ആലപ്പുഴ: ശ്രീനാരായണ (എസ്എൻ) ട്രസ്റ്റ് സെക്രട്ടറിയായി വെള്ളാപ്പള്ളി നടേശൻ വീണ്ടും തിരഞ്ഞെടുക്കപ്പെട്ടു. എതിരില്ലാതെയാണ് വെള്ളാപ്പള്ളിയുടെ പാനല്‍ തിരഞ്ഞെടുക്കപ്പെട്ടത്. എസ്എൻ ട്രസ്റ്റ് ചെയർമാനായി എംഎൻ സോമൻ വീണ്ടും തെരഞ്ഞെടുക്കപ്പെട്ടപ്പോൾ തുഷാർ വെള്ളാപ്പള്ളി അസിസ്റ്റന്റ് സെക്രട്ടറിയായി വീണ്ടും തിരഞ്ഞെടുക്കപ്പെട്ടു. ട്രസ്റ്റിന്റെ ട്രഷററായി ജി. ജയദേവനെ തിരഞ്ഞെടുത്തു. ശനിയാഴ്ച ചേർത്തലയിൽ ചേർന്ന എസ്എൻ ട്രസ്റ്റ് യോഗത്തിലാണ് തിരഞ്ഞെടുപ്പ് ഫലം പ്രഖ്യാപിച്ചത്. തുടർച്ചയായി 10ാം തവണയാണു വെള്ളാപ്പള്ളി നടേശൻ സെക്രട്ടറിയാകുന്നത്.
എക്സിക്യൂട്ടീവ് അംഗങ്ങൾ: എസ്.ആർ.എം.അജി, മോഹൻ ശങ്കർ, എൻ.രാജേന്ദ്രൻ, കെ.പത്മകുമാർ, എ.സോമരാജൻ, കെ.ആർ.ഗോപിനാഥ്, പി.എൻ.രവീന്ദ്രൻ, സന്തോഷ് അരയക്കണ്ടി, മേലാൻകോട് വി.സുധാകരൻ, ഡോ. എ.വി.ആനന്ദരാജ്, പി.സുന്ദരൻ, കെ.അശോകൻ പണിക്കർ, സംഗീത വിശ്വനാഥൻ, പ്രേമരാജ്, എ.ജി.തങ്കപ്പൻ, പി.എൻ.നടരാജൻ, പി.വി.ബിനേഷ് പ്ലാത്താനത്ത്. വിദഗ്ധ അംഗങ്ങൾ: ഡോ. ജയറാം, മേലാൻകോട് വി.സുധാകരൻ, പ്രദീപ് വിജയൻ. മുഖ്യ വരണാധികാരി രാജേഷ് കണ്ണനാണു വിജയികളെ പ്രഖ്യാപിച്ചത്.
ഇന്ത്യൻ യൂണിയൻ മുസ്ലിം ലീഗിനെതിരെ (ഐ‌യു‌എം‌എൽ) യോഗത്തെ അഭിസംബോധന ചെയ്യവെ നടേശൻ വിമർശിച്ചു.
ഐയുഎംഎല്ലിന്റെ പിന്തുണയില്ലാതെയാണ് എൽഡിഎഫ് അധികാരത്തിലെത്തിയത്. “ഐയുഎംഎല്ലിനെ അവരുടെ പാര്‍ട്ടിയിലേക്ക് കൊണ്ടുവരാനുള്ള എൽഡിഎഫിന്റെ നീക്കം അതിനെ പിന്തുണച്ചവരെയും വോട്ട് ചെയ്തവരെയും വേദനിപ്പിച്ചു,” ഐയുഎംഎല്ലിനെ ആകർഷിക്കുന്നതിൽ പരാജയപ്പെട്ടത് ഭരണമുന്നണിക്ക് ആഘാതമാണെന്ന് നടേശൻ പറഞ്ഞു.
നവ കേരള യാത്രയില്‍ പോലും മുസ്ലിം ലീഗിനാണ് ഡിമാന്റ്. പശുവിന്റെ കടിയും കാക്കയുടെ വിശപ്പും യാത്രയിലൂടെ തീരും. ലീഗിനെ കൂടെ കൂട്ടാനുള്ള മത്സരമാണ് നടക്കുന്നത്. ഇടതുപക്ഷം ലീഗിനോട് അടുക്കുന്നത് സാധാരണക്കാരന്‍ ഇഷ്ടപ്പെടുന്നില്ല. അടിസ്ഥാന വര്‍ഗമാണ് ഇടതു സര്‍ക്കാരിനെ അധികാരത്തിലെത്തിച്ചത്. ലോക്‌സഭാ തിരഞ്ഞെടുപ്പില്‍ സീറ്റ് കിട്ടാനുള്ള വിലപേശലാണ് മുസ്ലിം ലീഗ് നടത്തുന്നത്. കോണ്‍ഗ്രസ് സീറ്റ് കൊടുക്കും. മലബാറില്‍ കോണ്‍ഗ്രസ് ഇല്ലാതാകും. എന്തിനാണ് നാണംകെട്ട് എല്‍ഡിഎഫ് ലീഗിന്റെ പിന്നാലെ പോകുന്നതെന്നും വെള്ളാപ്പള്ളി ചോദിച്ചു.
