ന്യൂഡൽഹി: വെള്ളിയാഴ്ച (ഫെബ്രുവരി 2) ഗ്യാൻവാപി മസ്ജിദിൻ്റെ ബേസ്‌മെൻ്റിൽ ഹിന്ദുക്കള്‍ക്ക് ആരാധന നടത്താൻ അനുമതി നൽകിയ വാരണാസി കോടതിയുടെ വിധിയിൽ ഇന്ത്യയിലെ ഉന്നത മുസ്ലീം നേതാക്കൾ ശക്തമായ എതിർപ്പ് പ്രകടിപ്പിച്ചു. നീതി, മതേതരത്വം, ഭരണഘടനാ മൂല്യങ്ങൾ എന്നിവയുടെ ജുഡീഷ്യൽ തകർച്ചയാണിതെന്ന് അവര്‍ ആരോപിക്കുകയും കടുത്ത നിരാശ പ്രകടിപ്പിക്കുകയും ചെയ്തു.
വാരാണസി കോടതിയിലെ ജഡ്ജി മുസ്ലീം സമുദായത്തിൻ്റെ ഹർജി അവഗണിക്കുക മാത്രമല്ല, തങ്ങളുടെ രാജ്യമാണെന്ന് വിശ്വസിക്കുന്ന കോടിക്കണക്കിന് ഹിന്ദുക്കളെയും സിഖുകാരെയും ക്രിസ്ത്യാനികളെയും അവഗണിച്ചുവെന്ന് ഓൾ ഇന്ത്യ മുസ്ലീം പേഴ്സണൽ ബോർഡ് ചെയർമാൻ മൗലാന ഖാലിദ് സൈഫുള്ള റഹ്മാനി പറഞ്ഞു.
വാരണാസി കോടതി തിടുക്കത്തിൽ വിധി പുറപ്പെടുവിക്കുകയും തെളിവുകളും വസ്തുതകളും അവഗണിച്ചും ഏതെങ്കിലും ആരാധനാലയത്തിൻ്റെ സ്വഭാവത്തിലും കെട്ടുറപ്പിലും മാറ്റം വരുത്തുന്നത് വിലക്കുന്ന ആരാധനാലയങ്ങളുടെ നിയമം-1991 പിന്തുടരാൻ വിസമ്മതിച്ചുവെന്നും അദ്ദേഹം പറഞ്ഞു. ആരാധനാലയ നിയമം കോടതികൾ അംഗീകരിച്ചില്ലെങ്കിൽ, രാജ്യത്ത് അനന്തമായ വർഗീയ സംഘർഷത്തിന് കാരണമായേക്കാവുന്ന സമാനമായ സംഭവങ്ങള്‍ നമുക്ക് കാണാൻ കഴിയുമെന്നും അദ്ദേഹം പറഞ്ഞു.
ബ്രിട്ടീഷുകാരിൽ നിന്ന് ഇന്ത്യയുടെ സ്വാതന്ത്ര്യം നേടിയെടുക്കുന്നതിൽ ഇന്ത്യൻ മുസ്‌ലിംകൾ തുല്യ പങ്കുവഹിച്ചിട്ടുണ്ടെങ്കിലും കാലാകാലങ്ങളിൽ അവർക്ക് വർഗീയ അകൽച്ച നേരിടേണ്ടി വന്നിട്ടുണ്ടെന്ന് ജമിയത്ത് ഉലമ-ഇ-ഹിന്ദ് പ്രസിഡൻ്റ് സയ്യിദ് അർഷാദ് മദനി പറഞ്ഞു. എന്നിരുന്നാലും, ഇന്നത്തെ കാലത്ത്, ജുഡീഷ്യറിയിൽ നിന്ന് ഒരു ആശ്വാസവുമില്ലാതെ, സമൂഹം അത്തരം കുഴപ്പങ്ങൾ നേരിടേണ്ടി വരുന്നു. നിലവിലെ സർക്കാരിൻ്റെ ഭൂരിപക്ഷ അജണ്ടയ്ക്ക് വഴിയൊരുക്കാൻ ഇന്ത്യൻ നിയമങ്ങളും കോടതികളും കൂടുതൽ മൃദുവായി മാറിയെന്ന് തോന്നിപ്പോകുന്നതായി അദ്ദേഹം പറഞ്ഞു.
