ഹൈദരാബാദ്: കോൺഗ്രസ് നേതൃത്വത്തിലുള്ള യുപിഎ ഭരണത്തിന് കീഴിൽ ഇന്ത്യ ഭീകരാക്രമണങ്ങളും ഭീകരരുടെ നുഴഞ്ഞുകയറ്റവും തഴച്ചുവളര്‍ന്നിരുന്നു എന്ന് ഉത്തർപ്രദേശ് മുഖ്യമന്ത്രി യോഗി ആദിത്യനാഥ്. തെലങ്കാനയിലെ മഹബൂബ് നഗർ ജില്ലയിൽ തിരഞ്ഞെടുപ്പ് റാലികളെ അഭിസംബോധന ചെയ്യവേയാണ് അദ്ദേഹത്തിന്റെ പരാമര്‍ശം. പ്രധാനമന്ത്രി നരേന്ദ്ര മോദിയുടെ നേതൃത്വത്തിൽ രാജ്യത്തിന്റെ അതിർത്തികൾ സുരക്ഷിതമാക്കിയെന്നും യോഗി പറഞ്ഞു.
കോൺഗ്രസ് നേതൃത്വത്തിലുള്ള യുപിഎ സർക്കാർ കേന്ദ്രത്തിൽ അധികാരത്തിലിരുന്ന കാലത്താണ് (നവംബർ 26, 2008) മുംബൈയിൽ ഭീകരർ ഏറ്റവും വലിയ ഭീകരാക്രമണം നടത്തിയതെന്ന് അദ്ദേഹം അനുസ്മരിച്ചു.
“കോൺഗ്രസ് ഭരണകാലത്ത് ഭീകരാക്രമണങ്ങളും ഭീകരരുടെ നുഴഞ്ഞുകയറ്റവും ഉണ്ടായിട്ടുണ്ട്. എന്നാൽ, ഇന്ന് ഭീകരാക്രമണങ്ങളും ഭീകരരുടെ നുഴഞ്ഞുകയറ്റവും സംഭവിക്കുന്നില്ല. കാരണം, തീവ്രവാദികളെ എല്ലാവർക്കും തിരിച്ചറിയാം, അവരുടെ ‘മുതലാളിമാര്‍ക്ക്’ ഇത് പ്രധാനമന്ത്രി മോദിയുടെ നേതൃത്വത്തിലുള്ള ‘പുതിയ ഇന്ത്യ’ ആണെന്നും അറിയാം. ഇന്ത്യ ആരെയും പ്രകോപിപ്പിക്കില്ല, ആരെങ്കിലും പ്രകോപിപ്പിച്ചാൽ അത് സഹിക്കുകയില്ലെന്നും യോഗി ആദിത്യനാഥ് പറഞ്ഞു.
വ്യോമാക്രമണത്തിലൂടെയോ സർജിക്കൽ സ്‌ട്രൈക്കുകളിലൂടെയോ ആയാലും ഉത്തരം നൽകാൻ ഇന്ത്യക്ക് അറിയാമെന്നും “നമ്മുടെ അതിർത്തികൾ സുരക്ഷിതമാക്കിയിരിക്കുന്നു” എന്നും അദ്ദേഹം പറഞ്ഞു. ഇപ്പോൾ ഇത് “പുതിയ ഇന്ത്യ” ആണെന്നും അന്താരാഷ്ട്ര വേദിയിൽ ഇന്ത്യയുടെ സ്ഥാനം വളർന്നുവെന്നും അതിർത്തികൾ സുരക്ഷിതമാണെന്നും അദ്ദേഹം പറഞ്ഞു.
രാജ്യത്ത് ഭീകരവാദത്തിനും നക്‌സൽ പ്രശ്‌നങ്ങൾക്കും പരിഹാരമുണ്ടാക്കുമെന്ന് അദ്ദേഹം പറഞ്ഞു. വിവേചനമില്ലാതെ ക്ഷേമപദ്ധതികൾ നടപ്പാക്കുന്നുണ്ടെന്നും അദ്ദേഹം പറഞ്ഞു. തെലങ്കാനയിലെ കെ ചന്ദ്രശേഖർ റാവുവിന്റെ നേതൃത്വത്തിലുള്ള ബിആർഎസ് സർക്കാരിനെ അഴിമതി, വംശീയ രാഷ്ട്രീയം എന്നിവ ആരോപിച്ച് ആക്രമിക്കുകയും പ്രീണന നയമാണ് തുടരുന്നതെന്നും അദ്ദേഹം ആരോപിച്ചു.
തെലങ്കാന ഇന്ന് മാഫിയ രാജിന്റെ പിടിയിലാണെന്നും, ഭൂ-ഖനന മാഫിയക്കെതിരെയും, അവരുടെ സംഘടിത കുറ്റകൃത്യങ്ങള്‍ക്കെതിരെയും മുന്നറിയിപ്പ് നൽകാനാണ് താൻ ഇവിടെ എത്തിയതെന്നും അദ്ദേഹം പറഞ്ഞു.
