കൊല്ലം: 20 മണിക്കൂർ നീണ്ട തിരച്ചിലിനൊടുവില്‍, ഓയൂരിൽ നിന്ന് കാണാതായ ആറു വയസുകാരിയെ ചൊവ്വാഴ്ച ഉച്ചയ്ക്ക് 1.30 ഓടെ കൊല്ലം ആശ്രമം മൈതാനത്തിന് സമീപം ഉപേക്ഷിച്ച നിലയിൽ കണ്ടെത്തി.
“കുട്ടി ഒരു ബെഞ്ചിൽ ഒറ്റയ്ക്ക് ഇരിക്കുന്നത് കണ്ട രണ്ട് കോളേജ് വിദ്യാർത്ഥികളാണ് കുട്ടിയെ തിരിച്ചറിഞ്ഞത്. “ഒരു സ്ത്രീയും കുട്ടിയോടൊപ്പമുണ്ടായിരുന്നു. ഞങ്ങളെ കണ്ടയുടനെ പെട്ടെന്ന് ആ സ്ത്രീ നടന്നുപോയി. തിരികെ വരാത്തതിനെ തുടർന്ന് ഞങ്ങൾ കുട്ടിയുടെ അടുത്ത് ചെന്ന് സോഷ്യൽ മീഡിയയിലെ ഫോട്ടോകളുടെ സഹായത്തോടെ അവളെ തിരിച്ചറിഞ്ഞു. സ്ത്രീ
മാസ്ക് ധരിച്ചിരുന്നു, തലയും മറച്ചിരുന്നു. കുട്ടിയും മാസ്ക് ധരിച്ചിരുന്നു,”ഒരു വിദ്യാർത്ഥി പറഞ്ഞു.
കുട്ടിയുമായി ആശ്രമത്തിലേക്ക് പോകാൻ ലിങ്ക് റോഡിൽ നിന്ന് ഒരു ഓട്ടോറിക്ഷ വാടകയ്‌ക്കെടുത്തതായി ഒരു ഓട്ടോറിക്ഷാ ഡ്രൈവര്‍ പറഞ്ഞു.
ചില ദൃക്‌സാക്ഷി വിവരണങ്ങൾ അനുസരിച്ച്, രണ്ട് പുരുഷന്മാരും ഒരു സ്ത്രീയും അടങ്ങുന്ന സംഘം ഒരു കുട്ടിയുമായി ആദായനികുതി ക്വാർട്ടേഴ്സിലേക്ക് കടക്കാൻ ശ്രമിച്ചു. സുരക്ഷാ ഉദ്യോഗസ്ഥർ പ്രവേശനം നിഷേധിച്ചതിനെത്തുടര്‍ന്ന് തിരിച്ചുപോയി. പിന്നീടാണ് കുട്ടിയെ ബെഞ്ചിൽ കണ്ടെത്തിയത്.
പോലീസ് സംഘം എത്തുന്നത് കാത്ത് സ്ഥലത്തുണ്ടായിരുന്ന ഒരാളുടെ ഫോണിൽ നിന്ന് കുട്ടി കുടുംബവുമായി ബന്ധപ്പെടുകയും പിന്നീട് എആർ ക്യാമ്പിൽ നിന്ന് വീഡിയോ കോളിലൂടെ അമ്മയോടും കുടുംബത്തോടും സംസാരിക്കുകയും ചെയ്തു.
ആദ്യ വിളി കേട്ട് അവളുടെ അച്ഛൻ കൊല്ലത്തേക്ക് കുതിച്ചു, പിന്നീട് അമ്മയും സഹോദരനും അവരോടൊപ്പം ചേർന്നു. വൈദ്യപരിശോധനയ്ക്ക് ശേഷം പെൺകുട്ടി കൊല്ലത്തെ സ്വകാര്യ ആശുപത്രിയിൽ നിരീക്ഷണത്തിലാണ്.