തകര്‍ത്ത ബാബറി മസ്ജിദിൻ്റെ സ്ഥലം ഹിന്ദു പക്ഷത്തിന് കൈമാറാനുള്ള സുപ്രീം കോടതി വിധി രാജ്യത്തുടനീളമുള്ള മുസ്ലീം ആരാധനാലയങ്ങളിൽ അവകാശവാദം ഉന്നയിക്കാൻ ഹിന്ദുത്വ ശക്തികൾക്ക് വഴിയൊരുക്കിയെന്നും അദ്ദേഹം പറഞ്ഞു.
സാഹചര്യങ്ങൾ അങ്ങനെയാണെങ്കിൽ, ഈ രാജ്യം എങ്ങനെ മുന്നോട്ട് പോകുമെന്നും അഭിവൃദ്ധി പ്രാപിക്കുമെന്നും അദ്ദേഹം ചോദിച്ചു. രാജ്യത്തെ ഏത് ദിശയിലേക്കാണ് കൊണ്ടുപോകുന്നതെന്ന് സർക്കാർ ആലോചിക്കണം. ഭിന്നിപ്പിച്ച് ഭരിക്കുക എന്ന ബ്രിട്ടീഷ് നയമാണ് ഇന്ത്യയിൽ ഇപ്പോഴും പിന്തുടരുന്നതെന്നും അദ്ദേഹം പറഞ്ഞു.
“മുസ്ലിങ്ങൾക്ക് ജുഡീഷ്യറിയിലും ഭരണത്തിലും വിശ്വാസം നഷ്ടപ്പെട്ടു. ഗ്യാന്‍‌വാപി മസ്ജിദിൻ്റെ താഴത്തെ നിലയിൽ ഹിന്ദുക്കൾക്ക് ആരാധന നടത്താനുള്ള സൗകര്യം ഒരുക്കുന്നതിൽ ഭരണകൂടത്തിൻ്റെ സത്വരതയാണ് കോടതി ഏഴ് ദിവസത്തെ സമയം അനുവദിച്ചിട്ടും ഉത്തരവ് വന്ന് മണിക്കൂറുകൾക്കുള്ളിൽ ബാരിക്കേഡുകൾ തുറന്നത്,” ജമാഅത്തെ ഇസ്ലാമിയുടെ മാലിക് മൊഹ്താസിം ഖാൻ പറഞ്ഞു.
ഗ്യാന്‍‌വാപി മസ്ജിദ് കേസിൽ ഇടപെടാൻ ഹൈക്കോടതികൾ വിസമ്മതിച്ചതിനെക്കുറിച്ച് ഖാൻ നിരാശയോടെ ചോദിച്ചു, “അനീതിക്കും ചൂഷണത്തിനും ഇരയായവർക്ക് കോടതിയിൽ അപ്പീൽ നൽകാൻ കഴിയുന്നില്ലെങ്കിൽ, അവർ എവിടെ പോകണം?”
ക്ഷമയും സമാധാനവും നിലനിർത്താൻ മുസ്ലീം സമൂഹത്തോട് ഞങ്ങൾ എപ്പോഴും അഭ്യർത്ഥിക്കാറുണ്ടെന്ന് ഖാൻ പറഞ്ഞു. എന്നാൽ, എത്ര കാലം നമുക്ക് ഇത് ചെയ്യാൻ കഴിയും? മുസ്‌ലിംകൾക്ക് ക്ഷമ നശിച്ചാൽ നഷ്ടം സഹിക്കേണ്ടിവരുമെന്ന് ഉറപ്പാണ്, പക്ഷേ ആ നിരാശയുടെ വിലയും രാജ്യം നൽകേണ്ടിവരും.
