മുംബൈ: ബിഹാർ മുൻ മുഖ്യമന്ത്രി കർപ്പൂരി ഠാക്കൂറിനും കൃഷി ശാസ്ത്രജ്ഞൻ ഡോ. എസ് സ്വാമിനാഥനും അഭിമാനകരമായ ഭാരതരത്‌ന പുരസ്‌കാരം നൽകാനുള്ള ബിജെപി നേതൃത്വത്തിലുള്ള കേന്ദ്ര സർക്കാരിൻ്റെ തീരുമാനത്തിനെതിരെ ഉദ്ധവ് താക്കറെ. വരാനിരിക്കുന്ന ലോക്സഭാ തെരഞ്ഞെടുപ്പിൽ ബിഹാറിലെയും ദക്ഷിണേന്ത്യയിലെയും വോട്ടർമാരെ ആകർഷിക്കാനുള്ള നീക്കമാണ് കേന്ദ്ര സർക്കാർ ‘ഭാരത് രത്‌ന’ കൊണ്ട് നടത്തുന്നതെന്ന് ശിവസേന (യുബിടി) അദ്ധ്യക്ഷൻ ആരോപിച്ചു. ബി.ജെ.പി ഇക്കൂട്ടർക്ക് ഭാരതരത്‌നം നൽകുന്നുണ്ടെങ്കിലും, അവർ ജീവിച്ചിരുന്നപ്പോൾ കാവി പാർട്ടിയുടെ മുൻഗാമികളായ ജനസംഘം അവരുടെ ചിന്തകളെ എതിർത്തിരുന്നുവെന്നും ‘ലോകാധികാര സമിതി മഹാസംഘ്’ പരിപാടിയിൽ സംസാരിക്കവെ ഉദ്ധവ് അടിവരയിട്ടു പറഞ്ഞു,
കര്‍പ്പൂരി ഠാക്കൂറിന് ഭാരത് രത്‌ന നൽകിയത് വോട്ടിനു വേണ്ടി
എത്ര പേർക്ക്, ആർക്ക്, എപ്പോൾ നൽകണം എന്നതുപോലെ ഭാരതരത്‌ന നൽകുന്നതിന് നിയമങ്ങളും നടപടിക്രമങ്ങളും ഉണ്ടെന്ന് അദ്ദേഹം പറഞ്ഞു. ഇപ്പോഴിതാ, തൻ്റെ മനസ്സിൽ തോന്നുന്നവരെ ആദരിക്കുകയാണ് പ്രധാനമന്ത്രി നരേന്ദ്ര മോദി ചെയ്യുന്നത്. ലോക്സഭാ തിരഞ്ഞെടുപ്പില്‍ ബിഹാറിൽ നിന്ന് ബിജെപിക്ക് വോട്ടുകൾ ആവശ്യമാണ്. അതുകൊണ്ടാണ് മോദി കർപ്പൂരി ഠാക്കൂറിന് ഭാരതരത്‌ന നൽകിയത്.
ഭാരത് രത്‌നയ്ക്കായി ഡോ. എസ് സ്വാമിനാഥൻ്റെ പേര് ഇപ്പോള്‍ പ്രഖ്യാപിച്ച ബിജെപി, കാർഷിക വരുമാനം വർധിപ്പിക്കുന്നതിന് അദ്ദേഹത്തിൻ്റെ നേതൃത്വത്തിലുള്ള ഒരു കമ്മീഷൻ നൽകിയ ശുപാർശ നടപ്പിലാക്കുന്നതിൽ പരാജയപ്പെട്ടു. ഇവരുടെ കാപട്യം ജനങ്ങള്‍ക്ക് ഈ പൊള്ളത്തരത്തിലൂടെ കാണാൻ കഴിയുമെന്ന് ഉദ്ധവ് പറഞ്ഞു. അധികാരത്തിനുവേണ്ടി ഹിന്ദുത്വം ഉപേക്ഷിച്ചുവെന്ന ബി.ജെ.പിയുടെ ആരോപണത്തെ സൂചിപ്പിച്ച്, മുസ്ലീം സമുദായത്തിൽ നിന്ന് നിരവധി പേർ തൻ്റെ ശിവസേനയ്‌ക്കൊപ്പം വരുന്നുണ്ടെന്ന് അദ്ദേഹം പറഞ്ഞു.
“ഞാനൊരു ഉറച്ച ഹിന്ദുവാണെന്നും എൻ്റെ പാർട്ടിയും ഇതേ പ്രത്യയശാസ്ത്രത്തെയാണ് പ്രതിനിധീകരിക്കുന്നതെന്നും ഞാൻ അവരോട് പറഞ്ഞു. എൻ്റെ ഹിന്ദുത്വവും ബിജെപിയും തമ്മിൽ വ്യത്യാസമുണ്ടെന്ന് അവർ എന്നോട് പറഞ്ഞു. എൻ്റെ ഹിന്ദുത്വം നിങ്ങളുടെ വീട്ടിലെ അടുപ്പ് കത്തിക്കും, ബി.ജെ.പിയുടേത് നിങ്ങളുടെ വീടും കത്തിക്കും. ഹൃദയത്തിലെ രാമനും കൈയിലെ ജോലിയുമാണ് എൻ്റെ ഹിന്ദുത്വ,” ഉദ്ധവ് പറഞ്ഞു.
പ്രധാനമന്ത്രി നരേന്ദ്ര മോദിയെ പരിഹസിച്ച അദ്ദേഹം, ആർക്ക് വോട്ട് ചെയ്യണമെന്ന് ആളുകൾ പരസ്പരം ചോദിക്കുന്ന നിരവധി ഓഡിയോ ക്ലിപ്പുകൾ താൻ കേട്ടിട്ടുണ്ടെന്ന് പറഞ്ഞു. “ചിലർ മോദി സർക്കാർ ചോദിക്കുമ്പോൾ മറ്റുള്ളവർ ഇത് മോദി സർക്കാരാണോ അതോ ഭാരത് സർക്കാരാണോ എന്ന് ചോദിക്കുന്നു. ജനങ്ങൾ കഷ്ടപ്പെട്ട് സമ്പാദിച്ച പണം തെരഞ്ഞെടുപ്പിൽ വിജയിക്കാൻ പ്രധാനമന്ത്രി ഉപയോഗിക്കുന്നു,” ഉദ്ധവ് പറഞ്ഞു.
ഡൽഹിയിൽ തനിക്കോ മറ്റ് പാർട്ടി നേതാക്കളോടോ ബഹുമാനമില്ലെന്ന് ഒരിക്കൽ കേന്ദ്രമന്ത്രി നിതിൻ ഗഡ്കരി തന്നോട് പറഞ്ഞതായി അദ്ദേഹം സൂചിപ്പിച്ചു.
