യുഎസ് പ്രസിഡൻ്റ് ജോ ബൈഡൻ്റെ പ്രസ്താവനയ്‌ക്കെതിരെ ശക്തമായ പ്രതികരണവുമായി ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു. നിയമം ലംഘിക്കുന്ന എല്ലാവർക്കും എതിരെ തൻ്റെ രാജ്യം നടപടിയെടുക്കുമെന്നും അദ്ദേഹം പറഞ്ഞു. ഫലസ്തീനികൾക്കെതിരെ അക്രമാസക്തമായ പ്രവർത്തനങ്ങളിൽ ഏർപ്പെട്ടിരിക്കുന്ന വെസ്റ്റ് ബാങ്കിൽ താമസിക്കുന്ന ജൂതന്മാർക്കെതിരെ ബൈഡൻ ഭരണകൂടം ഉപരോധം ഏർപ്പെടുത്തിയ സാഹചര്യത്തിലാണ് അദ്ദേഹത്തിൻ്റെ പ്രസ്താവന.
യഹൂദ, സമരിയ മേഖലയിലെ ഭൂരിഭാഗം ആളുകളും നിയമം അനുസരിക്കുന്നവരാണെന്നും നിലവിൽ ഇസ്രായേലിനെ പ്രതിരോധിക്കാൻ സൈനികരായി പോരാടുന്നവരാണെന്നും നെതന്യാഹു പറഞ്ഞു. നിയമം ലംഘിക്കുന്ന എല്ലാ ജൂതന്മാർക്കെതിരെയും ഇസ്രായേൽ നടപടിയെടുക്കുമെന്നും അദ്ദേഹം പറഞ്ഞു. അതിനാൽ, എല്ലായിടത്തും നിരോധനം ഏർപ്പെടുത്തുന്നത് അനാവശ്യമാണ്.
വെസ്റ്റ് ബാങ്കിലെ സ്ഥിതി അസഹനീയമായ അവസ്ഥയിലെത്തിയതായി താന്‍ കരുതുന്നതായി പ്രസിഡൻ്റ് ബൈഡൻ തൻ്റെ പ്രസ്താവനയിൽ പറഞ്ഞു. പ്രത്യേകിച്ച് വെസ്റ്റ് ബാങ്കിൽ, ഫലസ്തീനികൾക്കെതിരായ അക്രമം, ഗ്രാമങ്ങളിൽ നിന്ന് ആളുകളെ നിർബന്ധിതമായി മാറ്റിപ്പാർപ്പിക്കൽ, സ്വത്ത് നശിപ്പിക്കൽ എന്നിവ ഉയർന്ന തലത്തിലെത്തി. വെസ്റ്റ് ബാങ്ക്, ഗാസ, ഇസ്രായേൽ, മിഡിൽ ഈസ്റ്റ് എന്നിവയുടെ സമാധാനത്തിനും സുരക്ഷയ്ക്കും സ്ഥിരതയ്ക്കും ഇത് ഗുരുതരമായ ഭീഷണി ഉയർത്തുന്നു. യുദ്ധത്തിന്റെ പേരില്‍ ഇസ്രായേലികള്‍ വെസ്റ്റ് ബാങ്കില്‍ നാശനഷ്ടങ്ങള്‍ വരുത്തി വെക്കുകയും സാധാരണക്കാരെ ആക്രമിക്കുകയും അവരെ ഭീഷണിപ്പെടുത്തി തുരത്തി ഓടിക്കുകയും ചെയ്യുന്നു. സ്ത്രീകളേയും കുട്ടികളേയും ക്രൂരമായി ആക്രമിക്കുന്നു. ഇത്തരം നടപടികൾ അമേരിക്കയുടെ വിദേശനയ ലക്ഷ്യങ്ങളെ ദുർബലപ്പെടുത്തുന്നതായും ബൈഡൻ പറഞ്ഞു. ദ്വിരാഷ്ട്ര പരിഹാരത്തിൻ്റെ സാധ്യതയും ഇസ്രായേലിൻ്റെയും ഫലസ്തീനിയുടെയും സുരക്ഷ, സമൃദ്ധി, സ്വാതന്ത്ര്യം എന്നിവ ഉറപ്പാക്കുകയാണ് തങ്ങളുടെ ലക്ഷ്യമെന്നും അദ്ദേഹം കൂട്ടിച്ചേര്‍ത്തു.
അവർ (വെസ്റ്റ് ബാങ്കിലെ അക്രമങ്ങളിലും അധിനിവേശ പ്രവർത്തനങ്ങളിലും ഏർപ്പെട്ടിരിക്കുന്ന ജൂതന്മാർ) ഇസ്രായേലിൻ്റെ സുരക്ഷയെ ദുർബലപ്പെടുത്തുകയും പശ്ചിമേഷ്യയിൽ അസ്ഥിരത സൃഷ്ടിക്കാൻ ശ്രമിക്കുകയാണെന്നും പ്രസിഡൻ്റ് ബൈഡന്‍ പറഞ്ഞു. ഇത് അമേരിക്കയുടെ വ്യക്തികൾക്കും താൽപ്പര്യങ്ങൾക്കും ഭീഷണിയാണ്. ഈ നടപടികൾ അമേരിക്കയുടെ ദേശീയ സുരക്ഷയ്ക്കും വിദേശ നയത്തിനും എതിരും അസാധാരണമായ ഭീഷണിയും ഉയര്‍ത്തുന്നതായി അദ്ദെഹം പറഞ്ഞു.
യുദ്ധം ആരംഭിച്ചതിനുശേഷം 3,000 പേരെ അറസ്റ്റ് ചെയ്തു
അതിനിടെ, ഗാസയിൽ യുദ്ധം ആരംഭിച്ചതിന് ശേഷം തീവ്രവാദ പ്രവർത്തനങ്ങളിൽ സംശയം തോന്നിയ മൂവായിരത്തോളം പേരെ തങ്ങളുടെ സെൻട്രൽ കമാൻഡ് ഫോഴ്‌സ് അറസ്റ്റ് ചെയ്തതായി ഇസ്രായേൽ ഡിഫൻസ് ഫോഴ്‌സ് (ഐഡിഎഫ്) റിപ്പോർട്ട് ചെയ്തു. ഐഡിഎഫിൻ്റെ സെൻട്രൽ കമാൻഡിനാണ് ജൂഡിയ, സമരിയ മേഖലകളുടെ സുരക്ഷയുടെ ചുമതല.