ഉദ്യോഗസ്ഥർ പറയുന്നതനുസരിച്ച്, നിയമപാലകരുടെയും മാധ്യമങ്ങളുടെയും പൊതുജനങ്ങളുടെയും കൂട്ടായ പരിശ്രമം തട്ടിക്കൊണ്ടുപോയവർക്ക് കുട്ടിയുമായി യാത്ര ചെയ്യുന്നത് അസാധ്യമാക്കി എന്നാണ്.
തട്ടിക്കൊണ്ടുപോയവര്‍ക്കായി പോലീസ് സംസ്ഥാന വ്യാപകമായി ഊർജ്ജിത അന്വേഷണമാണ് നടത്തിയിരുന്നത്. ഈ സാഹചര്യത്തിൽ കുട്ടിയുമായി ഇനിയും വാഹനയാത്ര സാദ്ധ്യമല്ലെന്നു മനസ്സിലാക്കിയ സംഘം കുട്ടിയെ ഉപേക്ഷിച്ചതാണെന്നാണ് പോലീസ് പറയുന്നത്. മോചനദ്രവ്യം അസാധ്യമാണെന്ന് മനസ്സിലാക്കിയതും കുട്ടിയെ ഉപേക്ഷിക്കാന്‍ കാരണമായി.
“തെക്കൻ കേരളം മുഴുവൻ കർശന നിരീക്ഷണത്തിലായിരുന്നു, എല്ലാ അതിർത്തികളും അടച്ചു. വാഹനങ്ങൾ മാത്രമല്ല, ഹോട്ടലുകൾ, ക്വാറികൾ, റബ്ബർ തോട്ടങ്ങൾ, കുടിലുകൾ എന്നിവിടങ്ങളിൽ പോലീസ് പരിശോധന നടത്തി. എല്ലാ ഭാഗത്തുനിന്നും സമ്മർദം ഉണ്ടായതിനെത്തുടർന്ന് കുട്ടിയെ സുരക്ഷിതമായി ഉപേക്ഷിക്കാൻ തട്ടിക്കൊണ്ടുപോയവർ നിർബന്ധിതരായി. കുട്ടി പറഞ്ഞതനുസരിച്ച് രാത്രി ഒരു വീട്ടിലേക്ക് കൊണ്ടുപോയി. ഭക്ഷണം നൽകുകയും ലാപ്‌ടോപ്പിൽ കാർട്ടൂൺ കാണാൻ അനുവദിക്കുകയും ചെയ്തു. ചൊവ്വാഴ്ച രാവിലെ മറ്റൊരു വാഹനത്തിൽ ചിന്നക്കടയിലേക്ക് കൊണ്ടുപോയി,” അഡീഷണൽ ഡയറക്ടർ ജനറൽ ഓഫ് പോലീസ് എംആർ അജിത് കുമാർ പറഞ്ഞു.
തട്ടിക്കൊണ്ടുപോയവർ ആദ്യം 5 ലക്ഷം രൂപയും പിന്നീട് 10 ലക്ഷം രൂപയും മോചനദ്രവ്യം ആവശ്യപ്പെട്ട് തിങ്കളാഴ്ച കുടുംബവുമായി ബന്ധപ്പെട്ടിരുന്നു. കുട്ടിയുടെ മാതാപിതാക്കളോട് പണം ക്രമീകരിക്കാനും ആവശ്യപ്പെട്ടു. ചൊവ്വാഴ്ച രാവിലെ 10 മണിയോടെ വീണ്ടും അവരെ ബന്ധപ്പെടുമെന്ന് പറഞ്ഞു. എന്നാല്‍, അവർക്ക് കോളൊന്നും ലഭിച്ചില്ല, രണ്ട് മണിക്കൂറിനുള്ളിൽ കൊല്ലം നഗരത്തിന്റെ ഹൃദയഭാഗത്ത് നിന്ന് കുട്ടിയെ കണ്ടെത്തി.