കീഴ്‌ക്കോടതികളുടെ ഇത്തരം തീരുമാനങ്ങൾ അടിസ്ഥാനപരമായി മാറാൻ സാധ്യതയുണ്ടെങ്കിലും ഞങ്ങൾ നിരവധി അപ്പീലുകൾ നൽകിയിട്ടും ഹൈക്കോടതിയും സുപ്രീം കോടതിയും ഇടപെട്ടില്ലെന്ന് ഓൾ ഇന്ത്യ മുസ്ലിം വ്യക്തിനിയമ ബോർഡ് ഉദ്യോഗസ്ഥനായ എൻഎ ഫാറൂഖി പറഞ്ഞു.
‘അവന്റെ വടി അവൻ്റെ പോത്ത്’ എന്ന പഴഞ്ചൊല്ല് കോടതികളും മുന്നോട്ട് കൊണ്ടുപോകുന്നുവെന്ന തോന്നൽ മുസ്ലീം സമൂഹത്തിന് ഉണ്ടാക്കുകയാണെന്നും അദ്ദേഹം പറഞ്ഞു.
കോടതികളിലെ ഇത്തരം വിധികളുടെ തുടർച്ചയായതും വാരണാസിയിലെയും മഥുരയിലെയും മറ്റ് നഗരങ്ങളിലെയും മുസ്ലീം പള്ളികൾ കൈയ്യേറാനുള്ള ഹിന്ദുത്വ വാദികളുടെ ആക്രമണാത്മക പദ്ധതികളും ജുഡീഷ്യറിയെ അപലപിക്കാൻ തങ്ങളെ പ്രേരിപ്പിക്കുകയാണെന്ന് അദ്ദേഹം പറഞ്ഞു.
വാരാണസി ജില്ലാ ജഡ്ജിയുടെ വിധിയിൽ അഗാധമായ ആശ്ചര്യവും നിരാശയും രേഖപ്പെടുത്തുന്നുവെന്ന് നേതാക്കൾ പ്രസ്താവനയിൽ പറഞ്ഞു. ഞങ്ങളുടെ വീക്ഷണത്തിൽ ഈ തീരുമാനം അങ്ങേയറ്റം തെറ്റായതും അടിസ്ഥാനരഹിതവുമായ യുക്തിയുടെ അടിസ്ഥാനത്തിലാണ് കാണപ്പെടുന്നത്. സോമനാഥ് വ്യാസിൻ്റെ കുടുംബം 1993 വരെ മസ്ജിദിൻ്റെ നിലവറയിൽ ആരാധന നടത്തിയിരുന്നുവെന്നും അത് സംസ്ഥാന സർക്കാരിൻ്റെ ഉത്തരവനുസരിച്ച് അടച്ചുപൂട്ടിയെന്നും പറയുന്നു. ഇതിന് പുറമെ ജനുവരി 24ന് ഇതേ കോടതി ബേസ്‌മെൻ്റിൻ്റെ സംരക്ഷണ ചുമതല ജില്ലാ ഭരണകൂടത്തിന് കൈമാറി.
ഈ നിലവറയിൽ ഒരിക്കലും പൂജ നടത്തിയിട്ടില്ലെന്നും അസംബന്ധവും അടിസ്ഥാനരഹിതവുമായ അവകാശവാദത്തിൻ്റെ അടിസ്ഥാനത്തിലാണ് തീരുമാനമെന്നും പ്രസ്താവനയിൽ പറയുന്നു.
സമൂഹത്തിൽ അശാന്തിക്ക് കാരണമായ ആർക്കിയോളജിക്കൽ സർവേ റിപ്പോർട്ട് ഏകപക്ഷീയമായി ഹിന്ദു പക്ഷം പത്രങ്ങളിൽ വെളിപ്പെടുത്തിയത് ആശങ്കാജനകമാണെന്നും പ്രസ്താവനയിൽ പറയുന്നു. കോടതിയിൽ ചർച്ച ചെയ്യപ്പെടുകയോ സ്ഥിരീകരിക്കുകയോ ചെയ്യാത്തതിനാൽ റിപ്പോർട്ട് നിലവിൽ അവകാശവാദം മാത്രമാണ് എന്നതാണ് പ്രധാനം.
