ഹലാൽ സാക്ഷ്യപ്പെടുത്തിയ ഉൽപ്പന്നങ്ങൾക്കെതിരെ സംസ്ഥാന സർക്കാർ അടുത്തിടെ നടത്തിയ കർശന നടപടിയുടെ ഭാഗമായി, എഫ്എസ്ഡിഎ സംഘം ലഖ്നൗവിലും സംസ്ഥാനത്തുടനീളവും പരിശോധന നടത്തി.
ലഖ്നൗ: ‘ഹലാൽ സാക്ഷ്യപ്പെടുത്തിയ’ ഭക്ഷ്യ ഉൽപന്നങ്ങളുടെ ഉൽപ്പാദനം, സംഭരണം, വിതരണം, വിൽപ്പന എന്നിവ ഉത്തർപ്രദേശ് സർക്കാർ നിരോധിച്ചതിനെത്തുടർന്ന്, ഫുഡ് സേഫ്റ്റി ആൻഡ് ഡ്രഗ്സ് അതോറിറ്റി (എഫ്എസ്ഡിഎ) തലസ്ഥാനമായ ലഖ്നൗവിലും മറ്റ് നഗരങ്ങളിലും തിങ്കൾ, ചൊവ്വ ദിവസങ്ങളിൽ ഒന്നിലധികം സ്ഥലങ്ങളില്‍ റെയ്ഡുകൾ നടത്തി. മാളുകൾ, പലചരക്ക് കടകൾ, മൊത്തവ്യാപാര മാർക്കറ്റുകൾ എന്നിവിടങ്ങളിലാണ് സംഘങ്ങൾ പരിശോധന നടത്തിയത്.
ചില്ലറ വിൽപനക്കാർ പുതിയ നിയമം ലംഘിച്ചതായി കണ്ടെത്തിയില്ല എങ്കിലും എഫ്എസ്ഡിഎ ഉദ്യോഗസ്ഥർ വ്യാപാരികൾക്ക് മുന്നറിയിപ്പ് നൽകി. എല്ലാ നിരോധിത ഉൽപ്പന്നങ്ങളും ഉടനടി നീക്കം ചെയ്യണമെന്ന് ഉത്തരവുമിട്ടു. വരും ആഴ്ചകളിൽ തീവ്രമായ റെയ്ഡുകൾ പ്രതീക്ഷിക്കാമെന്നും അവര്‍ പറഞ്ഞു. നിരൊധിത സാധനങ്ങൾ വിൽക്കുന്ന സ്റ്റോറുകളെക്കുറിച്ചുള്ള വിവരങ്ങൾ നൽകി സഹായിക്കാൻ പ്രദേശവാസികള്‍ക്ക് നിര്‍ദ്ദേശങ്ങളും നല്‍കിയിട്ടുണ്ട്.
ഹലാൽ സാക്ഷ്യപ്പെടുത്തിയ ഉൽപ്പന്നങ്ങൾക്കെതിരെ സംസ്ഥാന സർക്കാർ അടുത്തിടെ നടത്തിയ കർശന നടപടിയുടെ ഭാഗമായി, എഫ്എസ്ഡിഎ സംഘം ലഖ്നൗവിലെ സഹാറ മാൾ, വികാസ് നഗറിലെ റിലയൻസ് സ്റ്റോർ, ബെസ്റ്റ് പ്രൈസ്, ഫൺ മാളിലെ സ്പെൻസർ സ്റ്റോർ, വികാസ് നഗറിലെ പതഞ്ജലി സ്റ്റോറുകൾ, ഗോമതി നഗറിലെ അപ്‌നാ മെഗാ മാർട്ട് എന്നിവിടങ്ങളിലാണ് മിന്നല്‍ പരിശോധന നടത്തിയത്.
