എറണാകുളം: നിരോധിത സംഘടനയായ ഐഎസിലേക്ക് യുവാക്കളെ റിക്രൂട്ട് ചെയ്യാൻ ശ്രമിച്ചതിനും, കേരളത്തിൽ സ്‌ഫോടനം നടത്താൻ പദ്ധതിയിട്ടതുൾപ്പെടെയുള്ള കുറ്റങ്ങള്‍ ചുമത്തിയിരുന്ന പ്രതി റിയാസ് അബൂബക്കറിന് 10 വര്‍ഷം കഠിന തടവും 1.25 ലക്ഷം രൂപ പിഴയും വിധിച്ചു. ഇന്ന് (ഫെബ്രുവരി 9 വെള്ളിയാഴ്ച) ദേശീയ അന്വേഷണ ഏജൻസി (എൻഐഎ) പ്രത്യേക കോടതിയാണ് ശിക്ഷ വിധിച്ചത്.
തീവ്രവാദ സംഘടനയിൽ അംഗത്വമെടുക്കുന്നതുമായി ബന്ധപ്പെട്ട കുറ്റകൃത്യങ്ങൾ കൈകാര്യം ചെയ്യുന്ന നിയമവിരുദ്ധ പ്രവർത്തന (യുഎപിഎ) നിയമത്തിലെ (യുഎപിഎ) സെക്‌ഷന്‍ 38 പ്രകാരവും, തീവ്രവാദ സംഘടനയെ പിന്തുണച്ചതിന് സെക്‌ഷന്‍ 39 പ്രകാരവും അബൂബക്കർ കുറ്റക്കാരനാണെന്ന് പ്രത്യേക ജഡ്ജി മിനി എസ്. ദാസ് കണ്ടെത്തിയിരുന്നു . ക്രിമിനൽ ഗൂഢാലോചനയ്ക്ക് ഇന്ത്യൻ ശിക്ഷാ നിയമത്തിലെ (ഐപിസി) 120 ബി വകുപ്പ് പ്രകാരമാണ് അബൂബക്കർ കുറ്റക്കാരനാണെന്ന് കണ്ടെത്തിയത്.
നിരോധിത സംഘടനയായ ഐഎസിലേക്ക് യുവാക്കളെ റിക്രൂട്ട് ചെയ്യാൻ ശ്രമിച്ചു, കേരളത്തിൽ സ്‌ഫോടനം നടത്താൻ പദ്ധതിയിട്ടതുൾപ്പെടെയുള്ള കുറ്റങ്ങളാണ് ഇയാൾക്കെതിരെ ചുമത്തിയിരുന്നത്.
ക്രിമിനൽ ഗൂഢാലോചന കുറ്റത്തിന് അഞ്ച് വർഷം കഠിന തടവും 25,000 രൂപ പിഴയും ഈ ആക്ട് പ്രകാരം ചുമത്തിയ രണ്ട് കുറ്റങ്ങൾക്കും പ്രതിക്ക് 10 വർഷം കഠിന തടവും 50,000 രൂപ വീതം പിഴയുമാണ് വിധിച്ചത്.
എന്നാൽ, എല്ലാ ശിക്ഷകളും ഒരേസമയം നടപ്പാക്കിയാല്‍ മതി. കുറ്റവാളി ജയിലിൽ ചെലവഴിച്ച കാലയളവ് അയാൾക്ക് ലഭിച്ച ശിക്ഷയ്ക്ക് എതിരായി മാറും. കഴിഞ്ഞ അഞ്ച് വർഷമായി അബൂബക്കർ ജയിലിലായിരുന്നു.
കുറ്റവാളി ചെയ്ത കുറ്റങ്ങൾ സമൂഹത്തിന് എതിരായതിനാൽ പരമാവധി ശിക്ഷ നൽകണമെന്ന് എൻഐഎ നേരത്തെ വാദിച്ചിരുന്നു. കുറ്റവാളി കൂട്ടുപ്രതികളെ തീവ്രവാദ പ്രവർത്തനങ്ങൾക്ക് പ്രേരിപ്പിച്ചതായി ഏജൻസി പറഞ്ഞു.
