ബെംഗളൂരു: 2023-ൽ സംസ്ഥാനത്തുടനീളമുള്ള ബിരുദാനന്തര ബിരുദധാരികൾക്കും ബിരുദധാരികൾക്കും ഡിപ്ലോമ ഹോൾഡർമാർക്കും തൊഴിലില്ലായ്മ സഹായം നൽകുന്ന അഞ്ചാം ഗ്യാരന്റിയായ ‘യുവ നിധി’യുടെ രജിസ്ട്രേഷൻ ഡിസംബർ 26 ന് കർണാടക സർക്കാർ ആരംഭിക്കുമെന്ന് മന്ത്രി ശരണപ്രകാശ് പാട്ടീൽ പ്രഖ്യാപിച്ചു.
ബിരുദധാരികൾക്ക് 3,000 രൂപയും ഡിപ്ലോമക്കാർക്ക് 1,500 രൂപയും പ്രതിമാസ തൊഴിലില്ലായ്മ സഹായം അനുവദിക്കുമെന്ന് അദ്ദേഹം വ്യക്തമാക്കി. ബിരുദം/ഡിപ്ലോമ പാസ്സായ തീയതി മുതൽ 180 ദിവസത്തിനു ശേഷവും തൊഴിൽരഹിതരായി തുടരുന്നവർക്ക് ഈ സഹായം നൽകുമെന്ന് പാട്ടീൽ പറഞ്ഞു. ഉദ്യോഗാർത്ഥികൾ കുറഞ്ഞത് ആറ് വർഷമെങ്കിലും കർണാടകയിൽ താമസിച്ചിരിക്കണമെന്ന് നിബന്ധനയുണ്ട്. ഫലപ്രഖ്യാപന തീയതി മുതൽ അല്ലെങ്കിൽ വ്യക്തി തൊഴിൽ ഉറപ്പാക്കുന്നത് വരെ അല്ലെങ്കിൽ സ്വയം തൊഴിൽ ചെയ്യുന്നതു വരെ, തൊഴിലില്ലായ്മ അലവൻസ് രണ്ട് വർഷത്തേക്ക് വിതരണം ചെയ്യും.
250 കോടി രൂപ ബജറ്റിൽ വകയിരുത്തിയ പദ്ധതി സ്വാമി വിവേകാനന്ദന്റെ ജന്മദിനമായ ജനുവരി 12 ന് ആരംഭിക്കുമെന്ന് മെഡിക്കൽ വിദ്യാഭ്യാസ, നൈപുണ്യ വികസനം, സംരംഭകത്വം, ഉപജീവന വകുപ്പ് മന്ത്രി വാർത്താസമ്മേളനത്തിൽ പറഞ്ഞു. അനുവദിച്ച തുക ഗുണഭോക്താക്കളുടെ ബാങ്ക് അക്കൗണ്ടിലേക്ക് നേരിട്ട് കൈമാറും.
മുഖ്യമന്ത്രി സിദ്ധരാമയ്യയും ഉപമുഖ്യമന്ത്രി ഡി.കെ.ശിവകുമാറും ചേർന്ന് ഡിസംബർ 26ന് വിധാന സൗധയിലെ ബാങ്ക്വറ്റ് ഹാളിൽ യുവ നിധിയുടെ ലോഗോ പ്രകാശനവും രജിസ്ട്രേഷൻ ലോഞ്ചും നിർവഹിക്കുമെന്ന് പാട്ടീൽ അറിയിച്ചു. സ്വയം തൊഴിൽ ചെയ്യുന്നവരും ഉന്നത വിദ്യാഭ്യാസം നേടുന്നവരുമായ ഉദ്യോഗാർത്ഥികൾ പദ്ധതിയിലേക്ക് യോഗ്യത നേടില്ല. ഈ വർഷം 250 കോടി രൂപ ഇതിനായി വകയിരുത്തിയിട്ടുണ്ട്. അടുത്ത വർഷം ഏകദേശം 1,250 കോടി രൂപ (സ്‌കീമിന് കീഴിലുള്ള ചെലവ്) ഞങ്ങൾ പ്രതീക്ഷിക്കുന്നു, അതിനുശേഷം ഒരു വർഷം ഏകദേശം 2,500 കോടി രൂപ വരും, മന്ത്രി പറഞ്ഞു.
ആനുകൂല്യങ്ങൾ ലഭിക്കാൻ ആഗ്രഹിക്കുന്ന അപേക്ഷകർക്ക് ‘സേവാ സിന്ധു പോർട്ടൽ’ വഴിയോ ‘കർണാടക വൺ,’ ‘ബെംഗളൂരു വൺ’, ‘ഗ്രാമ വൺ’, ‘ബാപ്പുജി സേവാ കേന്ദ്രം’ വഴിയോ അപേക്ഷിക്കാം.
