ന്യൂഡൽഹി: രാഷ്ട്രപതിയുടെ വിശിഷ്ട സേവനത്തിനുള്ള മെഡൽ (പിഎസ്എം), സ്തുത്യർഹ സേവനത്തിനുള്ള മെഡൽ (എംഎസ്എം) എന്നിവയ്ക്കുള്ള സ്വീകർത്താക്കളുടെ പേരുവിവര ശേഖരണ നടപടികൾ വേഗത്തിലാക്കാൻ ആഭ്യന്തര മന്ത്രാലയം (എംഎച്ച്എ) എല്ലാ സംസ്ഥാനങ്ങളോടും കേന്ദ്ര ഭരണ പ്രദേശങ്ങളോടും (യുടി) കേന്ദ്ര വകുപ്പുകളോടും ആവശ്യപ്പെട്ടു. പ്രസ്തുത അവാര്‍ഡുകള്‍ 2024ലെ റിപ്പബ്ലിക് ദിനത്തിൽ സമ്മാനിക്കും.
നവംബർ 24 ന് പുറത്തിറക്കിയ കത്തിൽ, PSM, MSM അവാർഡുകൾക്കുള്ള ശുപാർശകൾ സമർപ്പിക്കുന്നതിനുള്ള സമയപരിധി നവംബർ 30 വരെ നീട്ടിയതായി ബന്ധപ്പെട്ട എല്ലാ കക്ഷികളോടും MHA ആവർത്തിച്ചു. വിവിധ സംസ്ഥാനങ്ങൾ, യുടികൾ, കേന്ദ്ര സായുധ പോലീസ് സേന (സിഎപിഎഫ്), സെൻട്രൽ പോലീസ് ഓർഗനൈസേഷനുകൾ (സിപിഒകൾ), ഓർഗനൈസേഷനുകൾ എന്നിവയിൽ നിന്നുള്ള നാമനിർദ്ദേശങ്ങളുടെ അഭാവം എംഎച്ച്എയുടെ കത്തിൽ എടുത്തുകാട്ടിയിട്ടുണ്ട്.
2023 നവംബർ 30-നോ അതിനുമുമ്പോ PSM, MSM അവാർഡുകൾക്കുള്ള നോമിനേഷനുകൾ സമയബന്ധിതമായി സമർപ്പിക്കണമെന്ന് കത്തിൽ ആവശ്യപ്പെട്ടു. ചീഫ് സെക്രട്ടറിമാർ, ആഭ്യന്തര സെക്രട്ടറിമാർ, എല്ലാ സംസ്ഥാനങ്ങളിലും കേന്ദ്രഭരണ പ്രദേശങ്ങളിലും ഉള്ള പോലീസ് ഡയറക്ടർ ജനറൽമാര്‍, ഇന്റലിജൻസ് ബ്യൂറോ, സെൻട്രൽ ബ്യൂറോ ഓഫ് ഇൻവെസ്റ്റിഗേഷൻ, മറ്റ് പ്രസക്തമായ കേന്ദ്ര ഏജൻസികൾ, വകുപ്പുകൾ, രാജ്യസഭ, ലോക്‌സഭ എന്നിവയുടെ ഡയറക്ടർമാർക്ക് MHA സമാനമായ നിര്‍ദ്ദേശങ്ങള്‍ നല്‍കിയിട്ടുണ്ട്.
കൂടാതെ, അഗ്നിശമനസേനാ മേധാവികൾ, സിവിൽ ഡിഫൻസ് ഡയറക്ടർമാർ, ജയിൽ അധികൃതർ, സംസ്ഥാനങ്ങളിലെയും കേന്ദ്രഭരണ പ്രദേശങ്ങളിലെയും കമാൻഡന്റ് ജനറൽ ഓഫ് ഹോം ഗാർഡ്‌സ്, ആഭ്യന്തര മന്ത്രാലയത്തിലെ എല്ലാ ഡിവിഷനുകൾ എന്നിവര്‍ക്കും എം എച്ച് എ നിര്‍ദ്ദേശം നല്‍കിയിട്ടുണ്ട്.
മുമ്പ് പുറപ്പെടുവിച്ച പ്രഖ്യാപനത്തില്‍ നവംബർ 17-നായിരുന്നു ശുപാര്‍ശകള്‍ അയക്കേണ്ട അവസാന തിയ്യതി. ആ സമയപരിധി നവംബർ 30 വരെ നീട്ടിയത് വിവിധ സംസ്ഥാനങ്ങൾ, UTകൾ, CAPF-കൾ, CPO-കൾ, ബന്ധപ്പെട്ട സംഘടനകൾ എന്നിവയിൽ നിന്നുള്ള അഭ്യർത്ഥനകളെ മാനിച്ചാണെന്ന് എം എച്ച് എ പറഞ്ഞു.
