങ്കില്‍ അന്ധരുടെ മുമ്പില്‍ ചിത്രങ്ങള്‍ വരച്ചതുപോലെയാണ്. ഇത് അങ്ങേയറ്റം ഭയാനകമാണ്. അമേരിക്കൻ പിന്തുണയാൽ ധൈര്യപ്പെട്ട്, ഇസ്രായേൽ അധിനിവേശ വെസ്റ്റ് ബാങ്കിലുടനീളം റെയ്ഡുകൾ ശക്തമാക്കിക്കൊണ്ടിരിക്കുന്നു. ഫലസ്തീനികൾക്കെതിരെ ജൂത കുടിയേറ്റക്കാരുടെ വർദ്ധിച്ചുവരുന്ന അക്രമത്തെ പ്രോത്സാഹിപ്പിക്കുകയും ചെയ്യുന്നു.
മുസ്ലീം രാജ്യങ്ങളിൽ നിന്നുള്ള പ്രതികരണം ഗാസയിലെ വിനാശകരമായ സാഹചര്യവുമായി പൊരുത്തപ്പെടുകയോ സ്വന്തം ജനതയുടെ പ്രതീക്ഷകൾ നിറവേറ്റുകയോ ചെയ്തില്ല. ഗാസയിൽ ഇസ്രായേൽ നടത്തുന്ന ഒരു മാസത്തെ യുദ്ധത്തിന് ശേഷം ഓർഗനൈസേഷൻ ഓഫ് ഇസ്ലാമിക് കോ ഓപ്പറേഷന്റെ (ഒഐസി) ഉച്ചകോടി റിയാദിൽ വിളിച്ചുകൂട്ടി. ആ ഉച്ചകോടിയില്‍ നേതാക്കള്‍ കടുത്ത പദപ്രയോഗങ്ങളിലൂടെ ഇസ്രായേലിനെ അപലപിക്കുകയും ചെയ്തു. എന്നാൽ, ഇസ്രായേലിനും യുഎസിനും മേൽ കാര്യമായ നയതന്ത്ര സമ്മർദ്ദം ചെലുത്താൻ കഴിയുന്ന നടപടി സ്വീകരിക്കുന്നതിൽ അവര്‍ പരാജയപ്പെട്ടു.
അതിനിടെ, ഗള്‍ഫ് മേഖലയിലേക്ക് യുദ്ധം വ്യാപിക്കുമെന്ന ഭയവും വർദ്ധിക്കുന്നുണ്ട്. ഒരു രാജ്യവും സംഘർഷം ആഗ്രഹിക്കുന്നില്ല. എന്നാൽ, ഗാസയ്‌ക്കെതിരായ ഇസ്രയേലിന്റെ യുദ്ധം കൂടുതൽ കാലം തുടരുകയാണെങ്കില്‍ സംഘർഷം മിഡിൽ ഈസ്റ്റിലുടനീളം ബഹുമുഖമായി വികസിക്കാനുള്ള സാധ്യത കൂടുതലാണ്. ഗാസയിൽ ആണവാക്രമണം നടത്തുക എന്നത് ഒരു പോംവഴിയാണെന്ന ഇസ്രായേൽ മന്ത്രിയുടെ പ്രസ്താവന ലോകമെമ്പാടും അലാറം മുഴക്കി. മന്ത്രിയെ മന്ത്രിസഭയിൽ നിന്ന് സസ്പെൻഡ് ചെയ്തെങ്കിലും (പിരിച്ചുവിട്ടിട്ടില്ല) അദ്ദേഹത്തിന്റെ നിരുത്തരവാദപരമായ പരാമർശം ഇസ്രായേൽ ഗവൺമെന്റിലെ അപകടകരമായ ചിന്തയെ അനാവരണം ചെയ്യുകയും മുസ്ലീം രാജ്യങ്ങളിൽ നിന്നും വാഷിംഗ്ടണിൽ നിന്നുപോലും അപലപനം ഏറ്റുവാങ്ങുകയും ചെയ്തു.
ഇസ്രയേലിന്റെ തീവ്ര നിലപാട് തുടര്‍ന്നാല്‍ അയൽ രാജ്യങ്ങളില്‍ വർദ്ധിച്ചുവരുന്ന സമ്മർദ്ദം ഒരു പ്രാദേശിക സംഘർഷം ഉരുത്തിരിയുമെന്ന യാഥാര്‍ത്ഥ്യത്തെ തള്ളിക്കളയാനാവില്ല. ഇസ്രയേലിന്റെ തീവ്രമായ ആക്രമണം തുടര്‍ന്നാല്‍ ഒരു യുദ്ധം “അനിവാര്യ”മാക്കുമെന്ന് ഇറാൻ വിദേശകാര്യ മന്ത്രി മുന്നറിയിപ്പ് നൽകിയത് ഗൗരവമായി എടുക്കേണ്ടതുണ്ട്. ഇത് ഒഴിവാക്കാനുള്ള ഒരേയൊരു മാർഗ്ഗം ഉടനടി വെടിനിർത്തലും ഫലസ്തീൻ ജനതയുടെ നിർബന്ധിത കുടിയിറക്ക് തടയലും മാത്രമാണ്. “പൂച്ചയ്ക്ക് ആര് മണി കെട്ടും” എന്ന ചോദ്യത്തിന് ഒരേയൊരു ഉത്തരമേ ഉള്ളൂ…. അതിന് യു എസ് ഭരണകൂടം തന്നെ മുന്‍‌കൈ എടുക്കണം.
