ന്യൂഡൽഹി: പ്രധാനമന്ത്രി നരേന്ദ്ര മോദിക്കെതിരായ പരാമർശത്തിൽ കോൺഗ്രസ് എംപി രാഹുൽ ഗാന്ധിക്ക് തിരഞ്ഞെടുപ്പ് കമ്മിഷൻ കാരണം കാണിക്കൽ നോട്ടീസ് അയച്ചു. രാജസ്ഥാനിലെ ബാർമറിൽ തിരഞ്ഞെടുപ്പ് റാലിയിൽ രാഹുല്‍ നടത്തിയ പരാമർശങ്ങൾ സംബന്ധിച്ച് ഭാരതീയ ജനതാ പാർട്ടിയുടെ (ബിജെപി) പരാതിയെ തുടർന്നാണ് നോട്ടീസ്.
ഒരു പ്രധാനമന്ത്രിയെ ‘ജൈബ് കത്ര’ (പോക്കറ്റടിക്കാരന്‍) യോട് ഉപമിക്കുകയും ‘പനോട്ടി’ (ദുശ്ശകുനം) എന്ന വാക്ക് ഉപയോഗിക്കുകയും ചെയ്യുന്നത് ഒരു ദേശീയ രാഷ്ട്രീയ പാർട്ടിയുടെ വളരെ മുതിർന്ന നേതാവിന് യോഗ്യമല്ലെന്ന് തിരഞ്ഞെടുപ്പ് കമ്മീഷൻ പറഞ്ഞു.
നവംബർ 25 ന് തിരഞ്ഞെടുപ്പ് കമ്മീഷനു മുന്നിൽ ഹാജരാകാനാണ് സമന്‍സ് അയച്ചിരിക്കുന്നത്. തിരഞ്ഞെടുപ്പ് റാലിക്കിടെ
രാഹുലിന്റെ പ്രസ്താവന ഉയർത്തിക്കാട്ടിയാണ് പരാതി. “പോക്കറ്റടിക്കാരൻ ഒരിക്കലും ഒറ്റയ്ക്ക് വരില്ല, മൂന്ന് പേരായിരിക്കും വരിക. ഒരാൾ മുന്നിൽ നിന്ന് വരുന്നു, ഒരാൾ പിന്നിലും മറ്റൊരാള്‍ ദൂരെ നിന്നും വരുന്നു. മുന്നില്‍ നിന്ന് വരുന്ന ആള്‍ നിങ്ങളുടെ ശ്രദ്ധ തിരിക്കും.. അതാണ് പ്രധാനമന്ത്രി നരേന്ദ്ര മോദിയുടെ ജോലി, മുന്നിൽ നിന്ന് ടിവിയിൽ വന്ന് ഹിന്ദു-മുസ്ലിം, നോട്ട് നിരോധനം, ജിഎസ്ടി തുടങ്ങിയ വിഷയങ്ങൾ ഉന്നയിച്ച് പൊതുജനങ്ങളുടെ ശ്രദ്ധ തിരിക്കുന്നു, അതിനിടയിലാണ് പിന്നില്‍ നിന്ന് അദാനി വന്ന് നിങ്ങളുടെ പണം അടിച്ചുമാറ്റുന്നത്,” ഇതാണ് രാഹുല്‍ ഗാന്ധി പറഞ്ഞത്.
“ആരെയെങ്കിലും ജൈബ് കത്ര നിന്ദ്യമായ അധിക്ഷേപത്തിനും വ്യക്തിപരമായ ആക്രമണത്തിനും മാത്രമല്ല, അദ്ദേഹത്തിന്റെ പ്രശസ്തിക്ക് ഹാനികരമാക്കാൻ വ്യക്തമായ ഉദ്ദേശ്യത്തോടെ അത്തരമൊരു പരാമർശം നടത്തിയ വ്യക്തിയുടെ സ്വഭാവഹത്യയ്ക്കും തുല്യമാണ്,” ബിജെപിയുടെ പരാതിയിൽ പറഞ്ഞു.
പനോട്ടി എന്നത് ‘ദുശ്ശകുനം’ എന്നർത്ഥമുള്ള ഒരു പദമായിട്ടാണ് പൊതുവെ മനസ്സിലാക്കപ്പെടുന്നത്. പ്രശ്‌നങ്ങളുടെയോ ദൗർഭാഗ്യമോ ഉണ്ടാക്കുന്ന ഒരു വ്യക്തിയെയോ സാഹചര്യത്തെയോ ഉദ്ദേശിച്ചാണ് ഈ വാക്ക് ഉപയോഗിക്കുന്നത്.
