വന്യമൃഗങ്ങളുടെ ആക്രമണം വർദ്ധിക്കുന്ന സാഹചര്യത്തിൽ പ്രതിരോധ നടപടികൾ ഒരുക്കുന്നതിന് കർണാടക , തമിഴ്നാട് സംസ്ഥാനങ്ങളുമായി കേരളം കരാറില്‍ ഒപ്പിട്ടു. ബന്ദിപ്പൂർ ഫോറസ്റ്റ് ഹെഡ് ക്വാര്‍ട്ടേഴ്സില്‍ നടന്ന യോഗത്തിൽ കേരള വനം മന്ത്രി എ കെ ശശീന്ദ്രൻ, കർണാടക വനം മന്ത്രി ഈശ്വർ ഖന്ദ്രെ, മുതുമല ഫീൽഡ് ഡയറക്ടർ തമിഴ്‌നാട്ടിൽ നിന്നുള്ള സീനിയർ ഫോറസ്റ്റ് ഡിപ്പാർട്ട്‌മെൻ്റ് ഓഫീസർ, മറ്റ് മൂന്ന് സംസ്ഥാനങ്ങളിലെ വനം വകുപ്പ് ഉദ്യോഗസ്ഥർ എന്നിവരും പങ്കെടുത്തു.
വന്യജീവി സംഘർഷം, വേട്ടയാടൽ, വനം, വന്യജീവി സംരക്ഷണം എന്നിവയ്‌ക്കെതിരെ കർണാടക, തമിഴ്നാട്, കേരളം എന്നീ സംസ്ഥാനങ്ങൾ ഒരുമിച്ച് പ്രവർത്തിക്കാൻ തീരുമാനിച്ചതായി കർണാടക വനം മന്ത്രി ഈശ്വര ഖണ്ഡ്രെ പറഞ്ഞു. മൂന്ന് സംസ്ഥാനങ്ങൾക്കും ബാധകമായ നയരൂപീകരണം ഉൾപ്പെടെയുള്ള കാര്യങ്ങൾ യോഗത്തിൽ ചർച്ച ചെയ്തു.
വന്യമൃഗങ്ങൾ ഒരു വനത്തിൽ നിന്ന് മറ്റൊന്നിലേക്ക് സ്വതന്ത്രമായി സഞ്ചരിക്കുന്നു. തമിഴ്നാട്, കേരളം, കർണാടക എന്നീ സംസ്ഥാനങ്ങളിൽ നൂറുകണക്കിന് വർഷങ്ങളായി ആനകൾ സ്വതന്ത്രമായി വിഹരിക്കുന്നു. കടുവകൾ ഒരു വനത്തിൽ നിന്ന് മറ്റൊന്നിലേക്ക് നീങ്ങുന്നു. ഈ വന്യമൃഗങ്ങൾ മൂലമുണ്ടാകുന്ന ജീവനാശമോ വിളനാശമോ കുറയ്ക്കാൻ ഏതൊരു സംസ്ഥാനവും നടപടികൾ സ്വീകരിക്കണം. അതും ചർച്ചയായിട്ടുണ്ട്. ഇത് ഉടൻ പരിഹരിക്കുമെന്നും അദ്ദേഹം പറഞ്ഞു.
വന്യജീവി-മനുഷ്യ സംഘർഷം, വേട്ടയാടൽ, കാട്ടുതീ നിയന്ത്രണം എന്നിവ തടയുന്നതിന് വിപുലമായ സാങ്കേതിക വിദ്യയുടെ കാര്യക്ഷമമായ ഉപയോഗം ആവശ്യമാണ്. ഇതും യോഗത്തിൽ ചർച്ചയായി. നിലവിൽ കേരളവും കർണാടകയും കരാറിൽ ഒപ്പുവെച്ചിട്ടുണ്ട്. തമിഴ് നാട് വനം മന്ത്രി എത്താത്തതിനാൽ തമിഴ്നാട് കരാറിൽ ഒപ്പുവെച്ചില്ല. എന്നാൽ തമിഴ്നാടും കരാറിൻ്റെ ഭാഗമാകും.
