തിരുവനന്തപുരം: പാറശ്ശാല ഷാരോൺ വധക്കേസിൽ കുറ്റപത്രം റദ്ദാക്കണമെന്നും വിചാരണ കേരളത്തിൽ നിന്ന് തമിഴ്‌നാട്ടിലേക്ക് മാറ്റണമെന്നും ആവശ്യപ്പെട്ട് പ്രതി ഗ്രീഷ്മ നൽകിയ ഹർജിയിൽ കേരള ഹൈക്കോടതി നോട്ടീസ് അയച്ചു.
ജസ്റ്റിസ് ബെച്ചു കുര്യൻ തോമസ് അധ്യക്ഷനായ ബെഞ്ചാണ് സംസ്ഥാന പൊലീസ് മേധാവിയോട് വിശദീകരണം തേടിയത്.
കുറ്റകൃത്യം നടന്നത് തമിഴ്നാട്ടിലായതിനാൽ കേസിന്റെ വിചാരണ തമിഴ്‌നാട്ടിലേക്ക് മാറ്റണമെന്ന് ആവശ്യപ്പെട്ട് ഗ്രീഷ്മ അപേക്ഷ നൽകിയിരുന്നതായി റിപ്പോർട്ടുകൾ പറയുന്നു. നിലവിലെ അന്വേഷണ റിപ്പോർട്ട് തനിക്ക് നീതിയുക്തമായ വിചാരണ ഉറപ്പാക്കുന്നില്ലെന്നും ഗ്രീഷ്മ ഹർജിയിൽ ചൂണ്ടിക്കാട്ടി.
കൂട്ടുപ്രതികളായ സിന്ധുവും അമ്മാവൻ നിർമല കുമാറും ഇതേ ആവശ്യവുമായി കോടതിയെ സമീപിച്ചിട്ടുണ്ട്. ഹർജിയുടെ അടിസ്ഥാനത്തിൽ കേരള സംസ്ഥാന പോലീസ് മേധാവിയോട് കോടതി വിശദീകരണം തേടിയിട്ടുണ്ട്.
പോലീസ് റിപ്പോർട്ടുകൾ പ്രകാരം, 2022 ഒക്ടോബർ 14 ന് തമിഴ്‌നാട്ടിലെ പളുക്കലിലുള്ള ഗ്രീഷ്മയുടെ വസതിയിലാണ് കേസിനാസ്പദമായ സംഭവം നടന്നത്.
ഷാരോണിന് നൽകിയ കഷായത്തിൽ (ഒരു ആയുർവേദ മിശ്രിതം) ഗ്രീഷ്മ വിഷം കലർത്തിയെന്നാണ് ആരോപണം. തുടർന്ന്, ഷാരോണിന് ശാരീരിക അസ്വസ്ഥത അനുഭവപ്പെടുകയും ആശുപത്രിയിൽ പ്രവേശിപ്പിക്കുകയും ചെയ്തു. ദിവസങ്ങളോളം ചികിത്സിച്ചിട്ടും 2022 ഒക്ടോബർ 25-ന് ഷാരോൺ മരണത്തിന് കീഴടങ്ങി.
പാറശ്ശാല പോലീസ് നടത്തിയ പ്രാഥമിക അന്വേഷണത്തിൽ സ്വാഭാവിക മരണമാണെന്ന് റിപ്പോർട്ട് ചെയ്തിരുന്നു. എന്നാൽ പിന്നീട് നടത്തിയ അന്വേഷണത്തിലാണ് ഗ്രീഷ്മയുടെ പങ്ക് കണ്ടെത്തിയത്.
തുടർന്ന് ഗ്രീഷ്മയെ 2022 ഒക്ടോബർ 31ന് അറസ്റ്റ് ചെയ്തു. അന്വേഷണത്തിൽ ഷാരോൺ ബന്ധത്തിൽ നിന്ന് പിന്മാറാൻ തയ്യാറാകാത്തതിനാൽ വിഷം നൽകിയെന്ന് ഗ്രീഷ്മ പോലീസിനോട് സമ്മതിച്ചു.
പിന്നീട്, 2023 സെപ്റ്റംബർ 26-ന് ജാമ്യ വ്യവസ്ഥയിൽ ഗ്രീഷ്മ ജയിൽ മോചിതയായി.
