കവരത്തി: ദ്വീപുകളെയും അതിർത്തി പ്രദേശങ്ങളെയും അവഗണിക്കുന്ന നയമാണ് മുൻ കോൺഗ്രസ് സർക്കാരുകൾ സ്വീകരിച്ചതെന്ന് പ്രധാനമന്ത്രി നരേന്ദ്ര മോദി. സ്വാതന്ത്ര്യാനന്തരം കോൺഗ്രസ് പാർട്ടി പതിറ്റാണ്ടുകളോളം ഭരിച്ചത് തങ്ങളുടെ പാർട്ടിയെ വികസിപ്പിക്കുക എന്ന പ്രധാന ലക്ഷ്യത്തോടെയാണ്, പ്രധാനമന്ത്രി മോദി പറഞ്ഞു.
കഴിഞ്ഞ 10 വർഷത്തിനിടെ ലക്ഷദ്വീപിൽ നിരവധി വികസന പദ്ധതികൾ പൂർത്തീകരിച്ചതായും മത്സ്യത്തൊഴിലാളികൾക്ക് ആധുനിക സൗകര്യങ്ങൾ ഒരുക്കുന്നതിനെക്കുറിച്ചും മോദി പറഞ്ഞു. ലക്ഷദ്വീപിലെ അഗത്തി ദ്വീപിൽ ഇപ്പോൾ ഒരു വിമാനത്താവളവും ഐസ് പ്ലാന്റും ഉണ്ടെന്ന് അദ്ദേഹം എടുത്തുപറഞ്ഞു. ഇതുമൂലം സമുദ്രോത്പന്ന കയറ്റുമതി മേഖലയ്ക്കും സമുദ്രോത്പന്ന സംസ്കരണത്തിനും പുതിയ സാധ്യതകൾ സൃഷ്ടിക്കപ്പെടുകയാണെന്ന് അദ്ദേഹം പറഞ്ഞു, ലക്ഷദ്വീപിൽ നിന്ന് ട്യൂണ മത്സ്യം കയറ്റുമതി ആരംഭിച്ച കാര്യം സൂചിപ്പിച്ചു, ഇത് ലക്ഷദ്വീപ് മത്സ്യത്തൊഴിലാളികളുടെ വരുമാനം വർദ്ധിപ്പിക്കുന്നതിനും വഴിയൊരുക്കി.
ലക്ഷദ്വീപിൽ കേന്ദ്രഭരണപ്രദേശത്ത് 1,150 കോടി രൂപയുടെ വിവിധ പദ്ധതികളുടെ ഉദ്ഘാടനവും തറക്കല്ലിടലും നിർവ്വഹിക്കവെയാണ് മോദി ഇക്കാര്യം പറഞ്ഞത്.
വികസന പദ്ധതികളെ കുറിച്ച് പരാമർശിക്കവേ, ലക്ഷദ്വീപിന്റെ വൈദ്യുതിയും മറ്റ് ഊർജ ആവശ്യങ്ങളും നിറവേറ്റുന്നതിനായി സോളാർ പ്ലാന്റിന്റെയും വ്യോമയാന ഇന്ധന ഡിപ്പോയുടെയും ഉദ്ഘാടനത്തെക്കുറിച്ച് പ്രധാനമന്ത്രി പരാമർശിച്ചു.
“അടുത്ത ഏതാനും നാളുകള്‍ക്കുള്ളില്‍ നിങ്ങൾക്ക് അതിവേഗ ഇന്റർനെറ്റ് സൗകര്യം ലഭിക്കുമെന്ന് ഞാൻ നിങ്ങൾക്ക് ഉറപ്പുനൽകുന്നു. ഇന്ന് കൊച്ചി-ലക്ഷദ്വീപ് സമുദ്രത്തിലൂടെയുള്ള ഒപ്റ്റിക്കൽ ഫൈബർ പദ്ധതി ഉദ്ഘാടനം ചെയ്തു. ഇപ്പോൾ ലക്ഷദ്വീപിൽ ഇന്റർനെറ്റ് 100 മടങ്ങ് ഉയർന്ന വേഗതയിൽ ലഭ്യമാകും,” പ്രധാനമന്ത്രി പറഞ്ഞു.
കൽപേനിയിലെ പ്രാഥമികാരോഗ്യ കേന്ദ്രത്തിന്റെ നവീകരണത്തിനും ആൻഡ്രോത്ത്, ചെത്ലാത്ത്, കദ്മത്ത്, അഗത്തി, മിനിക്കോയ് എന്നീ അഞ്ച് ദ്വീപുകളിൽ അഞ്ച് മാതൃകാ അങ്കണവാടികളുടെ (നന്ദ് ഘറുകൾ) നിർമാണത്തിനും പ്രധാനമന്ത്രി തറക്കല്ലിട്ടു. ദ്വീപിന്റെ വികസനം സംബന്ധിച്ച അവലോകന യോഗത്തിലും അദ്ദേഹം പങ്കെടുത്തു.