‘ജില്ലാ കോടതി ഉത്തരവ് അതിവേഗം നടപ്പാക്കാൻ ഭരണകൂടം തയ്യാറായത്, ഹൈക്കോടതിയിൽ നിന്ന് അടിയന്തര സഹായം തേടാനുള്ള പള്ളിയുടെ അവകാശത്തെ ഹനിക്കുന്നതാണെന്നും’ നേതാക്കൾ പറഞ്ഞു.
ജനാധിപത്യത്തിലെ ‘നീതിയുടെ അവസാനത്തെ ആശ്രയം’ എന്ന് കോടതികളെ വിശേഷിപ്പിച്ച മുസ്ലീം നേതാക്കൾ പറഞ്ഞു, സമീപകാല വിധികൾ ഒരു ‘ഭൂരിപക്ഷ ജുഡീഷ്യറി’ സൃഷ്ടിക്കുന്നതിനെയാണ് സൂചിപ്പിക്കുന്നത്. നീതിന്യായ വ്യവസ്ഥയുടെ നിഷ്പക്ഷത ഉറപ്പാക്കാൻ നേതാക്കൾ ഭരണഘടനാ അധികാരികളോട് അഭ്യർത്ഥിച്ചു.
ഇന്ത്യൻ രാഷ്ട്രപതി ദ്രൗപതി മുർമു, ചീഫ് ജസ്റ്റിസ് ഡി വൈ ചന്ദ്രചൂഡ് എന്നിവരോട് തങ്ങളുടെ വികാരങ്ങൾ പ്രകടിപ്പിക്കാൻ അദ്ദേഹം സമയം തേടിയിട്ടുണ്ട്.
ജനുവരി 31 ന് വാരണാസി ജില്ലാ കോടതി ഒരു പുരോഹിതൻ്റെ കുടുംബത്തിന് ഗ്യാൻവാപി മസ്ജിദ് സമുച്ചയത്തിനുള്ളിലെ ‘വ്യാസ് ജിയുടെ നിലവറ’യിൽ ആരാധന നടത്താനുള്ള അവകാശം നൽകി. 1993-ന് മുമ്പ്, സംസ്ഥാന സർക്കാരിൻ്റെ ഉത്തരവനുസരിച്ച് അത് നിർത്തുന്നത് വരെ, വ്യാസകുടുംബം നിയോഗിച്ച ഹിന്ദു പുരോഹിതന്മാർ ഈ സമുച്ചയത്തിനുള്ളിലെ ഈ സ്ഥലത്ത് ക്ഷേത്രത്തിൽ ദൈനംദിന ആചാരങ്ങൾ നടത്തിയിരുന്നുവെന്ന് ഹർജിക്കാരൻ പറയുന്നു.
അതിനുശേഷം, ഫെബ്രുവരി ഒന്നിന്, ജ്ഞാനവാപി മസ്ജിദിൻ്റെ നിലവറയ്ക്കുള്ളിൽ പൂജ നടത്താൻ വാരണാസി കോടതി അനുമതി നൽകി 24 മണിക്കൂറിനുള്ളിൽ, ജില്ലാ ഭരണകൂടം പ്രസ്തുത സ്ഥലത്ത് പൂജ നടത്തി .
കോടതിയുടെ ഈ തീരുമാനത്തെ അഞ്ജുമൻ അഞ്ജാമിയ മസ്ജിദ് കമ്മിറ്റി അലഹബാദ് ഹൈക്കോടതിയിൽ ചോദ്യം ചെയ്തു, എന്നാല്‍, അവരുടെ ഭാഗം കേള്‍ക്കാന്‍ കോടതി വിസമ്മതിച്ചു. ഫെബ്രുവരി ആറിന് വീണ്ടും വാദം കേൾക്കുന്നതിനായി കേസ് ഇപ്പോൾ ലിസ്റ്റ് ചെയ്തിട്ടുണ്ട്.
