ഫ്ലോറിഡ: ചന്ദ്രോപരിതലത്തിൽ ഇറങ്ങിയ ഒഡീസിയസ് ബഹിരാകാശ പേടകത്തില്‍ ഘടിപ്പിച്ച മിനി ക്യാമറ വികസിപ്പിച്ചെടുത്തത് ഭോപ്പാലില്‍ നിന്നുള്ള ശാസ്ത്രജ്ഞനാണ്. ഫ്ലോറിഡ ഇൻസ്റ്റിറ്റ്യൂട്ട് ഓഫ് ടെക്‌നോളജിയിൽ എയ്‌റോസ്‌പേസ് എഞ്ചിനീയറിംഗിൽ ജോലി ചെയ്യുന്ന ഭോപ്പാൽ ആർടിഒ സഞ്ജയ് തിവാരിയുടെ മകൻ മധുര്‍ തിവാരിയാണ് ഈഗിൾകാം എന്ന മിനി ക്യാമറ വികസിപ്പിച്ചത്. ചന്ദ്രനിലിറങ്ങുന്നതിൻ്റെയും ചന്ദ്രനിൽ നിന്നുള്ള ക്ഷീരപഥത്തിൻ്റെയും ചിത്രങ്ങൾ ഈഗിൾക്യാം പകർത്തും.
നോവ-സി ലാൻഡറിൽ ഘടിപ്പിച്ചിരിക്കുന്ന ഈഗിൾക്യാം തൻ്റെ ടീം രൂപകൽപന ചെയ്തതാണെന്നും, ഇപ്പോൾ ഒരു സ്വപ്നം സാക്ഷാത്കരിക്കപ്പെടുന്നതുപോലെയാണെന്നും, നാസയുടെ അത്തരമൊരു സുപ്രധാന പദ്ധതിയുടെ ഭാഗമാകാൻ കഴിഞ്ഞതിൽ സന്തോഷമുണ്ടെന്നും മധുര്‍ തിവാരി പറഞ്ഞു. EagleCam വികസിപ്പിച്ചപ്പോൾ താൻ എംബ്രി-റിഡിൽ എയറോനോട്ടിക്കൽ യൂണിവേഴ്സിറ്റിയിൽ പിഎച്ച്ഡി വിദ്യാർത്ഥിയായിരുന്നുവെന്നും തിവാരി കൂട്ടിച്ചേർത്തു.
ചന്ദ്രനിൽ സുരക്ഷിതമായ ലാൻഡിങ് പകർത്താൻ കാമറ രൂപകൽപന ചെയ്യാനുള്ള ചുമതല എന്‍റെ ടീമിനെ ഏൽപ്പിച്ചു. യൂണിവേഴ്‌സിറ്റി വിദ്യാർഥികൾ ഏറ്റെടുത്ത ആദ്യത്തെ ദൗത്യമായിരുന്നു ഇത്.’ ഈ പദ്ധതി പ്രകാരം പേടകം ചന്ദ്രന്‍റെ ഭ്രമണപഥത്തിൽ പ്രവേശിച്ചതിന് ശേഷം, വൈ-ഫൈ സാങ്കേതികവിദ്യ ഉപയോഗിച്ച് ലാൻഡിങ് വേർപെടുത്താനും ചിത്രീകരിക്കാനും ഈഗിൾകാമിന്‌ നിർദേശം നൽകിയതായി തിവാരി പറഞ്ഞു.
ഫെബ്രുവരി 15 ന് ഫ്ലോറിഡയിലെ കെന്നഡി സ്‌പേസ് സെന്‍ററിന്‍റെ കോംപ്ലക്‌സ് 39 എയിൽ നിന്ന് ‘സ്‌പേസ് എക്‌സ് ഫാൽക്കൺ 9’ റോക്കറ്റ് ഉപയോഗിച്ച് നാസ ചാന്ദ്രദൗത്യം വിക്ഷേപിച്ചു. എട്ട് ദിവസത്തിനുള്ളിൽ അത് ചന്ദ്രന്‍റെ ദക്ഷിണധ്രുവത്തിൽ സോഫ്റ്റ് ലാൻഡിങ് നടത്തി. ലാൻഡിങ്ങിനൊപ്പം, ഈഗിൾകാം പ്രവർത്തിക്കാൻ തുടങ്ങി.
1972 ഡിസംബറിൽ അപ്പോളോ പ്രോഗ്രാമിൻ്റെ അവസാന ദൗത്യത്തിനായി അപ്പോളോ 17 ചന്ദ്രോപരിതലത്തിൽ സ്പർശിച്ചപ്പോഴാണ് അവസാനമായി യുഎസ് ചന്ദ്രനിലിറങ്ങൽ ദൗത്യം നടത്തിയത്.
ജനുവരിയിൽ, നാസയുടെ പിന്തുണയുള്ള മറ്റൊരു കമ്പനിയായ ആസ്ട്രോബയോട്ടിക് ടെക്നോളജിയുടെ ലൂണാർ ലാൻഡറിന് “നിർണ്ണായക” ഇന്ധന നഷ്ടം നേരിട്ടതിനാൽ ചന്ദ്രനിലെത്താൻ കഴിഞ്ഞില്ല.
ലാൻഡറിൽ ആറ് നാസ ഉപകരണങ്ങൾ ഉണ്ട്, അത് ചന്ദ്രൻ്റെ പരിതസ്ഥിതിയെക്കുറിച്ച് അന്വേഷിക്കുകയും ഭാവിയിലെ ആർട്ടെമിസ് ദൗത്യങ്ങൾക്കായുള്ള പരീക്ഷണ സാങ്കേതികവിദ്യകൾ പരിശോധിക്കുകയും ചെയ്യും.