ചൊവ്വാഴ്ച ഗോരഖ്പൂരിലെ ചീഫ് ഫുഡ് ഇൻഫർമേഷൻ ഓഫീസറുടെ നേതൃത്വത്തിൽ സിറ്റി മാളിലും എഡി മാളിലും റെയ്ഡ് നടത്തി. നഗരത്തിലുടനീളം 7 മുതൽ 8 വരെ സ്ഥലങ്ങളിൽ സംഘം പരിശോധന നടത്തിയെങ്കിലും ഹലാൽ സാക്ഷ്യപ്പെടുത്തിയ ഭക്ഷ്യവസ്തുക്കളൊന്നും കണ്ടെത്തിയില്ലെന്ന് ഉദ്യോഗസ്ഥർ അറിയിച്ചു.
മൊറാദാബാദിലെ കെഎഫ്‌സിയിൽ ഭക്ഷ്യവകുപ്പ് ഉദ്യോഗസ്ഥർ ചൊവ്വാഴ്ച റെയ്ഡ് നടത്തി. പീൽ കോത്തിയിൽ സ്ഥിതി ചെയ്യുന്ന കെഎഫ്‌സിയിലെ ഭക്ഷണശാലകളിൽ ഹലാൽ സാക്ഷ്യപ്പെടുത്തിയ ഉൽപ്പന്നങ്ങൾ ഇപ്പോഴും ഉപയോഗിക്കുന്നുണ്ടോയെന്നും പരിശോധിച്ചു.
സോൻഭദ്രയിൽ, ഒബ്രയിലെ റിലയൻസ് ഫുഡ് സ്റ്റോറിൽ ഭക്ഷ്യവകുപ്പ് ഉദ്യോഗസ്ഥർ റെയ്ഡ് നടത്തി. ഓപ്പറേഷനിൽ, ഉഴുന്നു പരിപ്പ്, ഗോതമ്പ് ഡാലിയ, ചുവന്ന മുളക് പൊടി എന്നിവയുൾപ്പെടെ വിവിധയിനം സാധനങ്ങൾ പിടിച്ചെടുത്തു. ഫുഡ് സേഫ്റ്റി ഓഫീസറുടെ നേതൃത്വത്തിലുള്ള സംഘം കൂടുതൽ അന്വേഷണത്തിനായി പിടിച്ചെടുത്ത സാധനങ്ങളുടെ സാമ്പിളുകൾ ശേഖരിച്ചു.
നിരവധി ഭക്ഷ്യ ഉൽപന്നങ്ങൾ, പാലുൽപ്പന്നങ്ങൾ, പഞ്ചസാര, ബേക്കറി ഉൽപന്നങ്ങൾ, കുരുമുളക് എണ്ണ, സ്നാക്ക്സ്, ഫുഡ് ഓയിൽ എന്നിവയുടെ ഹലാൽ സർട്ടിഫിക്കേഷൻ ഉത്തർപ്രദേശ് സർക്കാർ ഔദ്യോഗികമായി നിരോധിച്ചിട്ടുണ്ട്. ഈ നിരോധനം 2006-ലെ ഫുഡ് സേഫ്റ്റി ആൻഡ് സ്റ്റാൻഡേർഡ്സ് ആക്ടിൽ പറഞ്ഞിരിക്കുന്ന നിയന്ത്രണങ്ങളുമായി പൊരുത്തപ്പെടുന്നു. FSSAI-യും ISI-യും ഭക്ഷണത്തിന്റെ ഗുണനിലവാരം പരിശോധിക്കേണ്ടതുണ്ട്. ഈ മാനദണ്ഡങ്ങൾ ലംഘിക്കുന്നവർക്കെതിരെ ഭക്ഷ്യസുരക്ഷാ-നിലവാര നിയമപ്രകാരം പിഴ ഈടാക്കും. കൂടാതെ, മരുന്നുകൾ, മെഡിക്കൽ ഉപകരണങ്ങൾ, സൗന്ദര്യവർദ്ധക വസ്തുക്കൾ, ഹലാൽ സർട്ടിഫിക്കേഷൻ ഉള്ള മറ്റ് വിവിധ ഉൽപ്പന്നങ്ങൾ എന്നിവ ഉൾപ്പെടുന്നതിലേക്കും നിരോധനം വ്യാപിപ്പിക്കാൻ സാധ്യതയുണ്ട്.