മൂന്ന് സംസ്ഥാനങ്ങൾക്കും തുല്യമായും കാര്യക്ഷമമായും നിർവഹിക്കാൻ കഴിയുന്ന സംയുക്ത ദൗത്യങ്ങൾ വേഗത്തിലാക്കാൻ യോഗത്തിൽ തീരുമാനമായി. സഹകരണം ഉറപ്പാക്കാൻ മൂന്ന് സംസ്ഥാനങ്ങളും നോഡൽ ഓഫീസർമാരെ നിയമിക്കും. കരാറിൻ്റെ ഭാഗമായി വന്യജീവി പ്രശ്‌നത്തിൽ പെട്ടെന്നുള്ള ഇടപെടലിനും ഏകോപനത്തിനുമായി അന്തർസംസ്ഥാന ഏകോപന സമിതി രൂപീകരിക്കാനും തീരുമാനിച്ചു.
മൂന്ന് സംസ്ഥാനങ്ങളുമായി അതിർത്തി പങ്കിടുന്ന ബന്ദിപ്പൂർ, മുതുമല, നാഗർഹോള, വയനാട് വന്യജീവി സങ്കേതങ്ങളിൽ നിന്നുള്ള ആനകൾ നാട്ടിലെത്തുന്നത് പതിവായിരിക്കുകയാണ്. ജീവഹാനിയും വ്യാപക കൃഷിനാശവും സംഭവിക്കുന്നു. ഈ സാഹചര്യത്തിലാണ് യോഗം ചേർന്നത്. അതേസമയം വന്യമൃഗശല്യം തടയാൻ കേന്ദ്ര സഹായമില്ലെന്ന് കർണാടക വനംമന്ത്രി ഈശ്വർ ഖണ്ഡ്രെ ആരോപിച്ചു. റെയിൽ വേലിക്ക് കേന്ദ്രസഹായം ലഭിക്കുന്നില്ലെന്നും പിന്നെ എങ്ങനെയാണ് കാട്ടാനകൾ നാട്ടിലേക്ക് കടക്കുന്നത് തടയാനാവുകയെന്നും ഈശ്വർ ഖണ്ഡ്രെ ചോദിച്ചു.
കേരളത്തിൻ്റെ ആവശ്യങ്ങൾ പരിഗണിച്ച് വന്യജീവി നിയമത്തിൽ കാലോചിതമായ മാറ്റം വേണമെന്ന് വനം മന്ത്രി എ.കെ.ശശീന്ദ്രൻ പറഞ്ഞു. പതിറ്റാണ്ടുകൾക്ക് മുമ്പുള്ള സ്ഥിതിയല്ല ഇപ്പോഴുള്ളത്. ചീഫ് വൈൽഡ് ലൈഫ് വാർഡന് എല്ലാ അധികാരങ്ങളും നൽകിയതായും വാർത്തയുണ്ട്. എന്നാൽ, അവർ പാലിക്കേണ്ട നിരവധി മാനദണ്ഡങ്ങളുണ്ട്.
വന്യജീവി സംഘട്ടനങ്ങളിൽ ആളുകളെ സഹായിക്കാൻ കേന്ദ്ര നിയമത്തിൽ നിരവധി ഭേദഗതികൾ ആവശ്യമാണ്. പ്രവർത്തനങ്ങൾ നടത്തുന്നതിന് ആവശ്യമായ ഫണ്ട് സംസ്ഥാനങ്ങളുടെ പക്കലുണ്ടെന്ന് ഉറപ്പാക്കാൻ കേന്ദ്രത്തിന് ബാധ്യതയുണ്ട്. പ്രവർത്തനങ്ങൾക്ക് മതിയായ ഫണ്ടില്ലാത്തത് കേരളത്തിൻ്റെ മാത്രമല്ല, മൂന്ന് സംസ്ഥാനങ്ങളും നേരിടുന്ന പ്രതിസന്ധിയാണെന്ന് എ.കെ.ശശീന്ദ്രൻ പറഞ്ഞു.
