ന്യൂഡൽഹി: കൂട്ട മതപരിവർത്തന കേസിലെ വിചാരണ വൈകിപ്പിക്കാൻ പുരോഹിതൻ മൗലാന കലീം സിദ്ദിഖി ശ്രമിക്കുന്നതായി ഉത്തർപ്രദേശ് സർക്കാർ ചൊവ്വാഴ്ച സുപ്രീം കോടതിയെ അറിയിച്ചു. രാജ്യത്തുടനീളം ഏറ്റവും വലിയ മതപരിവർത്തന സിൻഡിക്കേറ്റ് നടത്തിയതിന് സംസ്ഥാന തീവ്രവാദ വിരുദ്ധ സ്ക്വാഡ് (എടിഎസ്) സിദ്ദിഖിനെതിരെ കുറ്റം ചുമത്തിയിരുന്നു.
സിദ്ദിഖും കേസിലെ മറ്റ് പ്രതികളും വിചാരണ കോടതി നടപടികൾ വൈകിപ്പിക്കാൻ ശ്രമിക്കുകയാണെന്ന് അഡീഷണൽ അഡ്വക്കേറ്റ് ജനറൽ (എഎജി) ഗരിമ പ്രഷാദ് ജസ്റ്റിസ് അനിരുദ്ധ ബോസ് അദ്ധ്യക്ഷനായ ബെഞ്ചിനോട് പറഞ്ഞു. കഴിഞ്ഞ ഒരു വർഷത്തിനിടെ 11 സാക്ഷികളെ വിചാരണ വേളയിൽ വിസ്തരിച്ചുവെന്ന് സിദ്ദിഖിന് വേണ്ടി ഹാജരായ അഭിഭാഷകൻ പറഞ്ഞു.
മൂന്ന് പ്രതികളുടെ ജാമ്യം റദ്ദാക്കിയതുൾപ്പെടെയുള്ള അധിക വസ്തുതകൾ രേഖപ്പെടുത്താൻ എഎജി പ്രഷാദ് ബെഞ്ചിനോട് അഭ്യർത്ഥിച്ചു.
മാർച്ച് 19നകം വിഷയത്തിൽ പുനഃപരിശോധനാ സത്യവാങ്മൂലം സമർപ്പിക്കാൻ സംസ്ഥാന സർക്കാരിന് ജസ്റ്റിസ് സഞ്ജയ് കുമാർ എന്നിവരുൾപ്പെട്ട ബെഞ്ച് അനുമതി നൽകി. ഏപ്രിൽ രണ്ടിന് കേസ് വീണ്ടും പരിഗണിക്കും.
പുരോഹിതന്‍ സിദ്ദിഖിന് അലഹബാദ് ഹൈക്കോടതി അനുവദിച്ച ജാമ്യം റദ്ദാക്കണമെന്ന് ആവശ്യപ്പെട്ട് ഉത്തർപ്രദേശ് സർക്കാർ സുപ്രീം കോടതിയിൽ സ്‌പെഷ്യൽ ലീവ് പെറ്റീഷൻ സമർപ്പിച്ചു.
കഴിഞ്ഞ വർഷം ഏപ്രിലിൽ ഹൈക്കോടതിയിലെ ജസ്റ്റിസുമാരായ അത്തൗർ റഹ്മാൻ മസൂദി, സരോജ് യാദവ് എന്നിവരടങ്ങിയ ഡിവിഷൻ ബെഞ്ച് സിദ്ദിഖിനെ ജാമ്യത്തിൽ വിട്ടു നൽകാൻ ഉത്തരവിട്ടിരുന്നു. നൂറിലധികം പേരെ മതംമാറ്റിയെന്ന കുറ്റത്തിന് മീററ്റിൽ നിന്നാണ് സിദ്ദിഖിനെ അറസ്റ്റ് ചെയ്തത്.
കൂട്ടുപ്രതികളിലൊരാൾക്ക് സുപ്രീം കോടതി ജാമ്യം അനുവദിച്ചതിനാൽ തുല്യത പരിഗണിച്ചാണ് ഹൈക്കോടതി ജാമ്യം അനുവദിച്ചത്.
