ലഖ്നൗ: ഉത്തർപ്രദേശിൽ മദ്രസകളിൽ (മുസ്ലിം മതവിദ്യാലയങ്ങൾ) വിവിധ വിഷയങ്ങളിലുള്ള 21,000 അദ്ധ്യാപകർക്ക് ശമ്പളം ലഭിക്കുന്നത് നിർത്തിയതോടെ അവർക്ക് ജോലി നഷ്ടപ്പെടുമെന്ന് ഒരു ഉദ്യോഗസ്ഥൻ മാധ്യമങ്ങളോട് പറഞ്ഞു.
വടക്കുകിഴക്കൻ സംസ്ഥാനമായ അസമിൽ നൂറുകണക്കിന് മദ്രസകൾ പരമ്പരാഗത സ്കൂളുകളാക്കി മാറ്റിയതിനെ തുടർന്നാണ് ഈ മാറ്റം. പ്രതിപക്ഷത്തിന്റെയും ന്യൂനപക്ഷ വിഭാഗങ്ങളുടെയും പ്രതിഷേധം വകവയ്ക്കാതെ, ഉത്തർപ്രദേശ് മുഖ്യമന്ത്രി യോഗി ആദിത്യനാഥ് ഈ നീക്കവുമായി മുന്നോട്ട് പോകുകയും മദ്രസകൾക്ക് ധനസഹായം നൽകുന്നത് നിർത്താൻ എല്ലാ സംസ്ഥാനങ്ങളോടും ആവശ്യപ്പെടുകയും ചെയ്തു.
21,000 അദ്ധ്യാപകർക്ക് ജോലി നഷ്ടപ്പെടുമെന്ന് ഉത്തർപ്രദേശിലെ മദ്രസ വിദ്യാഭ്യാസ ബോർഡ് മേധാവി ഇഫ്തിഖർ അഹമ്മദ് ജാവേദ് പറഞ്ഞു. ഇതോടെ മുസ്ലീം വിദ്യാർത്ഥികളും അദ്ധ്യാപകരും 30 വർഷം പിന്നോട്ട് പോകും.
“ഇന്ത്യയിലെ ഏകദേശം 1.42 ബില്യൺ ജനസംഖ്യയുടെ 14 ശതമാനം മുസ്ലീങ്ങളാണ്, അവർ ഉത്തർപ്രദേശിലെ ജനസംഖ്യയുടെ അഞ്ചിലൊന്ന് വരും. എന്നിട്ടും, മോദിയുടെ ഭാരതീയ ജനതാ പാർട്ടിക്ക് (ബിജെപി) കീഴിൽ ദേശീയവാദി പാർട്ടികൾ മുസ്ലീങ്ങളെയും മറ്റ് മതന്യൂനപക്ഷങ്ങളെയും ഭീഷണിപ്പെടുത്തുകയും ഉപദ്രവിക്കുകയും ചെയ്തു. എന്നാൽ പാർട്ടി ആരോപണങ്ങൾ നിഷേധിക്കുന്നു,” ഹ്യൂമൻ റൈറ്റ്‌സ് വാച്ചിന്റെ ഒരു റിപ്പോർട്ടില്‍ പറയുന്നു.
റിപ്പോർട്ടുകൾ പ്രകാരം, 2022 മാർച്ചിൽ മദ്രസകളിൽ ഗുണമേന്മയുള്ള വിദ്യാഭ്യാസം നൽകുന്നതിനുള്ള സ്കീം എന്ന സംരംഭത്തിന് ഇന്ത്യൻ സർക്കാർ ധനസഹായം നൽകുന്നത് നിർത്തിയിരുന്നു.
