ഗാസയ്‌ക്കെതിരായ യുദ്ധത്തിൽ ഇസ്രായേൽ സൈന്യത്തോടൊപ്പം പോരാടാൻ തങ്ങളുടെ പൗരന്മാരെ അനുവദിച്ചതിന് ഫലസ്തീൻ വിദേശകാര്യ മന്ത്രാലയം ശനിയാഴ്ച പെറുവിനെ വിമർശിച്ചു. യുദ്ധത്തിൽ കൊല്ലപ്പെട്ട ഒരു സൈനികനോടുള്ള പെറുവിൻ്റെ അനുശോചനത്തെ തുടർന്നാണ് ഈ പ്രസ്താവന.
“ഇസ്രായേൽ പ്രതിരോധ സേനയിൽ റിസർവിസ്റ്റായി സേവനമനുഷ്ഠിച്ച പെറുവിയൻ-ഇസ്രായേൽ പൗരനായ യുവാൽ ലോപ്പസിൻ്റെ മരണത്തിൽ പെറുവിയൻ സർക്കാർ ഖേദിക്കുന്നു,” പെറുവിലെ വിദേശകാര്യ മന്ത്രാലയം എക്സില്‍ കുറിച്ചു.
“ഇസ്രായേലിന്റെ അധിനിവേശത്തിനും ഗാസയിലെ ഫലസ്തീൻ ജനതയ്‌ക്കെതിരെ ഇസ്രായേൽ നടത്തിയ വംശഹത്യയിലും പങ്കെടുക്കാൻ പെറു അവരുടെ പൗരന്മാരെ അനുവദിച്ചു. പെറുവിയൻ പൗരത്വവും ഇസ്രായേലി പൗരത്വവുമുള്ള ഇസ്രായേൽ സൈനികൻ യുവാൽ ലോപ്പസിൻ്റെ കാര്യത്തിലൂടെ ഇത് തെളിയിച്ചിരിക്കുകയാണ്. പെറുവിയൻ സർക്കാർ അദ്ദേഹത്തിൻ്റെ മരണത്തിൽ അനുശോചനവും രേഖപ്പെടുത്തി,” ഫലസ്തീൻ പ്രതികരിച്ചു.
“അവരുടെ പൗരന്റെ മരണശേഷം അനുശോചനം രേഖപ്പെടുത്തുകയും അഭിനന്ദിക്കുകയും ചെയ്യുന്നതിനുപകരം, ഇസ്രായേൽ പൗരത്വമുള്ളവരും സംഘർഷത്തിൽ ഏർപ്പെട്ടിരിക്കുന്നവരുമായ പൗരന്മാരുടെ പൗരത്വം പെറു പിൻവലിക്കുമെന്ന്” പ്രതീക്ഷിക്കുന്നതായി ഫലസ്തീൻ മന്ത്രാലയം പറഞ്ഞു.
“മാനവികത, അന്താരാഷ്ട്ര നിയമങ്ങളോടുള്ള പ്രതിബദ്ധത, മാനുഷിക നിയമം എന്നിവയിൽ രാജ്യങ്ങളുടെ യഥാർത്ഥ നിലപാടുകൾ നിർണ്ണയിക്കുന്നതിൽ ഈ സമയങ്ങൾ നിർണായകമാണെന്ന്” പലസ്തീൻ പറഞ്ഞു.
കൂടാതെ, “ഇസ്രായേൽ രാഷ്ട്രത്തിലെ വ്യക്തികളുടെ പൗരത്വ നിലയും ഈ കുറ്റകൃത്യങ്ങളിൽ പങ്കാളിയാകാനുള്ള സാധ്യതയും പരിശോധിക്കാൻ” എല്ലാ രാജ്യങ്ങളോടും പാലസ്തീൻ ആഹ്വാനം ചെയ്തു.
ഗാസയിലെ ആക്രമണത്തിൽ ഈ രാജ്യങ്ങളിലെ പൗരന്മാരുടെ പങ്കാളിത്തം ഫലസ്തീൻ ജനതയ്‌ക്കെതിരായ ഈ ആക്രമണത്തിൽ അവരുടെ നേരിട്ടുള്ള പങ്കാളിത്തമാണ് അർത്ഥമാക്കുന്നതെന്ന് അത് ഊന്നിപ്പറഞ്ഞു. ഫലസ്തീൻ വിദേശകാര്യ മന്ത്രാലയത്തിൻ്റെ പ്രസ്താവനയോട് പെറുവിൽ നിന്ന് ഉടനടി പ്രതികരണമൊന്നും ഉണ്ടായിട്ടില്ല.
അന്താരാഷ്ട്ര നീതിന്യായ കോടതിയുടെ താൽക്കാലിക വിധി പുറത്തുവന്നിട്ടും, ഇസ്രായേൽ ഗാസ മുനമ്പിൽ ആക്രമണം തുടരുകയാണ്. അവിടെ ഒക്‌ടോബർ 7 മുതൽ കുറഞ്ഞത് 26,257 ഫലസ്തീനികൾ കൊല്ലപ്പെട്ടിട്ടുണ്ട്. അവരില്‍ കൂടുതലും സ്ത്രീകളും കുട്ടികളുമാണ്. ഏകദേശം 64,797 പേർക്ക് പരിക്കേറ്റിട്ടുണ്ട്.
ഇസ്രായേൽ ആക്രമണം ഗാസയിലെ ജനസംഖ്യയുടെ 85% ആളുകളെയും ഭക്ഷണം, ശുദ്ധജലം, മരുന്ന് എന്നിവയുടെ രൂക്ഷമായ ദൗർലഭ്യം മൂലം ആഭ്യന്തരമായി കുടിയിറക്കി. അതേസമയം, എൻക്ലേവിൻ്റെ അടിസ്ഥാന സൗകര്യങ്ങളുടെ 60% കേടുപാടുകൾ വരുത്തുകയോ നശിപ്പിക്കപ്പെടുകയോ ചെയ്തതായി യുഎൻ പറയുന്നു.
