കൽപ്പറ്റ: കടക്കെണിയില്‍ പെട്ട് വയനാട്ടില്‍ യുവ കര്‍ഷകന്‍ ആത്മഹത്യ ചെയ്തു. എടവക ഗ്രാമപഞ്ചായത്തിലെ എള്ളുമണ്ണം സ്വദേശി അനിൽ കെ കെ (32)യെയാണ് ബുധനാഴ്ച രാത്രി 11 മണിയോടെ വീട്ടിൽ തൂങ്ങിമരിച്ച നിലയിൽ കണ്ടെത്തിയത്. നേന്ത്രവാഴയും നെല്ലും കൃഷി ചെയ്യുകയും ക്ഷീര കർഷകവൃത്തിയിൽ ഏർപ്പെടുകയും ചെയ്തിരുന്ന അനിൽ ബാങ്കുകൾക്കും ചില വ്യക്തികൾക്കുമായി അഞ്ചുലക്ഷം രൂപ കുടിശ്ശികയുള്ളതായി കുടുംബാംഗങ്ങൾ പറഞ്ഞു.
കാർഷിക ആവശ്യങ്ങൾക്കായി അനിൽ വിവിധ ബാങ്കുകളിൽ നിന്നായി നാലുലക്ഷത്തോളം രൂപ കടം വാങ്ങിയിരുന്നു. നെൽക്കൃഷി ചെയ്യാൻ തന്റെ 6 ഏക്കർ നിലം
തയ്യാറാക്കാന്‍ 50,000 രൂപ കടം വാങ്ങി. കഴിഞ്ഞ വർഷം ലക്ഷങ്ങൾ മുടക്കി നട്ട 4000 വാഴത്തൈകൾ നശിച്ചു. ഈ വർഷത്തെ നെല്ല് കൊയ്തതോടെ ബാങ്കുകൾക്ക് തിരിച്ചടവ് ലഭിക്കുമെന്ന പ്രതീക്ഷയിലായിരുന്നു അനിൽ. എന്നാല്‍, വിളവ് പ്രതീക്ഷിച്ചതിലും താഴെയായിരുന്നു. അനിൽ അവിവാഹിതനാണെന്നും മാതാപിതാക്കളായ കുര്യൻ, മോളി, ഇളയ സഹോദരൻ തോമസ് എന്നിവർക്കൊപ്പമാണ് താമസിച്ചിരുന്നതെന്നും അനിലിന്റെ അയൽവാസിയായ വാർഡ് മെമ്പർ ജോർജ് പടക്കൂട്ടിൽ പറഞ്ഞു.
പണം തിരികെ ആവശ്യപ്പെട്ട് തുടങ്ങിയ കടക്കാരെ എങ്ങനെ തിരിച്ചടക്കുമെന്ന ആശങ്കയിലായിരുന്നു അനിലെന്നും തോമസ് പറഞ്ഞു. കാർഷിക ആവശ്യങ്ങൾക്കായി സിൻഡിക്കേറ്റ് ബാങ്കിൽ നിന്ന് 1.5 ലക്ഷം രൂപയും ക്ഷീരോൽപ്പാദനത്തിനായി ഒരു സഹകരണ ബാങ്കിൽ നിന്ന് ഒരു ലക്ഷം രൂപയും വായ്പയായി എടുത്തിട്ടുണ്ടെന്നും അദ്ദേഹം പറഞ്ഞു.
പോസ്റ്റ്‌മോർട്ടത്തിന് ശേഷം അനിലിന്റെ സംസ്‌കാരം വ്യാഴാഴ്ച കല്ലോടി സെന്റ് ജോർജ് ഫൊറോന പള്ളിയിൽ നടത്തി.
മാനന്തവാടി പോലീസ് അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചു. സാമ്പത്തിക പ്രതിസന്ധിയെ തുടർന്നാണ് അനിൽ ജീവിതം അവസാനിപ്പിച്ചതെന്നാണ് പ്രാഥമിക നിഗമനമെന്ന് മാനന്തവാടി എസ്എച്ച്ഒ അബ്ദുൾ ഖരീം എം എം പറഞ്ഞു. സമഗ്രമായ അന്വേഷണത്തിന് ശേഷമേ കൃത്യമായ കാരണങ്ങൾ സ്ഥിരീകരിക്കാനാകൂ.
