ആലപ്പുഴ: ആലപ്പുഴ ജില്ലയിൽ ഇന്ന് (ഫെബ്രുവരി 23 വെള്ളി) പുലർച്ചെ കേരള സ്റ്റേറ്റ് റോഡ് ട്രാൻസ്‌പോർട്ട് കോർപ്പറേഷൻ്റെ (കെഎസ്ആർടിസി) ബസിനു തീപിടിച്ചു. ഡ്രൈവറുടെ സമയോചിതമായ ഇടപെടല്‍ മൂലം ബസ്സിലുണ്ടായിരുന്ന 44 യാത്രക്കാരും അപകടത്തില്‍ നിന്ന് രക്ഷപ്പെട്ടു. കായംകുളത്തിനും ആലപ്പുഴയ്ക്കും ഇടയിലാണ് സംഭവമെന്ന് പോലീസ് പറഞ്ഞു.
എന്തോ കത്തുന്ന ദുർഗന്ധം അനുഭവപ്പെട്ട ഡ്രൈവർ എല്ലാവരോടും പെട്ടെന്ന് ബസിൽ നിന്ന് ഇറങ്ങാൻ ആവശ്യപ്പെട്ടതുകൊണ്ട് യാത്രക്കാർ പരിക്കേൽക്കാതെ രക്ഷപ്പെട്ടു എന്ന് പോലീസ് പറഞ്ഞു.
ഫയർഫോഴ്‌സ് എത്തിയാണ് തീ അണച്ചതെന്നും തീപിടിത്തത്തിൻ്റെ കാരണം ഇതുവരെ കണ്ടെത്താനായിട്ടില്ലെന്നും കായംകുളം പോലീസ് സ്‌റ്റേഷനിലെ ഉദ്യോഗസ്ഥൻ പറഞ്ഞു.
എഞ്ചിന്റെ ശബ്ദത്തിൽ മാറ്റം ശ്രദ്ധയിൽപ്പെട്ടെന്നും, തുടര്‍ന്ന് രൂക്ഷമായ ഗന്ധം അനുഭവപ്പെട്ടെന്നും, അതിനാലാണ് വാഹനം റോഡരികിൽ നിർത്തിയതെന്നും ബസ് ഡ്രൈവർ മാധ്യമങ്ങളോട് പറഞ്ഞു. തുടർന്ന് ബസിൻ്റെ പിൻഭാഗത്ത് നിന്ന് കനത്ത പുക ഉയരുന്നത് സൈഡ് വ്യൂ മിററിൽ കണ്ടതായും അദ്ദേഹം പറഞ്ഞു.
എല്ലാവരോടും ഉടൻ ഇറങ്ങാൻ ഞാൻ ആവശ്യപ്പെട്ടു. ആ സമയത്ത് ബസ്സില്‍ 44 യാത്രക്കാർ ഉണ്ടായിരുന്നു, അവരിൽ 20 ഓളം കോളേജ് വിദ്യാർത്ഥികളായിരുന്നു, അവർ അടുത്ത സ്റ്റോപ്പിൽ ഇറങ്ങാനുള്ളവരായിരുന്നു എന്നും ഡ്രൈവര്‍ പറഞ്ഞു. ബസിൻ്റെ പിൻഭാഗത്തായതിനാൽ ഡീസൽ ടാങ്കിൽ നിന്നുള്ള ചോർച്ചയല്ല തീപിടിത്തത്തിന് കാരണമെന്നും ഡ്രൈവർ പറഞ്ഞു.
ഡീസൽ ടാങ്കിൽ നിന്നുള്ള ചോർച്ചയാണെങ്കിൽ ഇന്ധനം ചോർന്നു പോകും, പക്ഷേ തീ ഉണ്ടാകില്ല. എൻജിനിൽ തീ പടർന്നു. അവിടെ എന്തോ സംഭവിച്ചു.