2017-2018 നും 2020-2021 സാമ്പത്തിക വർഷത്തിനും ഇടയിൽ പ്രസ്തുത പരിപാടിക്ക് കീഴിലുള്ള സംസ്ഥാനങ്ങളിൽ നിന്നുള്ള പുതിയ നിർദ്ദേശങ്ങളൊന്നും മോദി സർക്കാർ അംഗീകരിച്ചിട്ടില്ലെന്ന് കാണിക്കുന്ന ന്യൂനപക്ഷ കാര്യ മന്ത്രാലയത്തിൽ നിന്നുള്ള രേഖ പരിശോധിച്ചതായി മാധ്യമങ്ങള്‍ അവകാശപ്പെട്ടു.
പരിപാടിക്ക് ധനസഹായം നൽകുന്നത് നിർത്തിവെച്ചതിന് പിന്നിലെ കാരണം രേഖ വെളിപ്പെടുത്തിയിട്ടില്ല. എന്നാല്‍, കുട്ടികൾക്ക് നിർബന്ധിത വിദ്യാഭ്യാസം ഉറപ്പാക്കുന്ന 2009 ലെ നിയമം സാധാരണ സർക്കാർ സ്‌കൂളുകളിൽ ഉൾപ്പെടുന്നതിനാലാകാം ഇത് എന്ന് ഒരു സർക്കാർ ഉദ്യോഗസ്ഥൻ പറഞ്ഞു.
അതേസമയം, പ്രതിപക്ഷമായ കോൺഗ്രസ് അധികാരത്തിലിരുന്ന 2009/2010ൽ ആരംഭിച്ച പരിപാടിയുടെ ആദ്യ ആറ് വർഷത്തിനുള്ളിൽ 70,000-ത്തിലധികം മദ്രസകൾക്ക് സാമ്പത്തിക പരിരക്ഷ ലഭിച്ചതായി സർക്കാർ കണക്കുകൾ വ്യക്തമാക്കുന്നു.
ഈ പരിപാടി അത്യന്താപേക്ഷിതവും മുസ്ലീം കുട്ടികൾക്ക് പ്രയോജനകരവുമാണെന്നും ഇത് പുനരുജ്ജീവിപ്പിക്കണമെന്നും ന്യൂനപക്ഷ വിദ്യാഭ്യാസ സ്ഥാപനങ്ങളെക്കുറിച്ചുള്ള സർക്കാർ പാനലിലെ അംഗം ജാവേദ് അക്തർ പറഞ്ഞു.
കുട്ടികൾക്ക് ഇസ്ലാമികവും ആധുനികവുമായ വിദ്യാഭ്യാസം ലഭിക്കണമെന്ന് പ്രധാനമന്ത്രി പോലും ആഗ്രഹിക്കുന്നു, അദ്ദേഹം പറഞ്ഞു. സ്കീം നിലനിറുത്തുന്നത് കാണാൻ ഞാൻ ഇതിനകം ഉദ്യോഗസ്ഥരുമായി സംസാരിക്കുന്നുണ്ട് എന്നും അദ്ദേഹം സൂചിപ്പിച്ചു.
ഇന്ത്യയിലെ ഏറ്റവും ജനസംഖ്യയുള്ള സംസ്ഥാനം കൂടിയായ ഉത്തർപ്രദേശ്, സയൻസ്, ഗണിതം, സോഷ്യൽ സ്റ്റഡീസ്, ഇംഗ്ലീഷ്, ഹിന്ദി തുടങ്ങി വിവിധ വിഷയങ്ങളിലെ അദ്ധ്യാപകർക്ക് സ്വന്തം ബജറ്റിൽ നിന്ന് പ്രതിമാസം 3,000 രൂപ നൽകും. കൂടാതെ, ഫെഡറൽ സർക്കാരിൽ നിന്നും 12,000 രൂപ വരെ അദ്ധ്യാപകർക്ക് ലഭിച്ചിരുന്നു.
“ഞങ്ങൾക്ക് വേറെ ജോലിയൊന്നുമില്ല, പ്രായമായതുകൊണ്ട് എനിക്ക് വേറെ ജോലി തേടാനും സാധിക്കില്ല,” ഒരു മദ്രസാ അദ്ധ്യാപകൻ ആശങ്ക പ്രകടിപ്പിച്ചു.
