ഉക്രെയ്നിലെ റഷ്യന്‍ യുദ്ധത്തിനെതിരായ വാക്യങ്ങൾ ചൊല്ലിയതിന് ഒരു റഷ്യൻ കവിക്ക് 7 വർഷത്തെ തടവ് ശിക്ഷ വിധിച്ചു. വിയോജിപ്പിനെതിരെ ക്രെംലിൻ നിരന്തരമായ അടിച്ചമർത്തലിനിടെ ലഭിക്കുന്ന കഠിനമായ ശിക്ഷയാണിത്.
2022 സെപ്റ്റംബറിൽ മോസ്കോ നഗരത്തിലെ ഒരു തെരുവ് പ്രകടനത്തിനിടെയാണ് യുദ്ധവിരുദ്ധ കവിതകൾ വായിച്ചതുമായി ബന്ധപ്പെട്ട, ദേശീയ സുരക്ഷയെ തുരങ്കം വയ്ക്കുന്നതിനും വിദ്വേഷം ഉണർത്തുന്നതിനും കവിത ചൊല്ലിയതിന് ആർട്ടിയോം കമർഡിനെ മോസ്കോയിലെ ത്വെർസ്കോയ് ജില്ലാ കോടതി ശിക്ഷിച്ചത്.
പരിപാടിയിൽ പങ്കെടുക്കുകയും കമർഡിന്റെ കവിത ചൊല്ലുകയും ചെയ്ത യെഗോർ ഷ്തോബയെ ഇതേ കുറ്റത്തിന് 5 1/2 വർഷം തടവിനും ശിക്ഷിച്ചു.
ഉക്രെയ്നിലെ മോസ്‌കോയുടെ സൈനിക തിരിച്ചടികൾക്കിടയിൽ പ്രസിഡന്റ് വ്‌ളാഡിമിർ പുടിൻ 300,000 റിസർവിസ്റ്റുകളെ അണിനിരത്താൻ ഉത്തരവിട്ട് ദിവസങ്ങൾക്ക് ശേഷമാണ് കവി വ്‌ളാഡിമിർ മായകോവ്‌സ്‌കിയുടെ സ്മാരകത്തിന് സമീപമുള്ള ഒത്തുചേരൽ നടന്നത്. വ്യാപകമായി ജനപ്രീതിയില്ലാത്ത നീക്കം, സൈന്യത്തിലേക്ക് റിക്രൂട്ട് ചെയ്യപ്പെടാതിരിക്കാൻ ലക്ഷക്കണക്കിന് ആളുകളെ റഷ്യയിൽ നിന്ന് പലായനം ചെയ്യാൻ പ്രേരിപ്പിച്ചു.
പോലീസ് പ്രകടനം തടയുകയും താമസിയാതെ കമർഡിനെയും മറ്റ് നിരവധി പ്രകടനക്കാരെയും അറസ്റ്റ് ചെയ്യുകയും ചെയ്തു.
അറസ്റ്റിനിടെ പോലീസ് മർദിക്കുകയും ബലപ്രയോഗം നടത്തുകയും ചെയ്തതായി കമർഡിന്റെ സുഹൃത്തുക്കളും അഭിഭാഷകനും പറഞ്ഞതായി മാധ്യമങ്ങള്‍ റിപ്പോർട്ട് ചെയ്തു. തൊട്ടുപിന്നാലെ, ക്രെംലിൻ അനുകൂല മാധ്യമങ്ങൾ പുറത്തുവിട്ട ഒരു പോലീസ് വീഡിയോയിൽ തന്റെ നടപടിയിൽ കമര്‍ഡിന്‍ ക്ഷമാപണം നടത്തുന്നതായി കാണിച്ചു. പോലീസിന്റെ ക്രൂരത അന്വേഷിക്കാൻ അധികൃതർ ഒരു നടപടിയും സ്വീകരിച്ചിട്ടില്ല.
വ്യാഴാഴ്ച വാദം കേൾക്കുന്നതിനിടെ, കമർദീന്റെ ഭാര്യ അലക്‌സാന്ദ്ര പോപോവയെ കോടതി മുറിയിൽ നിന്ന് പുറത്താക്കി. വിസ്താരത്തിന് ശേഷം മാധ്യമപ്രവർത്തകരോട് സംസാരിച്ച പോപോവയെയും മറ്റ് നിരവധി ആളുകളെയും കോടതി കെട്ടിടത്തിന് പുറത്ത് അനുമതിയില്ലാതെ “റാലി” നടത്തിയെന്നാരോപിച്ച് പിന്നീട് കസ്റ്റഡിയിലെടുത്തു.
2022 ഫെബ്രുവരി അവസാനത്തിനും ഈ മാസത്തിന്റെ തുടക്കത്തിനും ഇടയിൽ, യുദ്ധത്തിനെതിരെ സംസാരിച്ചതിനും പ്രതിഷേധിച്ചതിനും 19,847 പേരെ റഷ്യയിൽ തടവിലാക്കിയപ്പോൾ 794 പേർ യുദ്ധവിരുദ്ധ നിലപാടിന്റെ പേരിൽ ക്രിമിനൽ കേസുകളിൽ ഉൾപ്പെട്ടിട്ടുണ്ടെന്ന് രാഷ്ട്രീയ അറസ്റ്റുകൾ ട്രാക്ക് ചെയ്യുകയും നിയമസഹായം നൽകുകയും ചെയ്യുന്ന ഒവിഡി-ഇൻഫോ റൈറ്റ്സ് ഗ്രൂപ്പ് പറയുന്നു.
യുക്രെയ്നിലേക്ക് സൈനികരെ അയച്ച് ദിവസങ്ങൾക്ക് ശേഷം മോസ്കോ സ്വീകരിച്ച ഒരു നിയമപ്രകാരമാണ് അടിച്ചമർത്തൽ നടത്തിയത്. അത് ഔദ്യോഗിക വിവരണത്തിൽ നിന്ന് വ്യത്യസ്ഥമായി യുദ്ധത്തെക്കുറിച്ചുള്ള പരസ്യമായ അഭിപ്രായ പ്രകടനങ്ങളെ
ക്രിമിനല്‍ കുറ്റമാക്കി.
