ജനുവരി 25 ന് ഉത്തർപ്രദേശിലെ ബല്ലിയയിൽ നടന്ന ഒരു സമൂഹ വിവാഹ പരിപാടിയിൽ 200 ലധികം ദമ്പതികള്‍ വ്യാജ വിവാഹ ചടങ്ങുകളിൽ പങ്കെടുത്തതായി ആരോപണം. തട്ടിപ്പുമായി ബന്ധപ്പെട്ട് സാമൂഹ്യക്ഷേമ വകുപ്പ് ഉദ്യോഗസ്ഥരടക്കം 15 പേരെ പോലീസ് ഇതുവരെ അറസ്റ്റ് ചെയ്തിട്ടുണ്ട്.
സംസ്ഥാനത്തിൻ്റെ ബഹുജന വിവാഹ പദ്ധതിക്ക് കീഴിലുള്ള പരിപാടിയുടെ വീഡിയോയിൽ, ചടങ്ങിനിടെ വധുക്കൾ സ്വയം ഹാരമണിയുന്നത് കാണിച്ചതാണ് സംശയത്തിനിട നല്‍കിയത്.
സമൂഹ വിവാഹത്തിൽ 568 ദമ്പതികൾ വിവാഹിതരായതായി കരുതുന്നതായി അധികൃതർ പറഞ്ഞു. എന്നാല്‍, 200-ലധികം ദമ്പതികൾക്ക് വധൂവരന്മാരായി അഭിനയിക്കാൻ യഥാർത്ഥത്തിൽ പണം നൽകിയതായി അന്വേഷണത്തില്‍ പിന്നീട് കണ്ടെത്തി.
സമൂഹ വിവാഹ പരിപാടിയിൽ ഇരിക്കാൻ തനിക്ക് 2,000 രൂപ വാഗ്ദാനം ചെയ്തു. എന്നാല്‍, താന്‍ പങ്കെടുത്തെങ്കിലും പ്രതിഫലം ലഭിച്ചില്ലെന്ന് 19 വയസ്സുള്ള ഒരു യുവാവ് പറഞ്ഞു.
സംഭവത്തെത്തുടര്‍ന്ന് ചീഫ് ഡെവലപ്‌മെൻ്റ് ഓഫീസറുടെ നേതൃത്വത്തിൽ അന്വേഷണ സമിതി രൂപീകരിച്ചു.
ഗുണഭോക്താക്കളിൽ ചിലർ 2023-ൽ വിവാഹിതരായവരാണെന്ന് അന്വേഷണത്തിൽ കണ്ടെത്തി. ഉദാഹരണത്തിന്, മണികപൂർ ഗ്രാമത്തിലെ അർച്ചന 2023 ജൂണിൽ വിവാഹിതയായതാണ്. ഇതുകൂടാതെ, രഞ്ജന യാദവും സുമൻ ചൗഹാനും 2023 മാർച്ചിൽ വിവാഹിതരായി, പ്രിയങ്ക 2023 നവംബറിൽ വിവാഹിതയായി, പൂജ ഒരു വർഷം മുമ്പ്, സഞ്ജു മൂന്ന് വർഷം മുമ്പ് വിവാഹിതയായി. 2023 ജൂലൈയിലായിരുന്നു രമിതയുടെ വിവാഹം. ഇവരെല്ലാം മുഖ്യമന്ത്രിയുടെ സമൂഹ വിവാഹ പദ്ധതിക്ക് അർഹരല്ലെന്നും സമിതി റിപ്പോർട്ടിൽ പറയുന്നു.
അർഹതയില്ലാത്ത അപേക്ഷകർ യഥാർത്ഥ വസ്തുതകൾ മറച്ചുവെച്ച് പദ്ധതി പ്രകാരം ആനുകൂല്യങ്ങൾ ലഭിക്കുന്നതിന് നിയമവിരുദ്ധമായി അപേക്ഷിച്ചതായി റിപ്പോർട്ടിൽ പറയുന്നു. സാമൂഹ്യക്ഷേമ വകുപ്പ് അസിസ്റ്റൻ്റ് ഡെവലപ്‌മെൻ്റ് ഓഫീസർ അപേക്ഷകൾ പരിശോധിക്കുന്നതിൽ അലംഭാവം കാട്ടിയതാണ് തട്ടിപ്പിന് വഴിവെച്ചത്.
മണിയാർ വികസന ബ്ലോക്കിൽ നടന്ന സമൂഹ വിവാഹ പരിപാടിയുടെ ഗുണഭോക്താക്കൾക്ക് ഇതുവരെ ഫണ്ട് വിതരണം ചെയ്തിട്ടില്ലെന്ന് ജില്ലാ മജിസ്‌ട്രേറ്റ് രവീന്ദ്രകുമാർ പറഞ്ഞു.
ഈ സ്കീമിന് കീഴിൽ ഓരോ ദമ്പതികള്‍ക്കും 51,000 രൂപയാണ് അനുവദിച്ചിട്ടുള്ളത്. അതിൽ 35,000 രൂപ പെൺകുട്ടിക്കും 10,000 രൂപ വിവാഹ സാമഗ്രികൾ വാങ്ങുന്നതിനും 6,000 രൂപ ഇവൻ്റിനും ലഭിക്കുമെന്ന് സർക്കാർ വെബ്‌സൈറ്റിൽ പറയുന്നു.