2017-ന് മുമ്പ് ഉത്തർപ്രദേശിലും മാഫിയ നിലനിന്നിരുന്നു. കലാപങ്ങൾ നടക്കാറുണ്ടായിരുന്നു, മാഫിയയുടെ സമാന്തര സർക്കാരാണ് നടന്നിരുന്നത്. എന്നാൽ, ഇന്ന് പ്രധാനമന്ത്രി നരേന്ദ്ര മോദിയുടെ നേതൃത്വത്തിൽ യുപിയിൽ ബിജെപിയുടെ ഇരട്ട എഞ്ചിൻ സർക്കാരാണ് ഉള്ളതെന്ന് അദ്ദേഹം പറഞ്ഞു. ഇപ്പോൾ അവിടെ കലാപങ്ങളൊന്നും നടക്കുന്നില്ലെന്നും അദ്ദെഹം പറഞ്ഞു.
ബുൾഡോസറാണ് ഉത്തരം
യുപിയിലെ മാഫിയകൾക്കും ക്രിമിനലുകൾക്കുമെതിരായ ഫലപ്രദമായ “ചികിത്സ” എന്നാണ് അദ്ദേഹം “ബുൾഡോസർ” ഉപയോഗത്തെ വിശേഷിപ്പിച്ചത്. “യുപിയിലെ മാഫിയകൾക്കും ക്രിമിനലുകൾക്കും മുകളിലൂടെ ബുൾഡോസർ ഓടുന്നത് നിങ്ങള്‍ കണ്ടുകാണും….. അതാണ് (ബുൾഡോസർ) പ്രതിവിധി,” അദ്ദേഹം പറഞ്ഞു.
കോൺഗ്രസായാലും ബിആർഎസായാലും അവർക്ക് എഐഎംഐഎമ്മിൽ ഒരു പൊതു സുഹൃത്തുണ്ടെന്നും ആദിത്യനാഥ് പറഞ്ഞു. “അവർ തെലങ്കാനയുടെ ആത്മാഭിമാനത്തിലാണ് കളിക്കുന്നത്. അവർക്ക് കീഴിൽ, മാഫിയ തഴച്ചുവളരുന്നു,” അദ്ദേഹം ആരോപിച്ചു, മൂന്ന് പേരിൽ ആർക്കെങ്കിലും വോട്ട് പോയാൽ അവർ വീണ്ടും ശക്തി പ്രാപിക്കുമെന്നും അദ്ദേഹം പറഞ്ഞു.
ബിആർഎസ് സർക്കാർ സംസ്ഥാനത്തെ ജനങ്ങളുടെ സ്വപ്നങ്ങൾ തകർത്തെന്നും അദ്ദേഹം കുറ്റപ്പെടുത്തി. രൂപീകരിക്കുമ്പോൾ റവന്യൂ മിച്ചമായിരുന്ന തെലങ്കാന ഇപ്പോൾ കടക്കെണിയിലാണെന്നും അദ്ദേഹം പറഞ്ഞു. റിക്രൂട്ട്‌മെന്റ് പരീക്ഷാ പേപ്പർ ചോർച്ചയിൽ ബിആർഎസ് സർക്കാരിനെ കടന്നാക്രമിച്ച അദ്ദേഹം, തെലങ്കാന സർക്കാരിന് സംസ്ഥാനത്ത് യുവാക്കൾക്ക് ജോലി നൽകാൻ കഴിയുന്നില്ലെന്നും അവകാശപ്പെട്ടു.
കഴിഞ്ഞ ആറ് വർഷത്തിനിടെ ഉത്തർപ്രദേശിൽ ആറ് ലക്ഷം യുവാക്കൾക്ക് സർക്കാർ ജോലി നൽകിയെന്നും യുവാക്കൾക്ക് ജോലി നൽകുന്നതിൽ തെലങ്കാന സർക്കാർ പരാജയപ്പെട്ടെന്നും ആദിത്യനാഥ് ആരോപിച്ചു. കെസിആറിന് വോളണ്ടറി റിട്ടയർമെന്റ് നൽകണമെന്നും അതുകൊണ്ടാണ് ടിആർഎസ് ബിആർഎസായതെന്നും അദ്ദേഹത്തിന് (കെസിആർ) വിആർഎസ് നൽകണമെന്നും യുപി മുഖ്യമന്ത്രി പറഞ്ഞു.
പ്രധാനമന്ത്രി നരേന്ദ്ര മോദി 2024 ജനുവരി 22 ന് അയോദ്ധ്യയിൽ രാമക്ഷേത്രം ഉദ്ഘാടനം ചെയ്യുന്നതിനെ പരാമർശിച്ച്, കോൺഗ്രസ് ഭരിച്ചിരുന്നെങ്കില്‍ അയോദ്ധ്യയിൽ രാമക്ഷേത്രം നിർമ്മിക്കാൻ കഴിയുമായിരുന്നോ എന്നും യോഗി ചോദിച്ചു.
