ഇസ്‌ലാമാബാദ്: കനത്ത പുകമഞ്ഞിനെ നേരിടാൻ പാക്കിസ്താന് സമ്മാനമായി യു.എ.ഇ നടത്തിയ ക്ലൗഡ് സീഡിംഗ് പരീക്ഷണത്തെത്തുടർന്ന് പാക്കിസ്താന്റെ കിഴക്കൻ നഗരമായ ലാഹോറിൽ ശനിയാഴ്ച കൃത്രിമ മഴ പെയ്തതായി പഞ്ചാബ് മുഖ്യമന്ത്രി മൊഹ്‌സിൻ നഖ്‌വി അറിയിച്ചു.
സമീപ ആഴ്ചകളിൽ ലോകത്തിലെ ഏറ്റവും മലിനമായ നഗരങ്ങളിലൊന്നായി ലാഹോറിനെ തിരഞ്ഞെടുത്തതോടെ, പഞ്ചാബ് പ്രവിശ്യയിലെ ഇടക്കാല ഗവൺമെന്റിനെ സമ്മര്‍ദ്ദത്തിലാക്കിയിരുന്നു. സ്ഥിതിഗതികൾ നേരിടാൻ ആവശ്യമായ നടപടികൾ കൈക്കൊള്ളാൻ ഗവണ്മെന്റിനെ പ്രേരിപ്പിച്ചതാണ് കൃത്രിമ മഴ എന്ന ആശയം ഉടലെടുത്തതെന്ന് മുഖ്യമന്ത്രി പറഞ്ഞു.
നഗരത്തിന്റെ നിരവധി പ്രധാന അയൽപക്കങ്ങൾ ഉൾപ്പെടുന്ന 10 മുതൽ 15 കിലോമീറ്റർ ചുറ്റളവിൽ പരീക്ഷണം വിജയിച്ചതായി പ്രഖ്യാപിക്കുന്നതിന് മുമ്പ്, നഖ്‌വിയും അദ്ദേഹത്തിന്റെ ഭരണകൂടവും യുഎഇയുടെ സഹായത്തോടെ കൃത്രിമ മഴ പെയ്യിക്കാനുള്ള ആശയം ആഴ്‌ചകളോളം ചര്‍ച്ച ചെയ്തു.
“ഇന്ന്, ദൈവത്തിന്റെ കൃപയാൽ, പാക്കിസ്താനില്‍ ആദ്യത്തെ കൃത്രിമ മഴ പെയ്യിച്ചു,” അദ്ദേഹം ലാഹോറിൽ ഒരു വാർത്താ സമ്മേളനത്തിൽ പറഞ്ഞു. രാവിലെ നടത്തിയ ആദ്യ ദൗത്യം വിജയിച്ചു. രണ്ടാമത്തെ ദൗത്യം ഉടൻ ആരംഭിക്കുമെന്നും അദ്ദേഹം പറഞ്ഞു.
ഇത് യുഎഇ സർക്കാരിന്റെ സമ്മാനമായിരുന്നു. അവർ ഞങ്ങൾക്ക് വേണ്ടി എല്ലാം കൈകാര്യം ചെയ്തു. ഞങ്ങളുടെ ആളുകൾ അവരോടൊപ്പം പ്രവർത്തിക്കുകയായിരുന്നു എന്നും അദ്ദേഹം കൂട്ടിച്ചേര്‍ത്തു.
ദൗത്യം നിർവഹിക്കുന്നതിന് അനുയോജ്യമായ സാഹചര്യങ്ങൾക്കായി നിരവധി ദിവസങ്ങളോളം ലാഹോറിൽ കാത്തിരുന്ന ഒരു സാങ്കേതിക സംഘത്തോടൊപ്പം യുഎഇ രണ്ട് പ്രത്യേക വിമാനങ്ങൾ അയച്ചതായി നഖ്‌വി അറിയിച്ചു.
പുകമഞ്ഞിൽ കൃത്രിമ മഴ പെയ്യിച്ചാലുള്ള ആഘാതത്തെക്കുറിച്ച് ചോദിച്ചപ്പോൾ, തന്റെ ഭരണകൂടം സ്ഥിതിഗതികൾ സൂക്ഷ്മമായി നിരീക്ഷിച്ചുവരികയാണെന്ന് മുഖ്യമന്ത്രി പറഞ്ഞു. കാരണം, ഇത് ക്ലൗഡ് സീഡിംഗുമായി ബന്ധപ്പെട്ട രാജ്യത്തെ ആദ്യ അനുഭവമാണ്.
“മഴയിലൂടെ പുകമഞ്ഞിനെ മറികടക്കുക എന്നതായിരുന്നു പ്രാഥമിക ലക്ഷ്യം” എന്നും പുകമഞ്ഞ് കുറയുമ്പോൾ, അതിന്റെ ആഘാതം സാധാരണയായി അഞ്ച് മുതൽ ഏഴ് ദിവസം വരെ നീണ്ടുനിൽക്കുമെന്നും, എന്താണ് സംഭവിക്കുന്നതെന്ന് നോക്കാം എന്നുമായിരുന്നു മറുപടി.
ലാഹോറിലെ പുകമഞ്ഞിന്റെ പിന്നിലെ ഘടകങ്ങൾ തിരിച്ചറിയാൻ പഠിക്കേണ്ടത് പ്രധാനമാണെന്ന് നഖ്‌വി അഭിപ്രായപ്പെട്ടു.
