മുംബൈ: ശ്രീരാമന്‍ എല്ലാവരുടേതുമാണ്. ജാതിയുടെയും മതത്തിന്റെയും മതില്‍കെട്ടുകൾക്കപ്പുറത്തേക്ക് ഉയര്‍ന്നവന്‍. മുംബൈയിൽ നിന്ന് 1425 കിലോമീറ്റർ കാൽനടയായി ‘രാം ലല്ല’യെ ദർശിക്കാൻ പുറപ്പെട്ട മുംബൈ സ്വദേശിനി ശബ്നം അത് തെളിയിച്ചിരിക്കുകയാണ്. ഒരു മുസ്ലീം ആയതുകൊണ്ട് ശബ്നത്തിന്റെ ഭക്തിയുടെ പാതയിൽ ആ മതില്‍കെട്ട് ഒരു തടസ്സമായില്ല. അതുവഴി പിടിവാശിയുടെ കുപ്പായമണിഞ്ഞ പലർക്കും ഷബ്നം പുതിയ വഴി കാണിച്ചുകൊടുക്കുകയാണ്. നിലവിൽ ദിവസേന 25-30 കിലോമീറ്റർ യാത്ര ചെയ്താണ് ശബ്നം മധ്യപ്രദേശിലെ സിന്ധ്വയിലെത്തിയത്.
ഡിസംബർ 21നാണ് മുംബൈയില്‍ നിന്ന് ശബ്നം യാത്ര ആരംഭിച്ചത്. കൂട്ടാളികളായ രാമൻ രാജ് ശർമ്മ, വിനീത് പാണ്ഡെ എന്നിവരും ശബ്നത്തോടൊപ്പമുണ്ട്. മുസ്ലിം ഐഡന്റിറ്റി ഉണ്ടായിരുന്നിട്ടും ശ്രീരാമനോടുള്ള അവളുടെ അചഞ്ചലമായ ഭക്തിയാണ് ശബ്നത്തിന്റെ യാത്രയെ അതുല്യമാക്കുന്നത്. രാമനെ ആരാധിക്കാൻ ഹിന്ദുവായിരിക്കേണ്ട ആവശ്യമില്ലെന്ന് അഭിമാനത്തോടെ ശബ്നം പറയുന്നു. ഒരു നല്ല വ്യക്തി ആയിരിക്കുക എന്നത് പ്രധാനമാണെന്നും അവര്‍ പറയുന്നു. ഇപ്പോൾ അവര്‍ ഏകദേശം പകുതി യാത്ര പൂർത്തിയാക്കി കഴിഞ്ഞു.
നീണ്ട തീർത്ഥാടനത്തിന്റെ ക്ഷീണമുണ്ടെങ്കിലും, രാമനോടുള്ള തങ്ങളുടെ ഭക്തി തങ്ങളെ പ്രചോദിപ്പിക്കുന്നുവെന്ന് മൂവരും (ശബ്നം, രാമൻ രാജ് ശർമ്മ, വിനീത് പാണ്ഡെ) പറയുന്നു. ഇവർ മൂവരും ഇതിനോടകം തന്നെ സോഷ്യൽ മീഡിയ താരങ്ങളായി മാറിക്കഴിഞ്ഞു. ഇവരെ പരിചയപ്പെട്ട പലരും തങ്ങളുടെ വിശേഷങ്ങളും ചിത്രങ്ങളും പങ്കുവെക്കുന്നുണ്ട്.
യാത്രയ്ക്ക് പിന്നിലെ പ്രചോദനത്തെ കുറിച്ച് ചോദിച്ചപ്പോൾ ശബ്നം പറയുന്നു, “ഭഗവാൻ ശ്രീരാമൻ ഏതെങ്കിലും ജാതിയുടെയോ മതവിശ്വാസികളുടെയോ സ്വന്തമല്ല… രാമന്‍ എല്ലാവരുടേയുമാണ്.”
ആൺകുട്ടികൾക്ക് മാത്രമേ ഇത്തരം ദുഷ്‌കരമായ യാത്രകൾ നടത്താൻ കഴിയൂ എന്ന തെറ്റിദ്ധാരണയെ വെല്ലുവിളിക്കാനാണ് തങ്ങൾ ലക്ഷ്യമിടുന്നതെന്ന് ഒരു അഭിമുഖത്തില്‍ ശബ്നം പറഞ്ഞു. ശബ്നത്തിന്റെ ഈ ഉദാത്തമായ യാത്രയിൽ, അവരുടെ സുരക്ഷ ഉറപ്പാക്കുക മാത്രമല്ല, അവരുടെ ഭക്ഷണവും താമസവും ക്രമീകരിക്കുന്നതിലും പോലീസ് ഒരു പ്രധാന പങ്ക് വഹിക്കുന്നുണ്ട്.
ശബ്നത്തിന്റെ ഈ യാത്രയിൽ തടസ്സങ്ങള്‍ ഏറെയുണ്ടായിരുന്നു. മഹാരാഷ്ട്രയിലെ സെൻസിറ്റീവ് മേഖലകളിലൂടെ കടന്നു പോകുമ്പോൾ പോലീസ് അവരുടെ സുരക്ഷ ഉറപ്പാക്കുകയും ചില പ്രശ്‌നകരമായ സാഹചര്യങ്ങളിൽ നിന്ന് അവരെ സഹായിക്കുകയും ചെയ്തു. സോഷ്യൽ മീഡിയയിൽ അവര്‍ക്കെതിരെ ചില വെറുപ്പുളവാക്കുന്ന അഭിപ്രായങ്ങളും ഭീഷണികളും ഉണ്ടെങ്കിലും, ശബ്നം തന്റെ യാത്രയിൽ ഉറച്ചതും അചഞ്ചലവുമാണ്. മാത്രമല്ല, അയോദ്ധ്യയിലെത്താനുള്ള ആവേശത്തിലുമാണ്.
നിഷേധാത്മകമായ അഭിപ്രായങ്ങൾ ഉണ്ടായിട്ടുണ്ടെന്ന് ശബ്നം സമ്മതിക്കുന്നു. പക്ഷേ, തന്റെ നിശ്ചയദാര്‍ഢ്യമാണ് തന്നെ മുന്നോട്ട് നയിക്കുന്നതെന്ന് പറയുന്നു. സ്കാർഫ് ധരിച്ച് കൈകളിൽ കാവിക്കൊടിയുമായി ഉറച്ച കാല്‍‌വെയ്പോടെ ശബ്നം തന്റെ നടത്തം തുടരുകയാണ്. മുസ്ലീങ്ങൾ ഉൾപ്പെടെ നിരവധി ആളുകൾ ‘ജയ് ശ്രീറാം’ മുദ്രാവാക്യങ്ങളുമായി തന്നെ അഭിവാദ്യം ചെയ്തപ്പോൾ സമൂഹത്തിൽ ഐക്യത്തിന്റെ സന്തോഷകരമായ നിമിഷങ്ങൾ താൻ അനുഭവിച്ചതായി ശബ്നം പറയുന്നു.
