കോഴിക്കോട്: 2023 ഒക്ടോബറിൽ നഗരത്തിൽ വനിതാ മാധ്യമ പ്രവർത്തകയോട് മോശമായി പെരുമാറിയെന്ന കേസിൽ നടനും ഭാരതീയ ജനതാ പാർട്ടി നേതാവുമായ സുരേഷ് ഗോപിക്കെതിരെ കോഴിക്കോട് നടക്കാവ് പോലീസ് കുറ്റപത്രം സമർപ്പിച്ചു.
ഇന്ത്യൻ ശിക്ഷാ നിയമത്തിലെ 354-ാം വകുപ്പും (സ്ത്രീയുടെ മാന്യതയെ ബോധപൂർവം പ്രകോപിപ്പിക്കുന്നത്) കേരള പോലീസ് ആക്ടിലെ സെക്ഷൻ 119 (എ) പ്രകാരമുള്ളതും (പൊതു സ്ഥലങ്ങളിൽ സ്ത്രീകളുടെ അന്തസ് കെടുത്തുന്ന തരത്തിലുള്ള ലൈംഗിക ആംഗ്യങ്ങളോ പ്രവൃത്തികളോ ചെയ്യുക) കുറ്റപത്രത്തിൽ ഉൾപ്പെടുത്തിയിട്ടുണ്ട്. പോലീസ് സബ് ഇൻസ്‌പെക്ടർ ബിനു മോഹനാണ് കോഴിക്കോട് ജുഡീഷ്യൽ ഫസ്റ്റ് ക്ലാസ് മജിസ്‌ട്രേറ്റ് കോടതിയിൽ സമർപ്പിച്ചത്. പരാതിക്കാരിയുടെയും 27 ദൃക്‌സാക്ഷികളുടെയും മൊഴികളെ അടിസ്ഥാനമാക്കിയാണ് കുറ്റപത്രം.
2023 ഒക്‌ടോബർ 27 ന് കോഴിക്കോട് നഗരത്തിലെ ഒരു ഹോട്ടലിൽ മാധ്യമ പ്രവർത്തകരുമായുള്ള ആശയവിനിമയത്തിനിടെയാണ് സുരേഷ് ഗോപി മാധ്യമ പ്രവര്‍ത്തകയോട് മോശമായി പെരുമാറിയത്. ചോദ്യം ചോദിച്ച മാധ്യമ പ്രവർത്തകയുടെ തോളിൽ കൈവെച്ചതായാണ് പരാതി. സംഭവം വിവാദമായതോടെ സുരേഷ് ഗോപി മാധ്യമ പ്രവർത്തകയോട് ക്ഷമ ചോദിച്ച് രംഗത്ത് വന്നിരുന്നു. എന്നാൽ, സുരേഷ് ഗോപിയുടേത് വിശദീകരണം മാത്രമാണെന്നും മാപ്പ് പറച്ചിൽ അല്ലെന്നും ചൂണ്ടിക്കാട്ടിയാണ് മാദ്ധ്യമ പ്രവർത്തക നിയമനടപടിയുമായി മുന്നോട്ട് പോയത്.
ഇവർ പോലീസിലും വനിതാ കമ്മീഷനിലും പരാതി നൽകിയിരുന്നു. അപമര്യാദയായി പെരുമാറിയെന്ന മാദ്ധ്യമ പ്രവർത്തകയുടെ പരാതിയിലാണ് പോലീസ് കേസെടുത്തത്. കോഴിക്കോട് സിറ്റി പോലീസ് കമ്മീഷണർക്ക് നൽകിയ പരാതി പിന്നീട് നടക്കാവ് പോലീസിന് കൈമാറുകയായിരുന്നു. സുരേഷ് ഗോപി സ്‌ത്രീത്വത്തെ അപമാനിച്ചുവെന്നും മോശം ഉദ്ദേശത്തോടെ പെരുമാറിയെന്നുമാണ് പരാതി. തുടർന്ന്, സുരേഷ് ഗോപിക്കെതിരെ ഐപിസി 354എ വകുപ്പ് പ്രകാരം ലൈംഗിക ഉദ്ദേശത്തോടെ പെരുമാറിയതിനാണ് നടക്കാവ് പോലീസ് കേസെടുത്തത്.
അഞ്ച് വർഷം വരെ തടവ് ശിക്ഷ ലഭിക്കാവുന്ന വകുപ്പുകൾ ഉള്ളതിനാൽ കേസുമായി ബന്ധപ്പെട്ട നടപടികൾ സെഷൻസ് കോടതിയിൽ നടക്കുമെന്ന് പ്രതീക്ഷിക്കുന്നു. കുറ്റപത്രം കോടതിയിൽ സമർപ്പിക്കുന്നതിന് മുമ്പ് ഡെപ്യൂട്ടി പോലീസ് കമ്മീഷണർ അനൂജ് പലിവാൾ പരിശോധിച്ചു.
