ദോഹ (ഖത്തര്‍): മുൻ ഇന്ത്യൻ നാവികസേനാ ഉദ്യോഗസ്ഥരുടെ വധശിക്ഷ ഖത്തര്‍ അപ്പീല്‍ കോടതി ജയിൽ ശിക്ഷയായി കുറച്ചതായി റിപ്പോർട്ട്. ഇന്ന് (ഡിസംബർ 28 വ്യാഴാഴ്ച) ഇന്ത്യന്‍ വിദേശകാര്യ മന്ത്രാലയമാണ് ഇക്കാര്യം അറിയിച്ചത്.
എന്നാല്‍, കാലാവധിയെക്കുറിച്ച് ഔദ്യോഗിക സ്ഥിരീകരണമൊന്നുമില്ല, വിശദമായ വിധിക്കായി കാത്തിരിക്കുകയാണ്.
“ഖത്തറിലെ ഞങ്ങളുടെ അംബാസഡറും മറ്റ് ഉദ്യോഗസ്ഥരും കുടുംബാംഗങ്ങൾക്കൊപ്പം ഇന്ന് അപ്പീൽ കോടതിയിൽ ഹാജരായി. വിഷയത്തിന്റെ തുടക്കം മുതൽ ഞങ്ങൾ അവർക്കൊപ്പം നിൽക്കുന്നു, എല്ലാ കോൺസുലർ, നിയമ സഹായങ്ങളും ഞങ്ങൾ തുടർന്നും നൽകും. ഞങ്ങൾ ഖത്തർ അധികൃതരുമായി വിഷയം ചർച്ച ചെയ്യുന്നത് തുടരും,” ഖത്തറിലെ ദഹ്‌റ ഗ്ലോബൽ കേസിലെ വിധിയെക്കുറിച്ച് എംഇഎ പറഞ്ഞു.
ഈ കേസിന്റെ നടപടിക്രമങ്ങളുടെ രഹസ്യാത്മകവും സെൻസിറ്റീവായതുമായ സ്വഭാവം കാരണം, ഈ അവസരത്തിൽ കൂടുതൽ അഭിപ്രായം പറയുന്നത് ഉചിതമല്ലെന്നും എംഇഎ കൂട്ടിച്ചേർത്തു.
എട്ട് നാവികസേനാ ഉദ്യോഗസ്ഥർക്ക് വധശിക്ഷ വിധിച്ചതിനെതിരെ ഇന്ത്യൻ സർക്കാർ നൽകിയ അപ്പീൽ നവംബർ 23ന് ഖത്തറിലെ ഫസ്റ്റ് ഇൻസ്റ്റൻസ് കോടതി അംഗീകരിച്ചതിന് പിന്നാലെയാണ് ഈ സംഭവവികാസം.
2022 ഓഗസ്റ്റിലാണ് ചാരവൃത്തി ആരോപിച്ച് ഇന്ത്യന്‍ നാവികരെ ഖത്തര്‍ രഹസ്യാന്വേഷണ ഏജന്‍സി അറസ്റ്റ് ചെയ്‌തത്. ഇറ്റലിയില്‍ നിന്നും അത്യാധുനിക അന്തര്‍വാഹിനികള്‍ വാങ്ങാനുള്ള ഖത്തറിന്‍റെ നീക്കങ്ങളെ കുറിച്ച് ഇസ്രയേലിന് വിവരങ്ങള്‍ ചോര്‍ത്തി നല്‍കിയെന്നതാണ് ഇവര്‍ക്കെതിരെയുള്ള കേസ്. എന്നാൽ, ഇവർക്കെതിരായ ആരോപണങ്ങൾ ഖത്തർ അധികൃതർ പരസ്യമാക്കിയില്ല.
2022 ഒക്ടോബർ 25 ന് കമാൻഡർ പുരേന്ദു തിവാരിയുടെ സഹോദരി മീടു ഭാർഗവ ട്വീറ്റ് ചെയ്യുകയും സഹായത്തിനായി സർക്കാരിനോട് അഭ്യർത്ഥിക്കുകയും ചെയ്തപ്പോഴാണ് ഈ അറസ്റ്റിന്റെ സംഭവം വെളിച്ചത്ത് വന്നത്.
നിരവധി തവണ ജാമ്യാപേക്ഷ നിരസിച്ചതിനെ തുടർന്ന് ഒക്ടോബർ 26 ന് എട്ട് ഇന്ത്യക്കാർക്ക് ഖത്തറിലെ ഫസ്റ്റ് ഇൻസ്റ്റൻസ് കോടതി വധശിക്ഷ വിധിച്ചു.
കമാൻഡർ പൂർണേന്ദു തിവാരി, കമാൻഡർ സുഗുണാകർ പകല, കമാൻഡർ അമിത് നാഗ്പാൽ, കമാൻഡർ സഞ്ജീവ് ഗുപ്ത, ക്യാപ്റ്റൻ നവതേജ് സിംഗ് ഗിൽ, ക്യാപ്റ്റൻ ബീരേന്ദ്ര കുമാർ വർമ, ക്യാപ്റ്റൻ സൗരഭ് വസിഷ്ത്, നാവികൻ രാജേഷ് ഗോപകുമാർ എന്നിവരാണ് അറസ്റ്റിലായ ഇന്ത്യൻ നാവികസേനാംഗങ്ങൾ.
ഖത്തറിലെ ദഹ്‌റ ഗ്ലോബൽ ടെക്‌നോളജീസ് ആൻഡ് കൺസൾട്ടൻസി സർവീസസിലാണ് ഇവർ ജോലി ചെയ്തിരുന്നത്. ഖത്തറിലെ പ്രതിരോധ, സുരക്ഷാ ഏജൻസികൾക്ക് പരിശീലനവും മറ്റ് വിവിധ സേവനങ്ങളും വാഗ്ദാനം ചെയ്യുന്ന ഒരു സ്വകാര്യ കമ്പനിയാണിത്.
2022 ഓഗസ്റ്റിലാണ് ചാരവൃത്തി ആരോപിച്ച് ഇന്ത്യന്‍ നാവികരെ ഖത്തര്‍ രഹസ്യാന്വേഷണ ഏജന്‍സി അറസ്റ്റ് ചെയ്‌തത്. ഇറ്റലിയില്‍ നിന്നും അത്യാധുനിക അന്തര്‍വാഹിനികള്‍ വാങ്ങാനുള്ള ഖത്തറിന്‍റെ നീക്കങ്ങളെ കുറിച്ച് ഇസ്രയേലിന് വിവരങ്ങള്‍ ചോര്‍ത്തി നല്‍കിയെന്നതാണ് ഇവര്‍ക്കെതിരെയുള്ള കേസ്. അറസ്റ്റിലായ നാവികര്‍ക്കായി നിരവധി തവണ ഖത്തര്‍ കോടതിയില്‍ ജാമ്യാപേക്ഷ സമര്‍പ്പിച്ചെങ്കിലും കോടതി തള്ളുകയായിരുന്നു. ഇതിന് പിന്നാലെയാണ് എട്ട് നാവികര്‍ക്കും കോടതി വധശിക്ഷ വിധിച്ചത്.
