കൊല്‍ക്കത്ത: ഇന്ത്യൻ ക്രിക്കറ്റ് ടീമിന്റെ പ്രാക്ടീസ് ജേഴ്സിയുടെ നിറം മാറ്റിയത് രാഷ്ട്രീയ നീക്കമാണെന്ന് വെസ്റ്റ് ബംഗാള്‍ മുഖ്യമന്ത്രി മമ്‌ത ബാനര്‍ജി ആരോപിച്ചു. ബിജെപിയുടെ നേതൃത്വത്തിലുള്ള കേന്ദ്ര സർക്കാർ രാജ്യത്തെ ഏറ്റവും ജനപ്രിയ കായിക വിനോദത്തെ കാവിവൽക്കരിക്കാൻ ശ്രമിക്കുകയാണെന്ന് അതിനോട് വിയോജിപ്പ് പ്രകടിപ്പിച്ചുകൊണ്ട് അവര്‍ പറഞ്ഞു.
“ഞങ്ങളുടെ ഇന്ത്യൻ കളിക്കാരെ ഓർത്ത് ഞങ്ങൾ അഭിമാനിക്കുന്നു, അവർ ലോകകപ്പിൽ വിജയികളാകുമെന്ന് എനിക്ക് ഉറപ്പുണ്ട്, പക്ഷേ അവിടെയും ബിജെപി കാവി നിറം കൊണ്ടുവന്നു, ഞങ്ങളുടെ ആൺകുട്ടികൾ ഇപ്പോൾ കാവി നിറത്തിലുള്ള ജേഴ്‌സിയിലാണ് പരിശീലനം നടത്തുന്നത്. മെട്രോ സ്‌റ്റേഷനുകൾക്കും ബിജെപി കാവി ചായം പൂശി. ഇത് അസ്വീകാര്യമാണ്” അവര്‍ പറഞ്ഞു.
സെൻട്രൽ കൊൽക്കത്തയിലെ പോപ്പി മാർക്കറ്റിൽ ജഗദ്ധാത്രി പൂജയുടെ തുടക്കത്തിൽ സംസാരിക്കവെ, ക്രിക്കറ്റ് ടീമിന്റെ ജഴ്‌സിയിൽ മാത്രമല്ല, മെട്രോ സ്റ്റേഷനുകളുടെ പെയിന്റിംഗിലും ബിജെപികാവി നിറം ചേർത്തെന്ന് മമ്‌ത ബാനർജി ആരോപിച്ചു. ഈ സമയത്ത്, തന്റെ പ്രതിമകൾ സ്ഥാപിച്ച ഉത്തർപ്രദേശ് മുൻ മുഖ്യമന്ത്രി മായാവതിയേയും അവര്‍ പരിഹസിച്ചു.
രാഷ്ട്രം രാജ്യത്തെ ജനങ്ങളുടേതാണെന്നും ഒരു പാർട്ടിയുടെ ജനങ്ങളുടേതല്ലെന്നും ബിജെപിയെ പരിഹസിച്ചു. അതേസമയം, മമ്‌തയുടെ പരാമർശത്തിനെതിരെ ബിജെപി രൂക്ഷമായി പ്രതികരിച്ചു.
കുറച്ച് ദിവസങ്ങൾക്ക് ശേഷം നമ്മുടെ ദേശീയ പതാകയിൽ കാവി നിറമുള്ളത് എന്തുകൊണ്ടാണെന്ന് അവർ ചോദിച്ചേക്കുമെന്ന് ബിജെപി നേതാവ് രാഹുൽ സിൻഹ പറഞ്ഞു. അത്തരം പ്രസ്താവനകളോട് പ്രതികരിക്കുന്നത് പോലും ഉചിതമല്ലെന്ന് ഞങ്ങൾ കരുതുന്നതായും അദ്ദേഹം പറഞ്ഞു.
