ന്യൂഡല്‍ഹി: കേരള ഗവർണർ ആരിഫ് മുഹമ്മദ് ഖാൻ തിരഞ്ഞെടുക്കപ്പെട്ട സംസ്ഥാന സർക്കാരിനെതിരായ നിരന്തരമായ രാഷ്ട്രീയ ആക്രമണങ്ങളിലൂടെയും അദ്ദേഹത്തിന്റെ “വളരെ ക്രമരഹിതമായ പെരുമാറ്റത്തിലൂടെയും” എല്ലാ അതിർവരമ്പുകളും ലംഘിച്ചുവെന്ന് സിപിഐ എം പൊളിറ്റ് ബ്യൂറോ പ്രസ്താവനയിൽ പറഞ്ഞു.
കാലിക്കറ്റ് യൂണിവേഴ്‌സിറ്റി കാമ്പസിനുള്ളിൽ തനിക്കെതിരെ കറുത്ത ബാനറുകൾ സ്ഥാപിക്കാൻ മുഖ്യമന്ത്രി പിണറായി വിജയൻ ഉത്തരവിട്ടെന്ന അദ്ദേഹത്തിന്റെ ആരോപണത്തോടുള്ള നേരിട്ടുള്ള പ്രതികരണമാണ് ഈ പ്രസ്താവന. ഗവർണർ ഞായറാഴ്ച കോഴിക്കോട്ട് ഒരു വിവാഹച്ചടങ്ങിൽ പങ്കെടുക്കാനെത്തിയപ്പോൾ, സിപിഐ എമ്മിന്റെ വിദ്യാർത്ഥി സംഘടനയായ സ്റ്റുഡന്റ്സ് ഫെഡറേഷൻ ഓഫ് ഇന്ത്യ (എസ്എഫ്ഐ) അംഗങ്ങൾ ഗവര്‍ണ്ണര്‍ താമസിച്ചിരുന്ന ഗസ്റ്റ് ഹൗസിന് പുറത്ത് ‘സംഘി ചാൻസലർ, ഗോ ബാക്ക്’ എന്നെഴുതിയ ബാനറുകൾ സ്ഥാപിച്ചു.
“മുഖ്യമന്ത്രിയുടെ നിർദ്ദേശം” ഇല്ലാതെ കറുത്ത ബാനറുകൾ കെട്ടാന്‍ കഴിയില്ലെന്ന് ഗവർണർക്ക് തോന്നിയെന്നും ഇത് വ്യക്തമായും സംസ്ഥാനത്തെ ഭരണഘടനാ സംവിധാനത്തിന്റെ തകർച്ചയുടെ തുടക്കമാണെന്നും രാജ്ഭവൻ പ്രസ്താവനയിറക്കി.
ഇവിടെ രാഷ്ട്രപതി ഭരണം ഏർപ്പെടുത്താൻ അദ്ദേഹം കളമൊരുക്കുകയായിരുന്നുവെന്ന് പലരും വിശ്വസിക്കുന്നു. ഇത്തരം ഭീഷണികൾ “സംസ്ഥാനത്തെ ജനങ്ങൾ പൂർണ്ണമായും തള്ളിക്കളയും” എന്ന് പൊളിറ്റ് ബ്യൂറോ പറഞ്ഞു.
കേരള, കാലിക്കറ്റ് സർവ്വകലാശാലകളിലെ സെനറ്റുകളിലേക്കുള്ള നോമിനേറ്റഡ് സീറ്റുകളിലേക്ക് ഗവർണർ തിരഞ്ഞെടുത്തതിൽ പ്രതിഷേധം നേരിടുകയാണ്. ഈ സർവ്വകലാശാലകളുടെ ചാൻസലർ പദവി അദ്ദേഹം ദുരുപയോഗം ചെയ്യുകയും ആർഎസ്എസ് നോമിനികളെ സീറ്റിൽ നിയമിക്കുകയും ചെയ്യുകയാണെന്ന് ഇടതുപാർട്ടികൾ ആരോപിച്ചു.
സമാധാനപരമായി പ്രതിഷേധിക്കാൻ വിദ്യാർത്ഥികൾക്ക് ജനാധിപത്യപരമായ അവകാശമുണ്ടെങ്കിലും, ഈ പ്രതിഷേധങ്ങൾക്ക് മുഖ്യമന്ത്രിയെ കുറ്റപ്പെടുത്താനാണ് ഗവര്‍ണ്ണര്‍ ശ്രമിച്ചത്. മുഖ്യമന്ത്രിയെ അവഹേളിക്കുന്ന പരാമർശങ്ങൾ നടത്തുകയും ചെയ്തതായി പൊളിറ്റ് ബ്യൂറോ പ്രസ്താവനയിൽ പറഞ്ഞു. ഗവർണർ എന്ന ഭരണഘടനാ പദവി വഹിക്കുന്ന ഒരാൾ ഇങ്ങനെയല്ല പെരുമാറേണ്ടിയിരുന്നത്. “ആ പദവിയിൽ തുടരാൻ താൻ യോഗ്യനല്ലെന്ന് അദ്ദേഹം തന്നെ തെളിയിച്ചു,” പ്രസ്താവനയില്‍ പറയുന്നു.
