കൊച്ചി: അടിയന്തര അവധിയ്‌ക്കോ സാധാരണ പരോളിനോ വേണ്ടി തടവുകാരോ അവരുടെ ബന്ധുക്കളോ നൽകുന്ന അപേക്ഷകൾ പരിഗണിക്കാനും അത്തരം അപേക്ഷകൾ സ്വീകരിച്ച് മൂന്നാഴ്‌ചയ്‌ക്കുള്ളിൽ ഉചിതമായ തീരുമാനങ്ങളെടുക്കാനും ജയിൽ അധികാരികളോട് കേരള ഹൈക്കോടതി നിർദേശിച്ചു.
ഉത്തരവിറക്കി ഒരാഴ്ചയ്ക്കകം എടുത്ത തീരുമാനം തടവുകാരെയും അവരുടെ ബന്ധുക്കളെയും ആവശ്യമെങ്കിൽ അറിയിക്കണമെന്നും ജസ്റ്റിസ് പി.വി. കുഞ്ഞികൃഷ്ണൻ നിർദേശിച്ചു.
അടിയന്തര അവധി, സാധാരണ പരോൾ അപേക്ഷകൾ എന്നിവയിൽ തീരുമാനമെടുക്കുന്നതിന് മുമ്പ് ലോക്കൽ പോലീസിൽ നിന്ന് എന്തെങ്കിലും റിപ്പോർട്ട് ആവശ്യപ്പെട്ടാൽ, ജയിൽ അധികൃതരിൽ നിന്നുള്ള അപേക്ഷ ലഭിച്ച തീയതി മുതൽ ഒരാഴ്ചയ്ക്കകം ലോക്കൽ പോലീസ് റിപ്പോർട്ട് സമർപ്പിക്കണമെന്നും കോടതി ഉത്തരവിട്ടു. ഇതുമായി ബന്ധപ്പെട്ട് എല്ലാ ജയിൽ അധികാരികൾക്കും ആവശ്യമായ നിർദ്ദേശങ്ങൾ നൽകാൻ പ്രിസൺസ് ആൻഡ് കറക്ഷണൽ സർവീസസ് ഡയറക്ടർ ജനറലിനോട് കോടതി നിർദ്ദേശിച്ചു.
ജീവപര്യന്തം തടവുശിക്ഷ അനുഭവിക്കുന്ന തൃശൂർ സ്വദേശി ഇരുമ്പൻ മനോജ് എന്ന മനോജിന്റെ ഭാര്യ രമ, അടിയന്തര അവധി അനുവദിക്കാൻ ജയിൽ അധികൃതർക്ക് നിർദേശം നൽകണമെന്നാവശ്യപ്പെട്ട് സമർപ്പിച്ച റിട്ട് ഹർജി പരിഗണിക്കവെയാണ് കോടതി ഈ നിർദേശം പുറപ്പെടുവിച്ചത്.
അടിയന്തര അവധിയ്‌ക്കോ സാധാരണ പരോളിനോ വേണ്ടി പ്രതികളും അവരുടെ അടുത്ത ബന്ധുക്കളും സമർപ്പിച്ച നിരവധി ഹർജികൾ കോടതിക്ക് മുമ്പാകെ വരുന്നുണ്ടെന്ന് കോടതി ചൂണ്ടിക്കാട്ടി. ഒരു അപേക്ഷ സമർപ്പിച്ചാൽ, ബന്ധപ്പെട്ട അധികാരികൾ അപേക്ഷയുടെ ഫലത്തെ കുറിച്ച് തടവുകാരനെയോ ബന്ധുക്കളെയോ അറിയിക്കുക പോലും ചെയ്യുന്നില്ലെന്ന് കോടതി പറഞ്ഞു. ഒരു അപേക്ഷ സമർപ്പിക്കുകയും അത് നിരസിക്കുകയും ചെയ്താൽ, തടവുകാരനോ അയാളുടെ ബന്ധുക്കൾക്കോ അപ്പീൽ അതോറിറ്റിയെ സമീപിക്കാനുള്ള പ്രതിവിധിയുണ്ട്. അതിനാല്‍ അടിയന്തര അവധി, സാധാരണ പരോള്‍ മുതലായവയ്ക്കുള്ള അപേക്ഷകള്‍ യഥാവിധി ഉടന്‍ തീര്‍പ്പാക്കേണ്ടത് ജയില്‍ അധികൃതരുടെ കടമയാണ്. ജയിലുകളിലെ തടവുകാർ ഇപ്പോഴും പൗരന്മാരാണ്, മറ്റേതൊരു പൗരനെയും പോലെ അവരുടെ അടിസ്ഥാന മനുഷ്യാവകാശങ്ങൾ നിഷേധിക്കപ്പെടരുത്, കോടതി അഭിപ്രായപ്പെട്ടു.
