ന്യൂഡല്‍ഹി: തമിഴ്‌നാട്ടിലെ തെക്കൻ ജില്ലകളില്‍ കാലവർഷക്കെടുതിയുടെ ആഘാതം ചർച്ച ചെയ്യാനും മൈചോങ് ചുഴലിക്കാറ്റും കാലവർഷക്കെടുതിയും ബാധിച്ച ചെന്നൈയിലും പരിസര പ്രദേശങ്ങളിലും പുനരധിവാസ പ്രവർത്തനങ്ങൾക്ക് ഫണ്ട് അനുവദിക്കുന്നത് വേഗത്തിലാക്കാനും മുഖ്യമന്ത്രി എംകെ സ്റ്റാലിൻ പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച നടത്തി.
നാല് ജില്ലകളിലെ ജീവനോപാധികൾക്കും അടിയന്തര അറ്റകുറ്റപ്പണികൾക്കുമായി 2,000 കോടി രൂപയുടെ അടിയന്തര സഹായ ധനസഹായം ആവശ്യപ്പെട്ട് സ്റ്റാലിൻ മെമ്മോറാണ്ടം സമർപ്പിച്ചു.
വ്യാഴാഴ്ച സ്റ്റാലിൻ പ്രളയബാധിത ജില്ലകളിൽ പരിശോധന നടത്തുമെന്ന് വാർത്താക്കുറിപ്പിൽ അറിയിച്ചു. തെക്കൻ ജില്ലകളിലെ 12,653 പേരെ രക്ഷപ്പെടുത്തി 141 ദുരിതാശ്വാസ കേന്ദ്രങ്ങളിൽ പാർപ്പിച്ചതായി സ്റ്റാലിൻ പറഞ്ഞു. മൈചോങ് ചുഴലിക്കാറ്റിനെ തുടർന്ന് ചെന്നൈയിലെ ജനങ്ങളെ രക്ഷിക്കാൻ സംസ്ഥാന സർക്കാർ സ്വീകരിച്ച നടപടികളെക്കുറിച്ച് സംസാരിക്കവെ, 20 മന്ത്രിമാരും 50 ഐഎഎസ്-ഐപിഎസ് ഉദ്യോഗസ്ഥരും 20,000-ത്തിലധികം ജീവനക്കാരും രക്ഷാപ്രവർത്തനത്തിനും ദുരിതാശ്വാസ പ്രവർത്തനങ്ങൾക്കും രംഗത്തുണ്ടെന്ന് സ്റ്റാലിൻ അറിയിച്ചു.
തെക്കൻ ജില്ലകളിലെ രക്ഷാപ്രവർത്തനത്തിന് കൂടുതൽ ഹെലികോപ്റ്ററുകൾ വിന്യസിക്കണമെന്ന് ആവശ്യപ്പെട്ട് മുഖ്യമന്ത്രി എംകെ സ്റ്റാലിൻ കേന്ദ്ര പ്രതിരോധ മന്ത്രി രാജ്‌നാഥ് സിംഗിന് കത്തയച്ചു. രക്ഷാദൗത്യത്തിനും ഭക്ഷണപ്പൊതികൾ എയർഡ്രോപ്പ് ചെയ്യുന്നതിനുമായി എട്ട് ഹെലികോപ്റ്ററുകൾ ഇതുവരെ വിന്യസിച്ചിട്ടുണ്ടെന്നും അദ്ദേഹം പറഞ്ഞു.
